Raica sara na lewena

Na Website ni iVakadinadina i Jiova

Digia na Vosa vakaViti

Na iValavala ca Vakacava e Sega ni Vosoti?

Na iValavala ca Vakacava e Sega ni Vosoti?

Kena isau vakaivolatabu

Ena ivalavala ca e sega ni vosoti, erau lakovata na ivalavala ca bibi kei na ivakarau ni yalo e vakayacori kina. Qori e vakavuna me sega ni veivosoti na Kalou. E rawa vakacava ni sega ni vosoti na nona ivalavala ca e dua?

Na Kalou ena vosoti ira era veivutunitaka nodra cala, muria nona ivakatagedegede, qai cakacakataka nodra vakabauti Jisu Karisito. (Cakacaka 3:19, 20) Ia e rawa ni vakatulewataka e dua me cakava tiko ga na ka ca, e sega ni via veisautaka na nona rai se ivalavala. O koya va qori e tukuna na iVolatabu ni “ca na lomana,” sa “vakaukauataki na lomana ena kaukaua ni ivalavala ca e veibacani.” (Iperiu 3:12, 13) Na ivakarau ni lomana e dua e via saqata tiko ga na Kalou e vakatauvatani ina qele e sega ni rawa ni tuli kina e dua na ka ni sa kama ena lovo. (Aisea 45:9) E sega ni dua na yavu me vosoti kina o koya qori ni vakayacora na ivalavala ca e sega ni vosoti rawa.​—Iperiu 10:26, 27.

Era vakayacora eso na iliuliu ni lotu vakaJiu ena gauna i Jisu na ivalavala ca e sega ni vosoti. Era kila ni cakamana o Jisu ena kaukaua ni yalo tabu ni Kalou, ia era kaya ena veibeci ni solia vei Jisu na kaukaua o Setani na Tevoro.​—Marika 3:22, 28-30.

iVakaraitaki ni ivalavala ca e rawa ni vosoti

  • Vosavakacaca ena vuku ni lecaika. A dau vosabeca e liu na Kalou na yapositolo o Paula, ia e kaya: “Au lomani baleta niu a lecaika, au vakayacora na ka kece qori niu a se sega ni vakabauta.”​—1 Timoci 1:13.

  • Veibutakoci. E tukuni ena iVolatabu eso era dau veibutakoci tu ena dua na gauna, era veisautaka nodra ivalavala qai vosoti ira na Kalou.​—1 Korinica 6:9-11.

“Au sa vakayacora beka e dua na ivalavala ca e sega ni vosoti?”

Ke o cata mai vu ni lomamu na nomu ivakarau ca ena gauna sa oti o qai via veisau dina, o sega ni vakayacora na ivalavala ca e sega ni vosoti. Ke o sega ni lomaqa mo cakava tiko ga na ka e cata na Kalou, ena vosoti iko o koya ke o sikalutu mada ga vakavica ena dua tiko ga na cala.​—Vosa Vakaibalebale 24:16.

Era nanuma eso nira vakayacora na ivalavala ca e sega ni vosoti ni ora tu ga na lomadra ena ka era cakava. Ia e kaya na iVolatabu ni dau veivakaisini na lomada. (Jeremaia 17:9) E sega ni solia vei keda na Kalou na dodonu meda vakalewa e dua, se meda vakalewai keda mada ga. (Roma 14:4, 12) Ke beitaki keda na lomada, e se rawa ga ni vosoti keda na Kalou.​—1 Joni 3:19, 20.

Vakacava o Jutasa Isikarioti, a vakayacora na ivalavala ca e sega ni vosoti?

Io. Na nona kocokoco a vakavuna me butakoca na ilavo a cautaki ena dua na cakacaka tabu. A sega ni kauaitaki ira dina na dravudravua, a vinakata ga me kumuni e levu tale na ilavo me rawa ni butakoca. (Joni 12:4-8) Ni sa vakadeitaka e lomana o Jutasa me cakava na ka ca, a liumuritaki Jisu sara ena 30 na tikinisiliva. E kila o Jisu ni na sega vakadua ni veivutunitaka o Jutasa na ka e cakava, qai vakatokai koya me “o koya e dodonu me rusa.” (Joni 17:12) Kena ibalebale na ivotavota i Jutasa ena gauna e mate kina na rusa tawamudu, ena sega ni vakaturi.​—Marika 14:21.

A sega ni bau vakaraitaka o Jutasa ni veivutunitaka dina na nona cala. A sega ni vakatusa vua na Kalou na nona cala, a vakatusa ga vei ira na iliuliu ni lotu a tokoni ira ena nodra bukivere.​—Maciu 27:3-5; 2 Korinica 7:10.