Raica sara na lewena

Na Website ni iVakadinadina i Jiova

Digia na Vosa vakaViti

Era na Bula e Lomalagi na Manumanu?

Era na Bula e Lomalagi na Manumanu?

Kena isau vakaivolatabu

E kaya na iVolatabu ni veika buli kece era tu e vuravura, e vakaiyalayala ga na kedra iwiliwili na tamata era na lai bula e lomalagi. (Vakatakila 14:1, 3) Era na veiliutaki vakatui, mera bete tale ga kei Jisu e lomalagi. (Luke 22:28-30; Vakatakila 5:9, 10) E dua na iwiliwili levu ni tamata era vakaturi mera bula ena vuravura parataisi.—Same 37:11, 29.

E tiko na vuna vinaka e kaya kina na iVolatabu ni sega ni ganiti ira na manumanu na bula e lomalagi. E sega ni rawa nira cakava na ivakatagedegede mera ‘kacivi kina i lomalagi.’ (Iperiu 3:1) Qori e okati kina nodra vulica, vakabauta, qai muria na ivakaro ni Kalou. (Maciu 19:17; Joni 3:16; 17:3) Na tamata ga e buli mera bula tawamudu.—Vakatekivu 2:16, 17; 3:22, 23.

Ena vinakati mera vakaturi na tamata mera qai lai bula e lomalagi. (1 Korinica 15:42) E tukuni ena iVolatabu e vica na veivakaturi. (1 Tui 17:17-24; 2 Tui 4:32-37; 13:20, 21; Luke 7:11-15; 8:41, 42, 49-56; Joni 11:38-44; Cakacaka 9:36-42; 20:7-12) E vakamacalataki tiko kina o ira na tamata, sega ni manumanu

Cava e yaco ni mate na manumanu?

 E kaya na iVolatabu ni tautauvata ga nona rai na Kalou me baleta na bula ni manumanu kei na tamata. (Tiko Voli Mai na Lekutu 31:28) E rua na ka e okati kina: na “kuvu ni qele” kei “na icegu ni bula.”—Vakatekivu 2:7.

E kaya tale ga na iVolatabu ni na mate na manumanu kei na tamata. (Vunau ni Soro 21:11; Isikeli 18:20) Era na suka tale mera kuvu ni qele. (Dauvunau 3:19,20) Kena ibalebale, era na sega ni bula tale tiko. *

Me ikuri ni vakamacala, raica na wase 6 ni vola Na Cava Eda Vulica ena iVolatabu?

Era valavala ca na manumanu?

 Sega. Na valavala ca e kena ibalebale na vakasama, vakila se cakava e dua na ka e beci kina na ivakatagedegede ni Kalou. Me dua e lai valavala ca ena vinakati me vakatulewa dodonu qori na ka era lekata na manumanu. Nira muria ga na itovo era sucu kaya mai. (2 Pita 2:12) Era na mate tale ga, ke sega mada ga nira valavala ca.

E dodonu mera vakalolomataki na manumanu ena sala voravora?

 Sega. Na Kalou e solia vei ira na tamata na dodonu mera lewai ira na manumanu, ia mera kua ni vakalolomataki ira. (Vakatekivu 1:28; Same 8:6-8) E kauaitaka na Kalou nodra bula yadua na manumanu, wili kina na manumanuvuka lalai. (Jona 4:11; Maciu 10:29) E vakaroti ira nona dauveiqaravi mera dau nanumi ira na manumanu.—Lako Yani 23:12; Vakarua 25:4; Vosa Vakaibalebale 12:10.

^ para. 11 Me ikuri ni vakamacala, raica wase 6 ni ivola Na Cava Eda Vulica ena iVolatabu?