Raica sara na lewena

Vakacava sa Tukuna Rawa tu na iVolatabu Nodra iVakarau ni Bula na Tamata ena Gauna Qo?

Vakacava sa Tukuna Rawa tu na iVolatabu Nodra iVakarau ni Bula na Tamata ena Gauna Qo?

Kena isau vakaivolatabu

Io, sa parofisaitaka tu na iVolatabu ni na qai torosobu ga nodra itovo, kei na ka era vakasamataka na tamata ena gauna qo. Qori e dusia ni levu era na sega ni taleitaka na itovo vinaka, era na sega tale ga ni duavata. * (2 Timoci 3:1-5) Ia e kaya tale ga na iVolatabu, eso era na sega ni vakatotomuria nodra itovo ca e levu. Ena veivuke ga ni Kalou era na vorata na veivakamuai cala, era na vulica tale ga me salavata kei na loma ni Kalou na ka era vakasamataka kei na ka era cakava.—Aisea 2:2, 3.

Ena ulutaga qo

 Cava e parofisaitaka na iVolatabu me baleta nodra ivakarau ni bula na tamata ena gauna qo?

E vakamacalataka na iVolatabu ni levu ena ca na nodra itovo kei na nodra ivakarau. E vu kece qori ena nodra nanumi ira ga. Era na “sega ni lewa vinaka na yalodra,” era na “dau lomani ira ga,” era na “lomana ga na marau era sega ni lomana na Kalou.”—2 Timoci 3:2-4.

E vakadinadinataki ena parofisai qori ni levu nikua era nanumi ira ga, era cakava ga na ka me yaga vei ira, na ka ga mera marautaka, kei na ka era nanuma ni na vakainaki kina nodra bula, kei na so tale na ka. Io, e levu nikua era sa qai nanumi ira ga. Qori e vakavuna mera “sega ni vinakata na ka e dodonu,” ra qai cata na itovo vinaka. Era ‘sega tale ga ni dau vakavinavinaka.’ Ya na nodra sega ni vakavinavinakataka na ka era taukena, se na ka e caka vei ira.—2 Timoci 3:2, 3.

Na yalo ni nanumi koya ga, e uqeta eso tale na itovo ca sa parofisaitaka tu na iVolatabu ni na yaco nikua:

  • Kocokoco. Levu “era na lomana na ilavo.” Era nanuma ni na vinaka nodra bula ke levu nodra ilavo, kei na iyau.—2 Timoci 3:2.

  • Dokadoka. Levu era na “dau tukutukuni ira, era na qaciqacia,” ra qai “dokadoka.” (2 Timoci 3:2, 4) Era na dau tukutukuni ira ena ka era cakava, nodra itovo se nodra iyau.

  • Dau vakaucaca. Levu nikua era “dau veibeci,” qai “dau vakauvosa.” (2 Timoci 3:2, 3) Qori e rawa ni vakaibalebaletaki ira na vosa vakacacataka, se ra tukuna na veika lasu me baleta na tamata se Kalou.

  • Yalokaukaua. E levu era na “sega ni yalodina, era na sega ni via okati ena dua na veiyalayalati, dau veiliumuritaki,” ra qai “domoqa.” (2 Timoci 3:2-4) Ena laurai qori nira yalodredre, era na sega ni via walia na leqa, se mera cakava na ka era yalataka.

  • iTovo kaukaua. Levu nikua “era na voravora,” era dau cudru totolo ra lai cakava kina eso na ka vakadomobula.—2 Timoci 3:3.

  • iValavala tawadodonu. E tukuna o Jisu ni na “tubu na ivalavala tawadodonu” ena noda gauna. (Maciu 24:12) E kaya ni na levu tale ga na “tikoyavavala.”—Luke 21:9.

  • Sega na veilomani ena vuvale. O ira na “talaidredre vei ira nodra itubutubu” ra qai ‘sega ni veilomani vakaveiwekani,’ era sa sega ni kauaitaki ira na wekadra. Era cakava tale ga na itovo torosobu, kei na itovo kaukaua ena nodra vuvale.—2 Timoci 3:2, 3.

