Raica sara na lewena

Na Website ni iVakadinadina i Jiova

Digia na Vosa vakaViti

E Bula Tiko na Kalou?

E Bula Tiko na Kalou?

Kena isau Vakaivolatabu

Io, e tiko na ivakadinadina ena iVolatabu ni bula tiko na Kalou. Qo e uqeti keda meda vakabauta na Kalou, eda sega ni vakabauta na veika era tukuna na veimatalotu, ia nida vakayagataka noda “vakasama” kei na noda “yalomatua.” (Roma 12:1; 1 Joni 5:​20) Raica eso na kena ivakaraitaki e yavutaki ena iVolatabu:

  • Na vakasakiti ni kena tuvai vakamatau na noda vuravura e vakaraitaka ni tiko e dua e bulia. E kaya na iVolatabu: “E macala gona ni tiko o koya e tara na vale yadua, ia o koya e tara na ka kece ga na Kalou.” (Iperiu 3:4) E matata vinaka na tikina qori, ia e dredre mera vakabauta e levu era vuli vinaka. *

  • Nida tamata ga, e tiko vei keda na gagadre meda via kila na inaki ni bula, ena rawa ni tiko ga na gagadre qori ke sega ni saumi noda lomatarotaro. Qo na ka e vakatoka na iVolatabu me “bula vakayalo,” noda via kila na Kalou da qai via qaravi koya. (Maciu 5:3; Vakatakila 4:​11) Na bula vakayalo qo e sega wale ga ni vakaraitaka ni bula tiko na Kalou, e vakaraitaka tale ga ni Kalou dauloloma e vinakata me vakaceguya na noda gagadre qori.​—Maciu 4:4.

  • E volai vakamatailalai na parofisai kece ena iVolatabu ena veisenitiuri sa oti qai yaco dina me vaka ga e tukuni. Na donu kei na matailalai ni itukutuku e parofisaitaki qori, e vakadeitaka ni vakavuna e dua e kaukaua sara.​—2 Pita 1:​21.

  • Era kila na dauvolaivolatabu na veika vakasaenisi, ni vakatauvatani kei na nodra itokani. Me kena ivakaraitaki, era vakabauta e levu ena gauna makawa ni tabea tiko na vuravura e dua na manumanu, me vaka na elefaniti, vuaka ni veikau, se na bulumakau. Ia e veibasai kei na ka e tukuna na iVolatabu, ni Kalou e “vakaliliga wale tu na vuravura.” (Jope 26:7) E vakamatatataka tale ga na iVolatabu ni noda vuravura e “mokimokiti.” (Aisea 40:22) Era vakabauta e levu ni veivuke ga ni Kalou era kila rawa kina na dauvolaivolatabu na itukutuku qori.

  • E sauma na iVolatabu e levu na taro dredre, na mataqali taro e rawa ni vakavuna me sega ni vakabauta kina e dua ni bula tiko na kalou, ni sega ni lomavakacegu ena isaunitaro e tukuni vua. Me kena ivakaraitaki: Ke dauloloma qai kaukaua duadua na Kalou, na cava ga e yaco tiko kina na rarawa kei na ca e vuravura? Na cava e tukuni kina ni dau vakavuna na ca o lotu?​—Taito 1:​16.

^ para. 4 Kena ivakaraitaki, a tukuna ena dua na gauna o Allan Sandage e dau dikeva na maliwalala: “E dredre meu vakabauta ni yaco vakacalaka na kena tuvai vakamatau na veika e maliwalala. E dua na ka e tuvai ira. Au sega ni vakamacalataka rawa nona tiko na Kalou, ia na Kalou ga ena rawa ni vakavuna na kena tu na ka kece qo.”