Raica sara na lewena

Na Website ni iVakadinadina i Jiova

Digia na Vosa vakaViti

Cava e Kaya na iVolatabu me Baleta na Duivosavosa?

Cava e Kaya na iVolatabu me Baleta na Duivosavosa?

Kena isau vakaivolatabu

Na “duivosavosa” e kena ibalebale na nodra vosataka vakacakamana eso na lotu vaKarisito taumada eso na vosa ni bera mada ga nira vulica. (Cakacaka 10:46, New International Version). Era kila vakamatata kina na vakarorogo na ka e tukuna tiko o koya e vosa tiko. (Cakacaka 2:​4-8) Na duivosavosa e dua na isolisoli ni yalotabu e vakarautaka na Kalou vei ira eso na lotu vaKarisito ena imatai ni senitiuri.​—Iperiu 2:4; 1 Korinica 12:​4, 30.

 Na vanua kei na gauna cava e tekivu kina na duivosavosa?

E yaco na imatai ni cakamana qo e Jerusalemi ena mataka ni siga ni soqo vakajiu ena Penitiko 33 G.V. Era soqoni vata tiko e 120 na tisaipeli i Jisu e qai “sobuti ira kece na yalo tabu, era tekivu vosataka na veimataqali vosa.” (Cakacaka 1:​15; 2:​1-4) E dua na ilawalawa levu “mai na veimatanitu kece e ruku i lomalagi era soqoni vata mai nira rogoci ira na tisaipeli nira vosataka tiko na nodra dui vosa.”​—Cakacaka 2:​5, 6.

 Cava na inaki ni duivosavosa?

  1. Me vakadinadinataka ni tokoni ira tiko na lotu vaKarisito na Kalou. Ena veigauna sa sivi e dau vakaraitaka vakacakamana na Kalou eso na ivakatakilakila me vakaraitaka kina nona tokoni ira na nona tamata yalodina me vakataki Mosese. (Lako Yani 4:​1-9, 29-​31; Tiko Voli Mai na Lekutu 17:10) Qori tale ga na inaki ni duivosavosa, me vakadinadinataki kina na nona tokona na Kalou na ivavakoso vaKarisito se qai tauyavu vou ga. E vola na yapositolo o Paula: “Na duivosavosa gona e sega ni ivakatakilakila vei ira na vakabauta, vei ira ga na sega ni vakabauta.”​—1 Korinica 14:22.

  2. Mera vunau sara kina vakavinaka na lotu vaKarisito. O ira na rogoca na nodra vosa na imuri i Karisito ena siga ni Penitiko era kaya: “Eda rogoca nira vunautaka tiko ena noda vosa sara ga na veika vakatubuqoroqoro ni Kalou.” (Cakacaka 2:​11) Koya gona, dua tale na inaki bibi ni cakamana qo me rawa nira “vunautaka sara vakavinaka” ra qai “vakavulici ira na lewe ni veivanua kece ga mera tisaipeli” me vaka ga a vakarota o Jisu. (Cakacaka 10:42; Maciu 28:19) O ira na le 3,000 era raica na cakamana ra rogoca tale ga na ivunau qori era qai tisaipeli tale ga ena siga ga oya.​—Cakacaka 2:​41.

 Ena tawamudu na vakayagataki ni duivosavosa?

Sega. Na isolisoli kece ni yalotabu, okati kina na duivosavosa, e yalani ga na gauna me vakayagataki kina. A parofisaitaka na iVolatabu: “Na isolisoli ni parofisai ena oti yani, na duivosavosa ena mudu.”​—1 Korinica 13:8.

 Gauna cava e oti kina na duivosavosa?

E dau soli tale ga na isolisoli ni yalotabu vei ira eso na lotu vaKarisito nira tabaki e ligadratou na yapositolo. (Cakacaka 8:​18; 10:44-​46) O ira na dau ciqoma na isolisoli qori era sega ni rawa ni solia vua e dua tale. (Cakacaka 8:​5-7, 14-​17) Me kena ivakaraitaki, e rawa ni solia e dua na vakailesilesi ni matanitu na laiseni ni draiva, ia e sega ni vakatarai vakalawa vua na tamata e soli kina me solia vua e dua tale. Koya gona, a oti na vakayagataki ni duivosavosa ena nodratou takali na yapositolo kei ira kece na dau ciqoma tiko na isolisoli qori.

 Vakacava na duivosavosa nikua?

A rairai oti na vakayagataki ni duivosavosa ena icavacava ni imatai ni senitiuri G.V. Koya gona, e sega ni dua nikua e rawa ni kaya ni tiko vua na kaukauwa ni Kalou me rawa ni vakayagataka kina na duivosavosa. *

 Era na kilai vakacava na lotu vaKarisito dina?

A kaya o Jisu nira na kilai na nona imuri ena nodra dau vakuai ira ena vuku ni nodra loloma. (Joni 13:34, 35) A vakavuvulitaka tale ga na yapositolo o Paula nira na kilai tani na lotu vaKarisito dina ena nodra dau loloma. (1 Korinica 13:​1, 8) E vakaraitaka tale ga ni vukei ira na lotu Vakarisito na yalotabu ni Kalou mera vuataka na imatai ni itovo e okati ena “vua ni yalo tabu,” oya na loloma.​—Kalatia 5:​22, 23.

^ para. 20 Raica na ulutaga “E Vu Vakalou na Duivosavosa?