  • Veivakaisini nodra lotu. Levu e “vakarairai ga na nodra qarava na Kalou.” (2 Timoci 3:5) Era sega ni via muria na ka e vinakata na Kalou, era cakava ga na ka era via rogoca vei ira na iliuliu ni lotu.—2 Timoci 4:3, 4.

 Ena tarai ira vakacava eso tale na nodra nanumi ira ga e levu?

Ni levu era nanumi ira ga, era lai lomabibi kina eso tale ra qai nuiqawaqawa. (Dauvunau 7:7) Kena ivakaraitaki, eso era dau lawaki nira lomana na ilavo. Levu era sega ni dauloloma era rawa ni vakalolomataki ira na wekadra, vakavuna mera lomabibi kina ra qai via vakamatei ira. E dau dredre vei ira na vakalolomataki mera guilecava na ka ca e caka vei ira.

 Cava sa qai torosobu ga kina na itovo ni tamata?

E kaya na iVolatabu na vuna sa qai torosobu kina nodra itovo na tamata:

  • Lailai nodra lomana na Kalou, kei na wekadra. (Maciu 24:12) Levu gona era nanumi ira ga.

  • E vagalalataki mai lomalagi o Setani na Tevoro, qai biu sobu mai vuravura. (Vakatakila 12:9, 12) Tekivu mai na gauna qori, sa rawai ira e levu mera dau nanumi ira ga.—1 Joni 5:19.

 Cava meda cakava ni ca nodra itovo eso tale?

E kaya na Vosa ni Kalou: “Lako tani mai vei ira e va qo na nodra ivakarau.” (2 Timoci 3:5, Easy-to-Read Version) E sega ni kena ibalebale qori meda vakayawaki keda mai vei ira eso tale. Ia meda kua ni veitokani kei ira era nanumi ira ga, ra qai sega ni vakabauta na Kalou.—Jemesa 4:4.

 Vakacava ena ca na itovo ni tamata kece?

Sega. Ni kaya na iVolatabu eso “era rarawataka, era vutugutaka na ka vakasevaki kece e vakayacori tiko.” (Isikeli 9:4) Era sega ni nanumi ira ga, ra qai vakalaiva me dusimaki ira na ivakatagedegede ni Kalou. Ena kilai ena nodra ivosavosa, kei na nodra itovo nira duidui mai vei ira na vo ni tamata. (Malakai 3:16, 18) Kena ivakaraitaki, era na saga mera dauveiyaloni kei ira na tamata kece ga, era na sega tale ga ni vakaitavi ena ivalu kei na itovo kaukaua.—Maika 4:3.

 Ena lai ca sara na itovo ni tamata qai yaco tu ga na tikoyavavala?

Sega. Ena sega ni yaco tu ga na duiyaloyalo kei na itovo kaukaua. Ia na Kalou ena vakarau vakarusai ira na sega ni muria tiko nona ivakatagedegede. (Same 37:38) Ena vakarautaka na “vuravura vou,” se na ilawalawa tamata vou ena vuravura qo, ra qai bula kina me tawamudu na yalomalumalumu . (2 Pita 3:13; Same 37:11, 29) Na inuinui qo e sega ni tadra wale ga. Ena gauna mada ga qo, na iVolatabu sa vukei ira e levu mera veisautaka nodra bula, me salavata kei na ivakatagedegede dodonu ni Kalou.—Efeso 4:23, 24.

^ para. 1 E vakaraitaka na iVolatabu, kei na ka e yaco tu e vuravura nikua nida sa donuya tu na “iotioti ni veisiga.” Ena vakilai kina e levu na ka “dredre,” kei na veika “rerevaki.” (2 Timoci 3:1; King James Version) Me ikuri ni vakamacala, raica na ulutaga “Na Cava na iVakatakilakila ni ‘iOtioti ni Veisiga’ se na ‘iVakataotioti’?