Raica sara na lewena

O Cei na Yacadra e Volai ena “iVola ni Bula”?

Kena iSau Vakaivolatabu

“Na ivola ni bula,” e kilai tale ga me “ivolavivigi ni bula” se “ivola ni ivakananumi,” e volai kina na yacadra era vakanuinui tu mera rawata na bula tawamudu. (Vakatakila 3:5; 20:12; Malakai 3:16) E vakadeitaka na Kalou na yaca qori ena nodra yalodina ni talairawarawa vua.​—Joni 3:16; 1 Joni 5:3.

E sega ni guilecavi ira na nona dauveiqaravi yalodina na Kalou, e vaka sara ga e vola tiko na yacadra ena ivola, mai na “ivakatekivu kei vuravura.” (Vakatakila 17:8) Na imatai ni tamata yalodina e rairai volai na yacana ena ivola ni bula o Epeli. (Iperiu 11:4) E sega ni volai ga me rawa na yaca, ia na vola ni bula e vakaraitaka ni o Jiova e Kalou dauloloma e “kilai ira na nona tamata.”​—2 Timoci 2:19; 1 Joni 4:8.

E rawa ni boko na yaca ena “ivola ni bula”?

Io. E kaya na Kalou me baleti ira na Isireli talaidredre ena gauna vakaivolatabu: “O koya ga e valavala ca vei au, au na bokoci koya laivi mai na noqu ivola.” (Lako Yani 32:33) Ia ke da yalodina tiko ga, eda na volai tiko ga ena “ivola ni bula.”​—Vakatakila 20:12.