1. Kauaitaka na Veika o Vinaka Kina. (2 Korinica 11:6) E vinaka mo kila eso na nomu malumalumu, ia se levu ga na ka o rawa ni cakava. Ni o kila rawa na veika o vinaka kina ena vakanuideitaki iko, o na sega ni beci iko ga, o na sega tale ga ni galili. Tarogi iko mada, ‘Na cava au vinaka kina?’ Vakasamataka eso nomu taledi se itovo vinaka.

 2. Kauaitaki ira tale eso. Saga mo veikilai mada ga kei na dua se rua na tamata. E kaya o Jorge e dua na cauravou: “Nomu taroga se ra sa vakacava tiko se veika me baleta nodra cakacaka, o na kilai ira vinaka kina.”

 Vakatutu: Kua ni veitokani ga kei ira oni tabavata. Eso na ivakaraitaki ni veitokani vinaka era volai tu ena iVolatabu, e duidui nodra yabaki ni bula, me vakataki Ruci kei Neomai, Tevita kei Jonacani, Timoci kei Paula. (Ruci 1:16, 17; 1 Samuela 18:1; 1 Korinica 4:17) Nanuma na veivosaki e ka ni lewe rua, sega ni vosa tiko ga e dua. E dau taleitaki o ira na dau vakarorogo vinaka. Kua ni leqa ke o dau mamadua—o na sega ni vosa duadua tiko ena gauna ni veitalanoa!

 3. “Veikauaitaki.” (1 Pita 3:8) Ke o sega ni duavata kei na nona rai o koya vosa tiko, laiva mada ga me vosa. Veitalanoataka ga na tikina drau duavata kina. Ke o nanuma mo vakadodonutaki koya, cakava qori ena yalomalua kei na yalovinaka.

 Vakatutu: Vosa vei ira tale eso ena yalovinaka. Kua ni veiba tawayaga se veivakanini, se mo vakadonui iko ga vakataki iko. Era na taleitaki iko vakalevu ke o “vosa ena yalovinaka ena gauna kece.”—Kolosa 4:6.