Raica sara na lewena

Au na Kunea i Vei na iNuinui?

Au na Kunea i Vei na iNuinui?

Kena isau vakaivolatabu

E kaya na iVolatabu ni Kalou e via solia vei keda na ‘inuinui, kei na ka meda namaka ena gauna se bera mai.’ * (Jeremaia 29:11) E vakarautaka kina vei keda na nona Vosa ‘me noda na inuinui, da qai vakacegui mai na veika e volai ena iVolatabu.’ (Roma 15:4) Na ivakasala ena iVolatabu ena vukei keda meda walia noda leqa e veisiga, qai vakadeitaka vei keda na inuinui totoka ena veigauna se bera mai.

Ena ulutaga qo

 E vukei keda vakacava na iVolatabu me donu noda rai?

Ena vakasalataki keda ena ka meda cakava me vinaka kina noda ivakarau ni bula. Qo e vica na kena ivakaraitaki.

  • Raica na ivakasala yaga ena iVolatabu. E kaya na Same 119:105: “Na nomuni vosa na cina ina yavaqu.” Rua na ka ena yaco ke ramase na cina. Eda rawa ni raica kina na ka e tu e matada, kei na ka e tu mai vakayawa. E va tale ga qori na ivakavuvuli vakaivolatabu, e rawa ni vukei keda meda walia na leqa eda sotava ena siga yadua, me donu tale ga na noda rai. Ena vakayaloqaqataki keda, qai ‘vakamarautaka vakalevu na lomada.’ (Same 19:7, 8) Na iVolatabu e vukei keda tale ga meda kila vinaka na inuinui totoka e se bera mai, me baleta na kawatamata kei na vuravura. Na inuinui qori e vakamarautaki keda, eda na lomavakacegu tale ga.

  • Ciqoma nodra veivuke eso tale. Ke da sega ni walia rawa noda leqa, eda na rairai vinakata meda yawaki ira noda vuvale se itokani. Ia e kaya na iVolatabu ni sega ni ka vakayalomatua qori, ni rawa nida na vakatulewa cala kina. (Vosa Vakaibalebale 18:1) E rawa nira vukei keda na wekada meda kua ni cakava qori. E rawa ni yaga tale ga na nodra ivakasala meda walia na noda leqa. (Vosa Vakaibalebale 11:14) Ena rawa nira vakacegui keda, ra vakayaloqaqataki keda tale ga me rawa nida vosota me yacova ni sa vinaka na ituvaki.—Vosa Vakaibalebale 12:25.

  • Masu vua na Kalou. E kaya na iVolatabu: “Biuta vei Jiova na nomu icolacola bibi, ena tokoni iko o koya. Ena sega vakadua ni laiva me bale na yalododonu.” * (Same 55:22) Sa rauta me tukuni ni o Jiova “na Kalou o koya na vu ni noda inuinui.” (Roma 15:13) O rawa ni masulaka vua ‘na ka kece o lomaocaocataka,’ qai nuidei ni na kauaitaki iko. (1 Pita 5:7) E kaya gona na iVolatabu: “Ena vakataudeitaki kemuni, ena vakaukauataki kemuni, ena vakadeitaka na nomuni yavu.”—1 Pita 5:10.

  • Me vaqaqacotaka nomu inuinui na ituvaki dredre. E yalataka na iVolatabu: “O koya e vakarorogo vua na [Kalou] ena tikovinaka, ena vakacegu ni sega ni rerevaka na ka ca.” (Vosa Vakaibalebale 1:33) Kena ivakaraitaki, o Margaret e tiko mai Ositerelia, e vakayalia ena cagilaba na ka kece e taukena. Ia e sega ni vakayalolailaitaki koya qori, e vulica ga kina ni na rawarawa noda vakayalia na ka eda taukena. Tekivu mai na gauna qori sa vakaliuca ga na ka e bibi, ya nona vuvale, itokani, nona veiwekani kei na Kalou, kei na inuinui e volai ena iVolatabu.—Same 37:34; Jemesa 4:8.

 Na inuinui cava e tu ena iVolatabu me baleti keda na kawatamata?

E yalataka tu na inuinui totoka me baleta na kawatamata kei na vuravura. Sa voleka sara ni yaco qori. Na veika e yaco tu e vuravura nikua, e dusia nida sa bula tiko ena “iotioti ni veisiga.” (2 Timoci 3:1-5) Sa vakarau liutaka na Kalou na vuravura, ena vakaotia tale ga na veika tawadodonu kei na rarawa. Ena cakava qori ni vakayagataka na Matanitu ni Kalou. (Taniela 2:44; Vakatakila 11:15) Qori na matanitu vakalomalagi e vakaibalebaletaka tiko o Jisu ni cavuta: “Me yaco mai na nomuni Matanitu. Me caka na lomamuni e vuravura.”—Maciu 6:9, 10.

E matata na ka e kaya na iVolatabu me baleta na inaki ni Kalou ina kawatamata. Qo eso na leqa ena vakaotia na Matanitu ni Kalou:

  • Sa na oti na viakana. “Ena solia mai o vuravura na vuana.”—Same 67:6.

  • Sega na tauvimate. “Ena sega ni kaya e dua na lewenivanua: ‘Au tauvimate’.”—Aisea 33:24.

  • Sega na mate. Na Kalou “ena qusia tani tale ga na wainimata kece mai na matadra [na tamata], sa na sega tale na mate, na lolosi, na tagiyaso, kei na mosi. Sa oti na veika e dau yaco e liu.”—Vakatakila 21:3, 4.

^ para. 1 Nida nuitaka e dua na ka, eda na vinakata da qai vakabauta nida na rawata. Na inuinui tale ga e rawa ni vakaibalebaletaka e dua na ka eda vakanamata tu kina.

^ para. 5 E tukuni ena iVolatabu na yaca ni Kalou o Jiova.—Same 83:18.