Raica sara na lewena

O Cei na Agilosi Turaga o Maikeli?

O Cei na Agilosi Turaga o Maikeli?

Kena isau vakaivolatabu

Eso na lotu e vakatokai Maikeli me o “Sanito Maikeli”(Saint Michael). Na yaca qori a vakatokai kina o Jisu ni bera ni mai bula e vuravura kei na nona lesu i lomalagi. * Kena ivakaraitaki, rau veiba o Maikeli kei Setani ni oti na mate i Mosese qai vukea e dua na agilosi me kauta na itukutuku ni Kalou vua na parofita o Taniela. (Taniela 10:13, 21; Juta 9) E vakaraitaka vinaka o Maikeli na ibalebale ni yacana​—“O Cei e Vaka na Kalou?”​—ni dau tutaka na veiliutaki ni Kalou qai valuti ira na meca ni Kalou.​—Taniela 12:1; Vakatakila 12:7.

Dikeva mada eso na vuna e vakatokai Jisu kina na agilosi Turaga me o Maikeli.

  • Maikeli na “agilosi Turaga.” (Juta 9) Na icavuti “agilosi turaga,” e kena ibalebale na nodra turaga na agilosi kece,” e rua ga na vanua e laurai kina ena iVolatabu. Ena ikotokoto ruarua qori e dusia tiko ga e dua na tamata, e vakaraitaka tale ga ni sega ni dua tale erau wasea na icavuti qori. E dua na tikinivolatabu qori e vakaraitaka nona vakaturi oti na Turaga o Jisu e “lako sobu mai lomalagi. . . qai veivakaroti ena domo ni agilosi turaga.” (1 Cesalonaika 4:​16) E tu vei Jisu na “domo ni agilosi turaga” ni o koya ga na agilosi turaga o Maikeli.

  • E veivakaroti o Maikeli vei ira na mataivalu ni agilosi. O “Maikeli kei ira na nona agilosi era vala kei na gata levu,” o Setani. (Vakatakila 12:7) E soli tale ga vei Maikeli na lewa i lomalagi, ni vakatokai me “dua vei ira na turaga levu” kei “na turaga levu.” (Taniela 10:13, 21; 12:1) Na icavuti qori vei Maikeli e tautauvata kei na ka e tukuna o David E. Aune na dauvakadidike ni Veiyalayalati Vou, me “nodra peresitedi na mataivalu agilosi.”

    Na iVolatabu e cavuta e dua tale na yaca e lewai ira tu na mataivalu agilosi. E vakamacalataka na kena “vakatakilai mai lomalagi na Turaga o Jisu kei ira na nona agilosi kaukaua ena yameyame ni bukawaqa, ena qai totogitaki ira.” (2 Cesalonaika 1:​7, 8; Maciu 16:27) Nona “gole i lomalagi o Jisu, era sa vakamalumalumutaki kece vua na agilosi, na veiliutaki, kei na lewa.” (1 Pita 3:​21, 22) Ena cala ke tukuni ni rau valataka voli o Jisu kei Maikeli na itutu me lewai ira na agilosi. Ia ena donu na vakasama ni tukuni ni o Jisu kei Maikeli e vakaibalebaletaka tiko ga e dua na tamata.

  • Ena “tucake” o Maikeli ena “gauna ni rarawa” e se bera vakadua ni bau vakilai. (Taniela 12:1) Na vosa “tucake” ena ivola i Taniela e dau vakayagataki vakalevu vua e dua na tui e vakarau cakava e dua na ka. (Taniela 11:​2-4, 21) E vakatokai o Jisu Karisito ena yaca “Na Vosa ni Kalou.” Me vaka ni “nodra Tui na tui” ena vakayacora na itavi bibi ni nodra vakarusai na meca ni Kalou qai taqomaki ira na tamata ni Kalou. (Vakatakila 19:11-​16) Ena cakava qori ena gauna ni “veivakararawataki levu ena ivakatagedegede e sega ni bau vakilai vakadua mai na ivakatekivu kei vuravura.”​—Maciu 24:21, 42.

^ para. 3 E levu tale na yaca era vakatokai kina e levu ena iVolatabu, me vakataki Jekope (a kilai tale ga me o Isireli), o Pita (me o Saimoni), kei Cateo (me o Jutasa).​—Vakatekivu 49:​1, 2; Maciu 10:​2, 3; Marika 3:​18; Cakacaka 1:​13.