Raica sara na lewena

Tokona na iTukutuku Vakaivolatabu na Droini Ceuti e Ijipita Makawa

Tokona na iTukutuku Vakaivolatabu na Droini Ceuti e Ijipita Makawa

E 26 na fiti na balavu ni droini ceuti me baleta na kalou o Amun e Karnak, qai toka volekata na icurucuru ni valenisoro e Ijipita makawa. Era kaya na dauvakadidike na droini qori e vakaibalebaletaka nona ravuravu o Fero Sisaki ena vuaicake ni veivanua kei Ijipita, okati kina o Juta vaka kina na yasayasa vakanoca kei Isireli.

Laurai toka ena droini ceuti e Karnak na nodra kau tiko na kaivesu

E laurai ena droini ni soli ira tiko e sivia na le 150 o Amun, mera kau vakavesu vei Sisaki e kilai tale ga me o Sheshonk. * Na kaivesu yadua e matataka e dua na tauni e ravuti se o ira na matatamata. E ceuti rauni na yaca ni tauni e yagodra yadua na kaivesu. Eso na yaca se laurai vinaka tu ga, so tale era kila e levu na dauwili iVolatabu, me vakataki Pecisiani, Kipioni, Mikito, kei Sunemi.

E vakamacalataki ena iVolatabu nona ravuti o Juta. (1 Tui 14:25, 26) E vakamatatataki kina nona ravuravu o Sisaki. Eda wilika: “Ena ikalima ni yabaki i Tui Riopoami e mai valuti Jerusalemi o Tui Sisaki. . . . E 1,200 na nona qiqinivalu, e 60,000 na dauvodo ose, e sega ni wili rawa na sotia era tomani koya mai Ijipita . . . e ravuta na koro vakabai e Juta, e yaco sara i Jerusalemi.”—2 Veigauna 12:2-4.

Na droini qo e dua wale ga na ivakadinadina ni nona ravuravu o Sisaki ena yalava e Isireli. E dua tale na ivorovoro ni vatu ivakananumi a kune e Mikito, qo e dua na tauni e cavuti ena iVolatabu, qai ceuti toka kina “Sheshonk.”

Na itukutuku vakaivolatabu me baleta nona ravuravu o Sisaki e Juta, e dua ga na ivakaraitaki ni nodra dina na dauvola iVolatabu. Era vola sara ga vakadodonu na ravuravu ni nodra matanitu kei na nodra dau vakadrukai. Na nodra dau dina va qori e sega ni laurai vei ira eso tale na dauvolavola ena gauna makawa.

^ para. 3 Ni biu vakamatanivola ena iVolatabu na yaca “Sisaki,” e dusia na kena icavucavuti vakaIperiu.