Raica sara na lewena

Na Website ni iVakadinadina i Jiova

Digia na Vosa vakaViti

O Cei ena Lai Bula i Lomalagi?

O Cei ena Lai Bula i Lomalagi?

Kena iSau Vakaivolatabu

Era na vakaturi ina bula i lomalagi e dua na iwiliwili lailai ni lotu vaKarisito yalodina e digitaki ira na Kalou. (1 Pita 1:3, 4) Na gauna ga era digitaki kina, era na saga tiko ga mera vaqaqacotaka nodra vakabauta qai muria na ivakarau ni bula vaKarisito savasava me kua kina nira vakayalia na icovi ni bula i lomalagi.​—Efeso 5:5; Filipai 3:12-14.

Na cava era na cakava o ira na lai bula i lomalagi?

Era na veiliutaki vakatui, vakabete tale ga kei Jisu me 1,000 na yabaki. (Vakatakila 5:9, 10; 20:6) Era na tauyavutaka na “lomalagi vou,” se matanitu vakalomalagi, ena lewa na “vuravura vou,” se na kawatamata e vuravura. O ira na veiliutaki qori era na veivuke ena kena vakalesui mai na bula uasivi a nakita taumada na Kalou.​—Aisea 65:17; 2 Pita 3:13.

Era le vica era na vakaturi i lomalagi?

E tukuna na iVolatabu nira na vakaturi i lomalagi e le 144,000. (Vakatakila 7:4) Ena raivotu e volatukutukutaki ena Vakatakila 14:1-3, e raica na yapositolo o Joni “na Lami ni tucake tu e Ulu i Saioni, era tucake vata tu kei koya e 144,000.” Ena raivotu qori, “na Lami” e vakatakarakarataka na vakaturi i Jisu. (Joni 1:29; 1 Pita 1:19) Na “Ulunivanua o Saioni” e vakatakarakarataka na itutu lagilagi i Jisu kei ira na le 144,000 era na veiliutaki kei koya i lomalagi.​—Same 2:6; Iperiu 12:22.

O ira “na kacivi, era digitaki” mera veiliutaki kei Karisito ena Matanitu era vakatokai mera “qelenisipi lailai.” (Vakatakila 17:14; Luke 12:32) E dusia qori nira le vica ga ni vakatauvatani kei na iwiliwili taucoko ni sipi i Jisu.​—Joni 10:16.

Rai cala me baleti ira na lai bula i lomalagi

Rai cala: Era na lai bula kece i lomalagi na tamata vinaka.

Ka Dina: E yalataka na Kalou nira na rawata na bula tawamudu ena vuravura qo e levu na tamata vinaka.​—Same 37:11, 29, 34.

  • E kaya o Jisu: “Se sega ni dua na tamata e lako cake i lomalagi.” (Joni 3:13) E kaya tale ga ni o ira na tamata vinaka era mate se bera nona gauna me vakataki Eparama, Mosese, Jope, kei Tevita era sega ni lai bula i lomalagi. (Cakacaka 2:29, 34) Ia eratou nuitaka tu na veivakaturi ena bula e vuravura.​—Jope 14:13-15.

  • E vakatokai na veivakaturi ina bula i lomalagi me “imatai ni veivakaturi.” (Vakatakila 20:6) Qori e vakaraitaka ni na dua tale tiko na veivakaturi, oya nodra vakaturi o ira na bula ena vuravura qo.

  • E kaya na iVolatabu ni gauna ena veiliutaki kina na Matanitu ni Kalou sa “na sega tale na mate.” (Vakatakila 21:3, 4) Na yalayala qori ena vakayacori ga e vuravura ni sega na mate e lomalagi.

Rai cala: Eda na dui digia ga keda via lai bula i lomalagi se i vuravura.

Ka Dina: Na Kalou ga e digia na lotu vaKarisito yalodina e rawata “na icovi ni veikacivi . . .i lomalagi,” oya na inuinui ni bula i lomalagi. (Filipai 3:14) E sega ni vakatau nona digitaki e dua ena nona gagadre se nona rawaka me lai bula i lomalagi.​—Maciu 20:20-23.

Rai cala: Na inuinui ni bula tawamudu e vuravura e nodra ga o ira era sega ni rawata na bula i lomalagi, se o ira era lolovira.

Ka Dina: E vakatokai ira na bula tawamudu ena vuravura qo na Kalou me “noqu tamata,” “o ira au digitaka,” kei ira e vakalougatataka o Jiova.” (Aisea 65:21-23) Era na vakayacora lesi ena itavi ni kena vakalesui mai na inaki taumada ni Kalou me baleta na kawatamata oya mera bula tawamudu qai uasivi ena vuravura parataisi.​—Vakatekivu 1:28; Same 115:16; Aisea 45:18.

Rai cala: O ira na 144,000 era tukuni ena Vakatakila era sega ni wiliwili dina, era vakatakarakara ga.

Ka Dina: Eso na iwiliwili era cavuti ena Vakatakila era ivakatakarakara ga, eso tale era iwiliwili dina. Kena ivakaraitaki, “na yacadratou na 12 na yapositolo ni Lami.” (Vakatakila 21:14) Dikeva na ivakadinadina ni sega ni vakatakarakara na kedra iwiliwili na le 144,000.

Ena Vakatakila 7:4 e tukuni kina “na kedra iwiliwili na dregati [se o ira e vakadeitaki nira na lai bula i lomalagi], era le 144,000.” Ena ikotokoto tarava ni tikinivolatabu qori, e vakaduiduitaka na iwiliwili qori ina ikarua ni ilawalawa: “e dua na isoqosoqo levu, e sega ni dua na tamata e wilika rawa.” O ira na “isoqosoqo levu” qori era na rawata na bula e vakarautaka na Kalou. (Vakatakila 7:9, 10) Ena sega ni kilai na kedrau duidui na isoqosoqo levu kei ira na lai bula i lomalagi ke ivakatakarakara ga na 144,000 se sega ni dua na kena iwiliwili matata. *

Kuria ya ni o ira na le 144,000 era “voli mai ena kedra maliwa na kawatamata mera isevu.” (Vakatakila 14:4) Na matavosa “isevu” e dusia e dua na iwiliwili era digitaki. E dusi ira na lai veiliutaki kei Karisito i lomalagi mera lewai ira e dua na iwiliwili levu era na bula e vuravura.​—Vakatakila 5:10.

^ para. 21 E duavata o Parofesa Robert L. Thomas ena iwiliwili ni le 144,000 ena Vakatakila 7:4 ni kaya: “E iwiliwili dina qori ni vakatauvatani ina isoqosoqo levu e vakamacalataki ena Vakatakila 7:9. Ke ivakatakarakara na iwiliwili ni le 144,000, ena va tale ga qori na vo ni iwiliwili era cavuti ena ivola.”​—Revelation 1-7: An Exegetical Commentary, tabana e 474.