Raica sara na lewena

Na Cava na iVakatakilakila ni “iOtioti ni Veisiga” se na “iVakataotioti”?

Na Cava na iVakatakilakila ni “iOtioti ni Veisiga” se na “iVakataotioti”?

Kena isau vakaivolatabu

E vakamacalataka na iVolatabu na veika se na ituvaki ena yaco tiko ena loma ni dua na gauna, me yacova na “ivakataotioti ni ituvaki [qo],” se “na icavacava kei vuravura.” (Maciu 24:3; King James Version) E vakatoka na iVolatabu na gauna qori me “iotioti ni veisiga,” kei na “gauna ni icavacava,” se “ivakataotioti.” (2 Timoci 3:1; Taniela 8:​19; Easy-to-Read Version) Qo eso na parofisai ena vakayacori ena iotioti ni veisiga se na ivakataotioti:

  • Levu na ivalu.​—Maciu 24:7; Vakatakila 6:4.

  • Leqa ni kakana.​—Maciu 24:7; Vakatakila 6:​5, 6.

  • Uneune kaukaua.​—Luke 21:11.

  • Matedewa, se veitauvi na “mate vakadomobula.”​—Luke 21:11, Contemporary English Version.

  • Tubu na basulawa.​—Maciu 24:12.

  • Vakacacana na vuravura na tamata.​—Vakatakila 11:18.

  • Torosobu na itovo, levu era na “sega ni dau vakavinavinaka, era na sega ni yalodina, . . . era na sega ni via okati ena dua na veiyalayalati, era na dau vakauvosa, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veiliumuritaki, era na domoqa, era na dokadoka.”​—2 Timoci 3:​1-4.

  • Leqa na bula vakavuvale, levu “sa na yali vei ira na veilomani vakaveiwekani” ra qai “talaidredre vei ira nodra itubutubu” na gone.​—2 Timoci 3:​2, 3.

  • Batabata nodra lomana na Kalou e levu.​—Maciu 24:12.

  • Vakarairai na sokalou.​—2 Timoci 3:5.

  • Vakalevutaki na kilaka me baleta na parofisai ena iVolatabu, wili kina na parofisai ni iotioti ni veisiga.​—Taniela 12:4.

  • Vunautaki e veiyasa i vuravura na itukutuku vinaka ni Matanitu ni Kalou.​—Maciu 24:14.

  • Sega ni kauaitaki qai vakasewasewani na ivakadinadina ni sa voleka na icavacava.​—Maciu 24:37-​39; 2 Pita 3:​3, 4.

  • Era na yaco vata ena loma ni dua na gauna na parofisai kece qori, sega ni vica ga.​—Maciu 24:33.

Eda sa bula tu ena “iotioti ni veisiga”?

Io. Na ituvaki kei vuravura kei na ituvatuva ni gauna ena iVolatabu e vakadeitaka ni a tekivu na iotioti ni veisiga ena 1914. A tekivu veiliutaki tale ga mai lomalagi ena yabaki ya na Matanitu ni Kalou, a vagalalataki Setani na Tevoro kei ira na timoni mai lomalagi ra qai kolotaki sobu mai vuravura. (Vakatakila 12:​7-​12) E vakadinadinataki na veivakamuai i Setani ena kawatamata ena yalo ni talaidredre sa takalevu tu nikua kei na torosobu ni itovo. Sa rauta me ‘vakilai e levu na ka dredre’ ena iotioti ni veisiga qo.​—2 Timoci 3:1.