Raica sara na lewena

Cava e Kaya na iVolatabu me Baleta na Easter?

Kena iSau Vakaivolatabu

E sega ni yavutaki ena iVolatabu na soqovi ni Easter. Ke o raica na kena ivolatukutuku o na kila na kena ibalebale dina, ni yavutaki mai na dua na ivakarau makawa ni vakatubukawa. Raica mada qo.

  1. Yacana: E tukuni ena ivola na Encyclopædia Britannica: “Na yaca vakaPeritania na Easter e sega ni macala na kena itekitekivu. E kauta mai na yaca qo e dua na dauvakadidike ena ikawalu ni senitiuri mai na kalou yalewa ni vulaitubutubu nodra na kai Jamani, o Eostre.” Eso tale na ivola era tukuna me o Astarte, na kalou yalewa ni vakatubukawa ni Finisia e tiko na nona ivukevuke mai Papiloni, o Isitari.

  2. Ravete: Qo na ivakatakarakara ni vakatubukawa era “dau soqova na veivanua vakaUrope kei na Tokalau e Loma ena vulaitubutubu.”​—Encyclopædia Britannica.

  3. Yaloka: E kaya e dua na iVolavosa ni iTukuni na Funk & Wagnalls Standard Dictionary of Folklore, Mythology and Legend na kena vaqarai na yaloka ni Easter e rairai kauta mai na ravete ni Easter “e sega wale ga ni qito ni gone, ia e tiki sara ga ni ivakarau makawa ni vakatubukawa.” Ena so na ivakarau vakavanua era nanuma ni ukutaki na yaloka ni Easter ena “rawati kina vakacakamana na marau, na tikovinaka, bulabula vinaka, se veitaqomaki.”—Traditional Festivals.

  4. iSulu Vou ni Easter: “Ena okati mo veibeci o qai kalouca ni o sega ni vakaisulu vou mo kidavaka na kalou yalewa ni Vulaitubutubu ena vanua vakaScandinavia, o Eastre.”—The Giant Book of Superstitions.

  5. Lotu ni kida na mataka: Qo na ivakarau era dau vakayacora na sokalou vua na matanisiga ena “gauna e tautauvata kina na balavu ni siga kei na bogi me kidavaki kina na matanisiga kei na kena kaukaua levu me vakabulabulataki ira na kabula kece.”—Celebrations—The Complete Book of American Holidays.

E vakamacalataka vinaka na ivola The American Book of Days na itekitekivu ni Easter: “E sega ni vakatitiqataki ni ciqoma na lotu ena gauna e liu na ivalavala makawa ni lotu butobuto, sa qai vukica na kena ibalebale me vaKarisito.”

E veivakasalataki na iVolatabu ni sega ni rawa nida sokalou vua na Kalou da qai muria na ivakarau se ivalavala e vakacudrui koya. (Marika 7:6-8) E kaya na 2 Korinica 6:17: “‘Ni tawasei kemuni,’ e kaya o Jiova, ‘ni kua ni tara tiko na ka e sega ni savasava.’” Ke da via vakamarautaka na Kalou, eda na sega ni soqova na olodei e vu mai na lotu butobuto na Easter.