Raica sara na lewena

A Bula Dina o Joni na Dauveipapitaisotaki?

A Bula Dina o Joni na Dauveipapitaisotaki?

E cavuti ena Kosipeli na kena itukutuku e dua na turaga o Joni na Dauveipapitaisotaki. A vunautaka na Matanitu ni Kalou e Jutia. Vakacava e dina na itukutuku vakaivolatabu me baleta na turaga qori? Dikeva mada qo:

  • E kaya na iVolatabu: “E vunau voli o Joni na Dauveipapitaisotaki ena vanua talasiga kei Jutia, e kaya: “Ni veivutuni, sa voleka na Matanitu vakalomalagi” (Maciu 3:1, 2) Vakacava e vakadinadinataki tale ga na itukutuku qori ena so tale na ivola? Io.

    E vakamacalataka na daunitukutuku makawa ena imatai ni senitiuri o Flavius Josephus, ni o “Joni e kilai tale ga me Dauveipapitaisotaki e dau vakasalataki ira na Jiu ena ivakarau ni bula mera muria,” oya “nodra vakaliuca na Kalou,” kei na “nodra papitaiso.”—Jewish Antiquities, Book XVIII.

  • E kaya tale ga na iVolatabu ni o Joni a vakadodonutaki Eroti Anitipasa na iliuliu ni yasayasa o Kalili kei Peria. E dau tukuna o Eroti ni dua na Jiu e muria tiko na Lawa. E vakalewai Eroti o Joni ni vakamautaka na wati tacina vakacabecabe o Erotiasa. (Marika 6:18) E vakadinadinataki na itukutuku qori ena so tale na ivola.

    E kaya o Josephus ni “domoni Erotiasa” o Anitipasa, qai “sega ni rere ni kerei koya me rau vakamau.” E vakadonuya o Erotiasa mani biuti watina me rau vakamau kei Anitipasa.

  • E vakamacalataka tale ga na iVolatabu nira “tabili vua [Joni] na kai Jerusalemi, o ira kece mai Jutia, kei ira kece ena yasayasa vakaJoritani, e qai papitaisotaki ira ena uciwai na Joritani.”—Maciu 3:5, 6.

    E tokona tale ga na vakamacala qori o Josephus, e vola ena nona ivola nira gole yani vei Joni e dua na “ilala levu,” qai “vakayaloqaqataki [se uqeti] ira nona ivunau.”

Ke sa vakadeitaka na daunitukutuku makawa o Josephus ni bula dina o Joni na Dauveipapitaisotaki, e dodonu tale ga meda vakadeitaka qori.