Raica sara na lewena

Cava e Kaya na iVolatabu me Baleta na Kirisimasi?

Kena iSau Vakaivolatabu

E sega ni volai ena iVolatabu na tikinisiga e sucu kina o Jisu, e sega tale ga ni tukuna meda marautaka nona siganisucu. E kaya na ivola na Cyclopedia rau vola o McClintock kei Strong: “A sega ni vakaroti vakalou me dau vakananumi na Kirisimasi, e sega tale ga ni volai ena Veiyalayalati Vou.”

Ia e laurai ena kena ivolatukutuku ni yavutaki mai na lotu butobuto na Kirisimasi. E tukuni ena iVolatabu nida vakacudruya na Kalou ke da qaravi koya ena kena iqaraqaravi e sega ni vakadonuya.—Lako Yani 32:5-7.

Na Dina ni ka e Vakabauti me Baleta na Kirisimasi

  1. Soqovi na siganisucu i Jisu: “Era sega ni soqova na lotu vaKarisito taumada na siganisucu [i Jisu] ni okati me nodra ivakarau na lotu butobuto na kena marautaki na nona siganisucu e dua.”—The World Book Encyclopedia.

  2. Tiseba 25: E sega na ivakadinadina ni sucu o Jisu ena tikinisiga qori. De dua era digitaka na iliuliu ni lotu na tikinisiga qo ni veidonui kei na nodra soqo na lotu butobuto donuya se volekata na vulaililiwa.

  3. Soli iloloma, kana magiti, soqo ni marau: E kaya na ivola na Encyclopedia Americana: “Levu na ivalavala ni marau ena Kirisimasi e vu ga mai na soqo vakaRoma na Saturnalia, e dau vakayacori ena lomaloma ni vula o Tiseba. Me kena ivakaraitaki, na soqo ya e vu mai kina na kana magiti, na soli iloloma, kei na vakawaqa kadrala.” E kaya na ivola na Encyclopædia Britannica ni dau “tu mada vakawawa na cakacaka kei na bisinisi kece” ena gauna ni Saturnalia.

  4. Cina duiroka: E kaya na ivola ni lotu na Encyclopedia of Religion, nira dau ukutaka nodra vale mai Urope ena “cina kei na kau drokadroka ena kena veimataqali” mera marautaka kina na vulaililiwa, mera cemuria tale ga kina na yalo velavela.

  5. Draunikau drokadroka ni Kirisimasi (mistletoe kei na holly): “Era vakabauta na ilawalawa na Druid ni tiko na kaukaua vuni ena kau qo na mistletoe. E dau sokaloutaki na kau drokadroka na holly ni yalataki kina na kena lesu mai na matanisiga.”—The Encyclopedia Americana.

  6. Kau ni Kirisimasi (Christmas tree): “Nira sa mai lotu vaKarisito na kai Urope lotu butobuto, era se sokaloutaka tiko ga na vunikau.” Dua na sala e vakabulabulataki kina na sokaloutaki ni vunikau, oya na kena “biu na vunikau ni Kirisimasi (Yule) ena matanikatuba se lomanivale ena veiolodei ni vulaililiwa.”​—Encyclopædia Britannica.