Raica sara na lewena

Na Website ni iVakadinadina i Jiova

Digia na Vosa vakaViti

E Tautauvata na Lotu Kece? E Vakadonuya Kece na Kalou?

E Tautauvata na Lotu Kece? E Vakadonuya Kece na Kalou?

Kena iSau Vakaivolatabu

Sega, e duidui na lotu. E tu ena iVolatabu e levu na ivakaraitaki ni lotu e sega ni taleitaka na Kalou. Era umani kece ena rua na iwasewase qo.

Kena imatai: Sokaloutaka na kalou lasu

E volai ena iVolatabu na vosa me vaka na “ka lasu,” “ka wale,” kei na “tawayaga” me vakamacalataka na sokaloutaki ni kalou lasu. (Jeremaia 10:3-5; 16:19, 20) Na Kalou o Jiova * e vakarota na matanitu makawa o Isireli: “Me kua ni dua tale na nomu kalou, o yau duadua ga.” (Lako Yani 20:3, 23; 23:24) E “waqa na cudru i Jiova” nira sokaloutaka na Isireli na kalou tani.”​—Tiko Voli Mai na Lekutu 25:3; Vunau ni Soro 20:2; Dauveilewai 2:13, 14.

E sega ni veisau na rai ni Kalou me baleta na kena sokaloutaki na veika e ‘vakatokai me kalou.’ (1 Korinica 8:5, 6; Kalatia 4:8) E vakaroti ira na via sokaloutaki koya mera kua ni veitokani kei ira na lotu lasu, e kaya: “Ni lako tani mai na kedra maliwa, ni tawasei kemuni.” (2 Korinica 6:14-17) Na cava e vakarota kina meda cakava qori ke tautauvata na lotu kece ra qai qaravi koya?

Kena ikarua: iVakarau ni sokalou e sega ni vakadonuya

Ena so na gauna, era sokalou na Isireli nira muria na vakabauta kei na ivakarau era muria na qarava na kalou lasu, ia e cata qo o Jiova nira bosoka vata na lotu dina kei na lotu lasu. (Lako Yani 32:8; Vakarau 12:2-4) E cudruvi ira na iliuliu ni lotu ena nona gauna o Jisu ena ivakarau ni nodra sokalou ni vakarairai qai veivakaisini, era “sega ni kauaitaka na veika bibi ena Lawa me vaka na lewadodonu, loloma, kei na yalodina.”​—Maciu 23:23.

E va tale ga qori ena gauna qo, na lotu ga e yavutaki ena ka dina e vakadonuya na Kalou. Na ka dina qori e tiko ena iVolatabu. (Joni 4:24; 17:17; 2 Timoci 3:16, 17) Na lotu e sega ni duavata kei na ka e tukuna na iVolatabu e vakacalai ira na lewenivanua mera kua ni qarava na Kalou. Levu na ivakavuvuli e nanumi ni yavutaki ena iVolatabu, me vaka na Letoluvakalou, na kena bula tiko e dua na ka ni sa mate e dua, kei na veivakararawataki tawamudu, e yavutaki mai na sokalou lasu. E “tawayaga” se ka wale na lotu e tokona na ivakavuvuli qori, ni ivakavuvuli ga vakatamata, sega ni ka e vinakata na Kalou.​—Marika 7:7, 8.

E cata na Kalou na lotu e veivakaisini. (Taito 1:16) Meda veiwekani vinaka kei na Kalou, e bibi me laurai ena noda bula na ka eda vakabauta, sega ni vagauna ga. Kena ivakaraitaki, e kaya na iVolatabu: “Ke dua e nanuma ni sa qarava tiko na Kalou ena iqaraqaravi e vakadonuya o koya ia e sega ni lewa vinaka na yamena, e vakaisina tiko ga na lomana, e tawayaga tale ga nona lotu. E va qo na lotu e savasava qai sega ni dukadukali ena mata ni noda Kalou na Tamada: meda qaravi ira na luveniyali kei ira na yada era rarawa tu, meda qarauna tale ga me kua ni tauvi keda na duka ni vuravura.” (Jemesa 1:26, 27) E volai ena Ai Vola Tabu na vosa “lotu savasava” me dusia na sokalou e sega ni tauvi duka, e sega ni veivakaisini.

^ para. 5 E tukuni ena iVolatabu ni yaca ni Kalou dina o Jiova.