Raica sara na lewena

Era Vakabauta na Vuku ni a Bula Dina o Jisu?

Era vakabauta na vuku ni a bula dina o Jisu qai tiko nodra yavu vinaka. E vola na Encyclopædia Britannica, ilavelave ni 2002 me baleta na nodra dau tukuni Jisu kei ira na lotu vaKarisito taumada na daunitukutuku makawa ena imatai kei na ikarua ni senitiuri: “E laurai mai na nodra ivolatukutuku nira sega mada ga ni vakatitiqataka na meca ni lotu vaKarisito ni a bula dina o Jisu qai tekivu veiletitaki ga na usutu qo ena icavacava ni ika18 ni senitiuri, loma ni ika19 ni senitiuri kei na itekitekivu ni ika20 ni senitiuri, ia a sega na yavu vinaka ni nodra vakalelewa.”

E volai ena ivola Jisu kei na ka e Kune ena Vakekeli (Jesus and Archaeology) ena 2006: “Sega ni dua na vuku nikua e vakatitiqataka ni a bula dina e dua na Jiu na yacana o Jisu na luvei Josefa; levu era vakadinadinataka nida kila vinaka eso na ka me baleta na ka a cakava kei na nona ivakavuvuli e kilai levu.”

Na iVolatabu e vakaraitaki Jisu me dua na tamata a bula dina. E vakaraitaka na yacadra na nona kawa kei na nona vuvale voleka. (Maciu 1:1; 13:55) E tukuna tale ga na yaca i ira na iliuliu ena gauna oya. (Luke 3:1, 2) Na itukutuku matailalai qori e rawa kina mera vakadinadinataka na dauvakadidike ni donu vinaka na ivolatukutuku ena iVolatabu.