Raica sara na lewena

Mera Vakavulici Luvedra Vakacava na iTubutubu ena ka e Baleta na Veiyacovi?

Mera Vakavulici Luvedra Vakacava na iTubutubu ena ka e Baleta na Veiyacovi?

Kena isau vakaivolatabu

O cei me vakavulici ira na gone ena ka e baleta na veiyacovi? E kaya na iVolatabu ni qori e nodrau itavi na itubutubu. Raica mada eso na vakatutu era kaya e levu na itubutubu ni yaga:

  • Kua ni madua. Na iVolatabu e sega ni wereubiubi ena veika me baleta na veiyacovi se na gacagaca ni veiyacovi. A kaya tale ga na Kalou vei ira na Isireli mera vakavulici “na gone” ena veika qori. (Vakarua 31:12; Vunau ni Soro 15:​2, 16-​19) Vukei luvemu me raica ni sega ni ka vakamadua na kena veitalanoataki na ka e baleta na veiyacovi se na gacagaca ni veiyacovi.

  • Vakamacala vua ni tubu cake tiko. Kua ni waraka me sa vakila o luvemu na veiveisau e yagona, mo qai vakamacalataka vua na ka e baleta na veiyacovi. Ni tubu cake tiko o luvemu, vakamacala vakalalai vua me veiganiti kei na nona yabaki ni bula.​—1 Korinica 13:11.

  • Veivakavulici ena ivakatagedegede savasava. Ena rairai vakavulici ena so na koronivuli na ka e baleta na veiyacovi. Era uqeti kina na itubutubu ena iVolatabu mera okata ena nodra ivakamacala vei luvedra na rai donu me baleta na veiyacovi kei na ivalavala savasava me vakayacori kina.​—Vosa Vakaibalebale 5:​1-​23.

  • Rogoci luvemu. Kua ni cudru se vakalewai luvemu ni taroga e dua na ka me baleta na veiyacovi. Mo ‘totolo ga ni vakarorogo, qai berabera ni vosa.’​—Jemesa 1:​19.

Taqomaki luvemu me kua ni vaqaseni

Vakavulici luvemu me kua ni vakamalumalumu ke vakasagai koya e dua

  • Vakasamataka na ituvaki e rawa ni basika. Saga mo kila na sala era dau lawakitaki ira kina na gone na dauveivaqaseni.​—Vosa Vakaibalebale 18:15; raica na wase 32 ni ivola Questions Young People Ask​—Answers That Work, Volume 1.

  • Kauaitaka na bula i luvemu. Era sega ni nuitaki kece na tamata, mo qarauna gona o cei o tataunaka kina na luvemu. Kua tale ga ni laiva na luvemu me lako vakaveitalia.​—Vosa Vakaibalebale 29:15.

  • Vakavulici luvemu me talairawarawa ga ena veika vinaka. E dodonu mera talairawarawa na gone vei ira na itubutubu. (Kolosa 3:​20) Ia ke o vakavulici luvemu me talairawarawa vei ira kece era qase vua, ena rawarawa sara nona vaqaseni. Na itubutubu lotu vaKarisito me kaya vei luvena: “Ke dua e tukuna mo cakava na ka e sega ni taleitaka na Kalou, kua ni cakava.”​—Cakacaka 5:​29.

  • Vakatovotovo. Vukei luvemu ena ka me cakava ke via vakasagai koya e dua ni o yali tu. Drau vakatovotovotaka rawa eso na ituvaki, me rawa ni kaya ena doudou o luvemu: “Kua! Au na tukuni iko!” qai dro tani vakatotolo. Ena rairai vinakati mo vosa “tiko ga vei ira na luvemu,” mera kua kina ni guilecava.​—Vakarua 6:7, Contemporary English Version.