Taro ni Galili

 Dina se Lasu

1.   Ke levu na nomu itokani, o na sega ni galili.

2.   Ke o vakayagataka na sala ni veikilai ena internet, o na sega ni galili.

3.   Ke o vakau itukutuku vakalevu, o na sega ni galili.

4.   Ke o caka vinaka vei ira eso tale, o na sega ni galili.

 Na vuna?

 Na ka dina me baleta na veitokani kei na galili

•   Ke levu nomu itokani, o se rawa tiko ga ni vakila na galili.

   “Au dau kauaitaki ira na noqu itokani, ia so na gauna au vakila nira sega ni kauaitaki au. E ikuri ni galili nira tiko nomu itokani ia era sega ni kauaitaki iko se lomani iko.”​—Anne.

•   Ke o vakayagataka mada ga na sala ni veikilai ena internet, o se rawa tiko ga ni vakila na galili.

   “So era saga me levu nodra itokani me vakarairai tu ga, era cakava qori mera kilai kina. Ni levu nomu itokani ena sala ni veikilai ena internet, o na sega ni vakila ni o lomani, ia o na galili vakalevu.”​—Elaine.

•   Ke o dau vakau itukutuku vakalevu, e se rawa tiko ga ni o vakila na galili.

   “Ni o galili ena so na gauna, o na vuki raica tiko ga ke dua nomu itokani e vakau itukutuku yani ena nomu talevoni. Ia ni sega ni dua nomu itokani e veitaratara yani, o na nanuma ni o sega ni kauaitaki!”​—Serena.

•   Ni o caka vinaka vei ira eso tale, se rawa tiko ga ni vakilai na galili.

   “Au dau vukei vei ira na noqu itokani, ia era sega ni dau cakava qori. Au sega ni veivutunitaka noqu dau caka vinaka vei ira, ia e dau vakavu lomatarotaro nira sega ni vakaraitaka na veikauaitaki.”​—Richard.

 Bibi me nanumi: Na galili e ivakarau ni noda rai “E vakaraitaka na ivakarau ni lomana e dua,” e kaya e dua na goneyalewa o Jeanette.

 Na cava o rawa ni cakava ke sega nomu itokani se o galili?

 Sala mo valuta kina

Mo kua ni beci iko.

 “Na galili e vu mai ena ka o dau lomaleqataka. E dredre mo saga me so nomu itokani, ke o dau beci iko qai nanuma nira na sega ni taleitaki iko eso tale.”​—Jeanette.

 E kaya na iVolatabu: “Mo lomana na kainomu me vaka nomu lomani iko.” (Kalatia 5:14) Mo dua na itokani vinaka, ena vinakati mo kua ni beci iko se dokadoka.​—Kalatia 6:​3, 4.

Kua ni lomalomani iko.

 “Na galili e vaka nomu tao tu ena vanua lolobo. Ke titobu na vanua e lobo kina na yavamu ena dredre nomu saga mo lako tani mai kina. Ni o lomalomani iko era na yawaki iko e levu, ena qai kuria ga nomu galili.​—Erin.

 E kaya na iVolatabu: “Na loloma. . . e sega ni kauaitaka ga na ka e baleti koya.” (1 Korinica 13:​4, 5) Nida kauaitaki keda ga, eda vakaraitaka nida sega ni veinanumi, ena dredre tale ga meda kunea e dua na itokani. (2 Korinica 12:15) Na kena dina qo: Ke o yavutaka na ka o cakava ena nodra rai eso tale, ena tawayaga na nomu sasaga! Koya gona ni o kaya “Sega ni dua e qiriti au mai” se “Sega ni dua e sureti au” o sa vakalaiva tiko me vakatau vei ira eso tale na nomu marau. Ni o cakava qori, o sa solia tiko vei ira na galala mera lewai iko kei na ivakarau ni nomu rai.

Digia vinaka nomu itokani.

 “O ira era galili era dau vinakata mera kauaitaki, so na gauna era sega ni kauaitaka se o cei era digia me nodra itokani. Era vinakata ga mera ciqomi. Ia eso era na via veitokani mera rawata kina nodra inaki. Qori ena qai vakalevutaka ga na leqa.”​—Brianne

 E kaya na iVolatabu: “O koya e vakailala kei ira na vuku ena vuku, ia o koya e veitokani kei ira na lialia ena tini ca.” (Vosa Vakaibalebale 13:20) O koya e via kana, ena kania na ka kece e biu e matana. E va tale ga qori o koya e galili, ena sega ni digia vinaka na nona itokani. E rawa sara ga nira veitokani kei na dua e dau veivakalialiai, ra lai nanuma kina ni dau yaco ga ya.

 Ka eda vulica: Eda dau galili kece ena so na gauna, ia e vakatau ena ituvaki. Dina ni rawa ni vakavuna na lomaleqa ia qori na ivakarau ga ni lomada se ka eda dau vakila. Na ka eda vakila e vakatau ena ka eda vakasamataka, e bibi gona meda lewa vinaka na ka eda vakasamataka.

 Kua ni namaka vakasivia na ka mai vei ira eso tale. E kaya o Jeanette “Era na sega ni itokani vinaka o ira kece o digia, ia ena tiko eso era kauaitaki iko. Era na veivuke ni o galili.”

 Via kila eso tale na ka Wilika na ulutaga “ Valuta na Raicala me Baleta na Veitokani.” Rawa tale ga ni download na PDF “Working Through Loneliness.”