Raica sara na lewena

Na Website ni iVakadinadina i Jiova

Digia na Vosa vakaViti

Au na Rawata Vakacava na Maka Vinaka?

Au na Rawata Vakacava na Maka Vinaka?

Ka o rawa ni cakava

Rai Donu! Kua vakadua ni nanuma ni o na sega tu ga ni rawata na maka vinaka. Ke basika mai na rai cala va qori, saga mo vakasamataka ga na veika vinaka. Kena ivakaraitaki, e sega ni dua na yavu vinaka na nodra vakalewa na vakarorogo na ivakarau ni vosa i Paula, ia e sauma lesu o koya: “Keu sega mada ga ni madila ena vosa ia e duatani sara na ka au kila.” (2 Korinica 10:10; 11:6) E kila o Paula ni tiko na ka e lekata. Ia e kila tale ga ni tiko na ka e vinaka kina. Vakacava o iko? Na cava eso na ka o vinaka kina? Ke o sega ni vakasamataka rawa, vakacava mo taroga e dua sa matua vei iko? Ena rawa ni vukei iko koya mo kila na ka o vinaka kina kei na sala ena yaga kina vei iko.

Vuli lesoni wasoma. Na rawaka ena vuli ena vinakati kina na cakacaka vakaukaua kei na vuli lesoni. O na rairai sega ni taleitaka ena so na gauna, ia e bibi qai yaga vakalevu. Tovolea mada, o na marautaka. Me kua ni cala nomu ituvatuva ni vuli lesoni, ena vinakati mo vakayagataka vinaka nomu gauna. Nanuma tiko—me dau caka duadua e liu na vuli lesoni. Na ivolatabu e kaya ni tiko na gauna ni dredre kei na gauna ni meke. (Dauvunau 3:1, 4; 11:9) Koya gona, me vakataki ira ga na vo ni itabagone, o na rairai vinakata eso na gauna mo marau kina. E veivakasalataki na Dauvunau 11:4: ‘O koya e vakaraica tiko na cagi ena sega ni kaburaka na sorenikau, kei koya e raica tiko na o ena sega ni tatamusuki.’ Cava eda vulica? Kua ni lokuyara. Ena sega ni caka rawa kina na ka e bibi. Me liu na vuli lesoni qai muri na qito. Kua ni leqa—ena tiko na gauna mo cakava ruarua kina!

Me vaka ga na lave ka bi e vakaukauataka na masela, na vuli lesoni wasoma ena vinaka kina nomu ka ni vuli.