Raica sara na lewena

Na Website ni iVakadinadina i Jiova

Digia na Vosa vakaViti

E Cala na Gunu Alakaolo? Na Cava e Kaya na iVolatabu?

E Cala na Gunu Alakaolo? Na Cava e Kaya na iVolatabu?

Kena isau vakaivolatabu

E sega ni cala ke da gunuva vakalailai na alakaolo. E kaya na iVolatabu ni waini e isolisoli ni Kalou me marautaki kina na bula. (Same 104:14, 15; Dauvunau 3:​13; 9:7) E tukuni tale ga ena iVolatabu ni wainimate tale ga na waini.​—1 Timoci 5:​23.

A gunu waini o Jisu ni bula voli e vuravura. (Maciu 26:29; Luke 7:​34) Ena dua na cakamana kilai levu i Jisu, a vukica na wai me waini me nona iloloma ena dua na kana magiti ni vakamau.​—Joni 2:​1-​10.

Rerevaki ni Gunu Sivia

E tukuni ena iVolatabu ni yaga na waini, ia e vakacala na gunu sivia kei na mateni. Na lotu vaKarisito gona e vinakata me gunu alakaolo, e dodonu me gunuva ga vakalailai. (1 Timoci 3:8; Taito 2:​2, 3) E vakamacalataki ena iVolatabu na vuna meda kua kina ni gunu sivia.

O na kila vakacava ni sa sivia na ka o gunuva?

O koya e sa sivia na alakaolo e gunuva, e rawa ni cakava na ka e leqataki kina nona bula kei na nodra bula eso tale. E sega ni qai mateni ga e dua ke sa sega sara ga ni vakilai koya. E kaya na iVolatabu ni rawa ni kilai tale ga ni sa mateni e dua ena nona itautaubale, ke sa veilecayaki nona vakasama, e taceba, vakavuveiba, se sa sega ni kilai na cava e kaya. (Jope 12:25; Same 107:27; Vosa Vakaibalebale 23:29, 30, 33) Ke sega mada ga ni lai tini sara ena mateni, e se rawa ga ni ‘gunu sivia’ e dua qai sotava kina e levu na leqa.​—Luke 21:34, 35.

Kua ni gunu

E vakamacalataki tale ga ena iVolatabu na ituvaki me kua ni gunu alakaolo kina na lotu vaKarisito:

  • Ke veivakatarabetaki na alakaolo.​—Roma 14:21.

  • Ke vakatabui na alakaolo ena dua na vanua.​—Roma 13:1.

  • Ke dredre me lewa vinaka e dua na levu ni ka e gunuva. Ena vinakati mera cakava eso na veiveisau levu o ira era bobula ina alakaolo.​—Maciu 5:​29, 30.