Raica sara na lewena

Cava na Rai ni iVolatabu ena Nodra Qaravi na iTubutubu iTabaqase?

Cava na Rai ni iVolatabu ena Nodra Qaravi na iTubutubu iTabaqase?

Kena isau vakaivolatabu

 E bibi nodra itavi na gone era sa uabula ena nodra qaravi na itubutubu itabaqase. E kaya na iVolatabu me baleti ira na gone uabula ni “vakaraitaka nodra qaravi Kalou ena ka era cakava vei ira na nodra vuvale, mera sausaumi vei ira nodra itubutubu . . . ni sa vinaka qo vua na Kalou.” (1 Timoci 5:4, New International Version) Nira qaravi ira nodra itubutubu itabaqase, era sa talairawarawa tiko ena ivakaro ena iVolatabu mera dokai rau na itubutubu.—Efeso 6:2, 3.

 E sega ni dua na idusidusi matailalai ena iVolatabu me baleta nodra qaravi na itubutubu itabaqase. Ia e tiko kina na ivakaraitaki vakaivolatabu me baleti ira na tagane kei na yalewa vakabauta era qaravi ira nodra itubutubu itabaqase. Eda rawa ni vuli ena nodra ivakaraitaki ni veiqaravi.

 Era qaravi ira vakacava nodra itubutubu itabaqase eso era bula ena gauna vakaivolatabu?

 E levu na sala era qaravi ira kina nodra itubutubu itabaqase, qai vakatau ena kedra dui ituvaki.

  •   Josefa: Sa qase sara o tamana, o Jekope, e veiyawaki tale ga nodrau itikotiko. Ia na gauna e veisau kina na kena ituvaki o Josefa, e tuvanaka me toki voleka yani vua o tamana. E vakavaletaki tamana, taqomaki koya tale ga.—Vakatekivu 45:9-11; 47:11, 12.

  •   Ruci: Toki ena nona vanua o vugona, e cakacaka tale ga vagumatua me qaravi koya.—Ruci 1:16; 2:2, 17, 18, 23.

  •   Jisu: Ni bera toka ga nona takali, e lesia e dua me qaravi tinana o Meri, e rairai yada tu ena gauna ya.—John 19:26, 27. a

 Na ivakasala yaga cava ena iVolatabu ena vukei ira na veiqaravi tiko?

 E tiko ena iVolatabu na ivakavuvuli e rawa ni vukei ira na veiqaravi tiko vei ira nodra itubutubu itabaqase nira oca se lomabibi.

  •   Rokovi rau nomu itubutubu.

     Ka e kaya na iVolatabu: “Rokova na tamamu kei na tinamu.”—Lako Yani 20:12.

     Ena muri vakacava na ivakavuvuli qori? Rokovi rau nomu itubutubu ni o laiva eso na ka me rau cakava ga vakataki rau, kua ni via lewa na ka kece rau cakava. Ke rawa, me rau vakatulewataka ga na veiqaravi rau vinakata. Vakaraitaka nomu rokovi rau ni o cakava na ka o rawata mo vukei rau kina.

  •   Vinakati na veikauaitaki kei na vosovoso.

     Ka e kaya na iVolatabu: “Na nona yalomatua na tamata e berabera kina ni cudru, e kena idivi ni dau raibaleta na cala.”—Vosa Vakaibalebale 19:11.

     Ena muri vakacava na ivakavuvuli qori?: Ke veicalati na ka rau kaya nomu itubutubu itabaqase se rau vakalewa nomu veiqaravi, rawa ni o vakasamataka qo, ‘Cava au na cakava ke va tale ga qori na kequ ituvaki meu rarawataka ni yalani na ka au rawa ni cakava?’ Ena vinakati kina na veikauaitaki kei na yalovosovoso me kua ni vakalevutaki tale na leqa.

  •   Taro ivakasala.

     Ka e kaya na iVolatabu: “E seva na ka e nanumi ni sega na veivosaki, ia e vakavatukana na sasaga ni levu na daunivakasala.”—Vosa Vakaibalebale 15:22.

     Ena muri vakacava na ivakavuvuli qori?: Saga mo kila na sala o rawa ni qarava vinaka kina na mate e tauvi rau tiko nomu itubutubu. Vakataroga eso na ivukevuke yaga era vakarautaki ena nomudou itikotiko me veivuke ena nodrau qaravi. Veitalanoa kei ira eso tale era dau qaravi ira tale ga na nodra itubutubu itabaqase. Ke ra tiko na tacimu se tuakamu, dou veitalanoa vakavuvale me baleta na ka rau gadreva nomudou itubutubu, nodrau qaravi, kei na nomudou veivuketaka na itavi qori.

    Dou veitalanoa vakavuvale ena nodra qaravi na itubutubu itabaqase

  •   Dau yalomalumalumu.

     Ka e kaya na iVolatabu: “Era vuku na yalomalumalumu.”—Vosa Vakaibalebale 11:2.

     Ena muri vakacava na ivakavuvuli qori?: Kila na vanua e yalani kina na nomu kaukaua. Kena ivakaraitaki, e vakaiyalayala ga na ka eda rawa ni cakava kei na noda kaukaua. Qori e dusia na levu ni veivuke o rawa ni dolea vei rau nomu itubutubu. Ke o vakila ni sa tarabi tale nomu veiqaravi, kerea nodra veivuke na weka se o ira na kenadau.

  •   Kauaitaka nomu bula.

     Ka e kaya na iVolatabu: “E sega ni dua na tagane e cata na yagona, ia ena vakania qai karona.”—Efeso 5:29.

     Ena muri vakacava na ivakavuvuli qori?: Sa tiko mada na nomu itavi mo qaravi rau nomu itubutubu, ia e vinakati mo kauaitaka tale ga nomu bula, kei na nomu vuvale ke o vakawati. Dau kana vakavinaka. Me tiko na gauna mo vakacegu kina, mo moce vinaka tale ga. (Dauvunau 4:6) Rawa ni o cegu vakalekaleka na veiqaravi, o na bulabula kina, vinaka na lomamu, nomu vakasama, o vakila tale ga na kaukaua.

 E kaya na iVolatabu mera qaravi ga e vale na itabaqase?

 E sega ni dua na idusidusi vakaivolatabu me baleta nodra qaravi ga e vale na itubutubu itabaqase. Eso era bolea mera qaravi ira e vale ena kena levu era rawata. Yaco na gauna ena rairai ka vakayalomatua mera qaravi ga ena vanua era tiko kina na malumalumu. Era na rairai bose vata na lewe ni vuvale mera vakatulewataka na veiqaravi e veiganiti.—Kalatia 6:4, 5.

a Me baleta na itukutuku qori, e volai ena dua na ivakamacala ni iVolatabu: “Sa rairai takali o Josefa [na wati Meri], e dau qaravi koya voli o Jisu, ia ni sa vakarau mate, o cei ena colata na itavi qori? . . . E vakavulici ira kina na gone o Karisito mera qaravi ira nodra itubutubu qase.”—iVolatabu The NIV Matthew Henry Commentary in One Volume, tabana e 428-429.