Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Ena Rawa ni Oti na Noqu Rarawa?

Ena Rawa ni Oti na Noqu Rarawa?

E kaya o Kellie, e dua na goneyalewa yabaki 18, “Nira rarawa eso, au dau walia na nodra leqa, au vakacegui ira. Ia niu yaco i vale, au dau sorova na tagi ena noqu rumu. E lewe vica ga era kila qori.”

E kaya o Riki, e dua na cauravou yabaki 22, “Niu rarawa, au dau vakayawayawa. Niu sureti ina dua na vanua, au dau vakaiulubale. Au vunitaka na noqu rarawa vei ratou na noqu vuvale. Eratou nanuma ni vinaka tiko na ka kece.”

Vakacava, e tautauvata nomu rai kei Kellie se o Riki? Ke vaka kina, kua ni totolo sara mo kaya ni leqa tiko vei iko e dua na ka. O keda kece eda dau rarawa ena so na gauna. Era dau rarawa tale ga na tagane kei na yalewa yalodina era cavuti ena iVolatabu.​—⁠1 Samuela 1:6-8; Same 35:14.

Ena so na gauna, o na rawa ni kila na vu ni nomu rarawa, ena so tale na gauna, o sega ni kila. E kaya o Ane, sa yabaki 19, “E sega ni tukuni me ca sara na kemu ituvaki mo qai rarawa. O na rawa ni rarawa ena dua ga na gauna, ke o sega mada ga ni dau sotava na leqa. E vakaninivaki, ia e dau yaco dina!”

Se mani cava e vakavuna, se o se sega mada ga ni rarawa vakadua, na cava mo cakava ni o rarawa? Tovolea mada qo:

  1. Veivosakitaka. E kaya o Jope ena levu ni nona yaluma: “Au na vakatusa na mosi ni yaloqu!”​—⁠Jope 10:1.

    E kaya o Kellie: Niu vakaraitaka, au kurabuitaka tale na levu ni noqu vakacegu. Sa qai bau dua me kila na kequ ituvaki. Au vakabulai nira biuta mai na dali ra qai dreti au tani mai na qara!

  2. Vola. Ni vakadredretaka na itosotoso na nomu rarawa, o na via vola na nomu nanuma. Ena so na gauna, e dau vakayatuyatutaka o Tevita na nona vutugu ena same e uqeta na Kalou me vola. (Same 6:6) Ni o vola na nomu rai, ena uqeti iko mo “taura matua na vuku kei na raiyawa.”​—⁠Vosa Vakaibalebale 3:21.

    E kaya o Heather, e dua na goneyalewa yabaki 22: Niu volavola, e tu vinaka tale kina na noqu vakasama. E vakaseavutaka na noqu rarawa niu vakaraitaka na lomaqu, au qai saga meu walia.

  3. Masulaka. E tukuni ena iVolatabu ke o masulaka na ka o leqataka, “ena qai taqomaka na lomamuni kei na nomuni vakasama na vakacegu ni Kalou e uasivia na vakasama kece.”—⁠Filipai 4:6, 7.

    E kaya o Esther, sa yabaki 24: Au dau saga meu kila na cava au rarawa tiko kina. Au kerei Jiova me vukei au meu marau. Au sa oca na rarawa tiko qai sega na vuna vinaka. E mani wali na noqu leqa. Kua ni beca na kaukaua ni masu!

    Ena veivuke kei na sasaga, e rawa ni oti na nomu rarawa

    Vakatutu: Ni o masu vei Jiova, muria na ivakarau ni masu ena Same 139:23, 24. Talaucaka na lomamu qai kerei koya me vukei iko mo kila na vu ni nomu rarawa.

Me ikuri ni vakatutu sa tukuni oti, na ivukevuke yaga na Vosa ni Kalou na iVolatabu. Ni o vakania na nomu vakasama ena itukutuku veivakauqeti o vulica ena iVolatabu, ena donu kina na nomu rai.​—⁠Same 1:1-3.

Ni sega ni oti rawa na rarawa

E kaya o Ryan, sa yabaki 28, “Ena so na mataka au sa voraki na duri, au sega ni via raica e dua tale na siga vakavucesa.” E lomabibi tiko o Ryan, ia eso tale era vakataki koya. E tukuni ena vakadidike, e dau lomabibi e rauta ni 1 mai na 4 na itabagone ni bera ni tamatabula, eso era lomabibi vakalevu, eso tale e vakalailai ga.

O na kila vakacava ni o sa lomabibi tiko? Qo eso na kena ivakatakilakila, e veisau na ivakarau ni yalomu se itovo, o sega ni via veimaliwai, voleka ni ka kece ga o cata, e veisau na ivakarau ni nomu kana kei na moce, o nanuma ni sa sega sara ga na betemu se ora voli na lomamu.

Io ena so na gauna, voleka ni o keda kece e dau yacovi keda e dua na ivakatakilakila se sivia. Ia ke sega ni oti na ivakatakilakila qori me vica vata na macawa, vakacava mo tukuna vei rau na nomu itubutubu mo lai laurai vakavuniwai? O vuniwai ga ena rawa ni kila na iwali ni nomu rarawa.

Ke o lomabibi vakalevu, kua ni madua. Levu e vinaka tale na kedra ituvaki nira qaravi vinaka, rairai na kena e vinaka duadua era bau vakila ena dua na gauna balavu. Se mani vakavuna na nomu rarawa na lomabibi se sega, mo nanuma na vosa veivakauqeti ena Same 34:18: “E voleka o Jiova vei ira sa ramusu na lomadra, e vakabulai ira sa dasila na yalodra.”