Raica sara na lewena

Na Website ni iVakadinadina i Jiova

Digia na Vosa vakaViti

Cava e Kaya na iVolatabu me Baleta na Cudru?

Cava e Kaya na iVolatabu me Baleta na Cudru?

Kena isau vakaivolatabu

E kaya na iVolatabu ni o koya e sega ni lewa vinaka na nona cudru ena vakaleqai koya ga, kei ira na volekati koya tiko. (Vosa Vakaibalebale 29:22) Eda na rairai nanuma ni donu vinaka noda cudru ena so na gauna, ia e kaya na iVolatabu ni na sega ni vakabulai o koya e dau cudru. (Kalatia 5:​19-​21) E tu ena iVolatabu na ivakavuvuli ena vukea e dua me lewa vinaka nona cudru.

 E cala meda dau cudru?

Sega. Ena so na gauna ena donu vinaka noda cudruvaka eso na ka. Kena ivakaraitaki, e “cudru vakalevu” na turaga yalodina o Niemaia ni rogoca na nodra vakalolomataki eso era vakabauta vata.​—Niemaia 5:6.

E dau cudru tale ga ena so na gauna na Kalou. Kena ivakaraitaki, “e waqa mai na cudru i Jiova” vei ira nona tamata nira beca na veidinadinati ra qai sokaloutaka tu na kalou lasu. (Dauveilewai 2:​13, 14) Qori e sega ni nona itovo uasivi na Kalou o Jiova. E donu vinaka na nona cudru, e cakava tale ga ena gauna veiganiti.​—Lako Yani 34:6; Aisea 48:9.

 Gauna cava e cala kina na cudru?

E cala na cudru ni sega ni lewai vinaka, se sega ni donu na kena inaki me vaka e dau laurai vei ira e levu nikua. Kena ivakaraitaki:

  • “E . . . tuburi Keni na cudru” ni sega ni vakadonuya na Kalou na nona isoro. E vakalaiva o Keni nona cudru me lewai koya mani tini labati tacina kina.​—Vakatekivu 4:​3-8.

  • “Dua na ka na nona cudru katakata” na parofita o Jona ni vakaraitaka na Kalou nona yalololoma vei ira na kai Ninive. E vakadodonutaki Jona na Kalou ni sega ni ‘dodonu me cudru vakalevu,’ ia me vakaraitaka ga na yalololoma vei ira na veivutunitaka nodra cala.​—Jona 3:⁠10–​4:​1, 4, 11. *

E ka ni vuli vei keda na tamata ivalavala ca na ivakaraitaki qori ni “sega ni kauta mai na yalododonu ni Kalou na cudru ni tamata.”​—Jemesa 1:​20.

 O na lewa vinaka vakacava nomu cudru?

  • Kila na ka e rawa ni yaco ke sega ni lewai vinaka na cudru. Era nanuma eso ni ivakaraitaki ni kaukaua na cudru. Ia na kena dina oya ni na laurai kina nona malumalumu e dua. “E vaka na koro e botei ni sega na kena bai, na tamata e sega ni lewa vinaka na nona cudru.” (Vosa Vakaibalebale 25:28; 29:11) Ia nida vosota noda cudru eda sa vakaraitaka tiko na yalomatua kei na kaukaua. (Vosa Vakaibalebale 14:29) E kaya na iVolatabu: “E vinaka o koya e berabera ni cudru, e ca na tamata qaqa .”​— Vosa Vakaibalebale 16:32.

  • Vulica mo vosota nomu cudru mo kua kina ni veivutunitaka e dua na ka o cakava. E kaya na Same 37:8: “Mo biuta na cudru qai vakanadakuya na katakata,kua ni rarawa qai goleva na caka ca.” Na gauna eda cudru kina e rawa nida vakatulewataka meda kua ni cudru ni na rawa ni lai tini ena “caka ca.” E kaya na Efeso 4:​26: “Ni o cudru, mo kua ga ni valavala ca.”

  • Saga mo biubiu ni o tekivu cudru. E kaya na iVolatabu: “Ni tekivu na veileti e vaka na dola ni baniua, ni bera ni tubu na veiba mo biubiu.” (Vosa Vakaibalebale 17:14) E ka vakayalomatua me wali totolo na veileqaleqati, ia ena vinaka me qai caka ni sa seavu nomudrau cudru.

  •  Kila na kena dina. E kaya na Vosa Vakaibalebale 19:11: “Na nona yalomatua na tamata e berabera kina ni cudru.” E ka vakayalomatua meda kila mada na dina ni ka e yaco ni bera nida cakava e dua na ka. Nida vakasamataka vakavinaka na ka kece e yaco eda na sega ni cudru kina vakaveitalia.​—Jemesa 1:​19.

  •  Kerea ena masu na vakacegu ni vakasama. Ena vukei iko na masu mo vakila na “vakacegu ni Kalou e uasivia na vakasama kece.” (Filipai 4:7) Na masu e dua na sala ena vukei keda kina na yalotabu ni Kalou meda vakaitovotaka na itovo me vaka na vakacegu, yalomalua, qai lewai keda vinaka.​—Luke 11:13; Kalatia 5:​22, 23.

  • Digi ira vinaka na nomu itokani. Eda na vakatotomuria ga na ka era cakava o ira eda dau veimaliwai vata. (Vosa Vakaibalebale 13:20; 1 Korinica 15:33) E vakasalataki keda na iVolatabu: “Mo kua ni veitokani kei na tamata cudrucudru se veimaliwai vata kei na dua e cudru katakata.” Na vuna? “De o vulica na nona ivalavala o qai coriti kina.”​—Vosa Vakaibalebale 22:24, 25.

^ para. 14 E yalomalumalumu ni muria na veivakadodonutaki qori o Jona, seavu nona cudru katakata, qai vakayagataki koya tale na Kalou me vola e dua na ivola ena iVolatabu e vakatokayacataki vua.