Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

E Dodonu Meu Kauaitaka na iVakatagi Au Digia?

E Dodonu Meu Kauaitaka na iVakatagi Au Digia?

“Niu vakavakarau ena dua na siga, au dau rogo sere. Niu draiva, au na dau varogo sere. Niu tiko e vale se sasamaki tiko, dau dola tu ga na sere. Au dau vakarogo sere.”​—Carla.

O vakataki Carla tale ga ni dau taleitaka na rogo sere? Ke dina qori, ena yaga sara vei iko na iulutaga qo, mo qarauna na kena veivakaleqai, qai digia vinaka na ivakatagi o rogoca.

 Kena yaga

Na rogo sere e rawa ni vakatauvatani ina kakana. E rawa ni vinaka ruarua vei iko ke o vakayagataka vinaka. Dikeva mada:

  • Na ivakatagi e rawa ni vakavinakataka nomu vakasama.

    “Ke ca vei au e dua na siga, meu rogoca ga noqu sere taleitaki au na lomavakacegu sara ga.”​—Mark.

  • E rawa ni kauta lesu nomu vakanananu.

    “E tiko na sere e dau vakavuna meu vakanananu, au dau marau niu rogoca.”​—Sheila.

  • E rawa ni uqeta na yalo ni duavata.

    “Au a tiko ena dua na soqo ni veimatanitu ni iVakadinadina i Jiova nira lagata na vulagi yani na iotioti ni sere, au luluvu sara ga niu rogoca. Duidui na vosa keimami vosataka, ia e veivakaduavatataki na ivakatagi.”​—Tammy.

  • E rawa ni uqeta na itovo vinaka.

    “Ni o vulica na vakayagataki ni dua na iyaya ni qiriqiri ena rawa ni vukei iko mo lewa matau qai vosovoso. O na sega ni kenadau kina ena dua ga na gauna lekaleka. O na rawa ga ni vinaka kina ke o vakatovotovo.”​—Anna.

O kila? Ni ivola levu duadua ena iVolatabu na Same. E tiko kina e 150 na sere.

Digia vinaka na ivakatagi me vaka o digia na kemu

 Kena leqa

Eso na sere e rawa ni veivakaleqai. Dikeva mada na vuna.

  • E levu na qaqanisere sa baleta ga na veiyacovi.

    “Kena irairai ni sere kilai levu kece e baleta ga na veiyacovi. Sa sega tale na wereubiubi.”​—Hannah.

    E kaya na iVolatabu: “Me kua mada ga ni cavuti ena kemuni maliwa na veiyacovi tawadodonu, na ka dukadukali kece se kocokoco.” (Efeso 5:⁠3) Tarogi iko mada, ‘Vakacava, e rawa ni tarovi au mai na noqu muria na ivakasala qori na ivakatagi au rogoca?’

  • Eso ena rawa ni vakavuna mo rarawa.

    “Eso na bogi niu sega ni rawa ni moce, au dau vakarogoca na sere e dau vakavuna meu yalolailai se rarawa. Eso na sere e dau vakavuna dina na rarawa.”​—Tammy.

    E Kaya na iVolatabu: “Ena ka kece mo qarauna, mo taqomaka na lomamu.” (Vosa Vakaibalebale 4:​23) Tarogi iko, ‘E dau vakavuna meu rai cala na sere au daurogoca?’

  • Rawa ni vakavuna mo cudru.

    “Na cudru, veibeci, kei na sere rogo ca era rawa ni rawai au vaqaseqase. Au raica ni duidui kina na noqu ivakarau ni rai. Eratou kidava tale ga qori na noqu vuvale.”​—John.

    E Kaya na iVolatabu: “Moni biuta tani na ka kece qo: na yalokatakata, na cudrucudru, na ivakarau ca, na vosavakacaca, kei na vosa vakasisila mai gusumuni.” (Kolosa 3:⁠8) Tarogi iko, ‘E dau vakacudrui au na sere au rogoca, o sega kina ni kauaitaka nodra nanuma eso tale?’

Bibi mo nanuma. Digidigi vinaka. Qori na ka e saga me cakava e dua na itabagone o Julie. E kaya, “Au rogoca tale na ivakatagi au dau taleitaka qai bokoca na kena e sega ni veiganiti. E sega ni rawarawa, ia e dodonu ga meu cakava.”

Qori tale ga na ka e cakava e dua na goneyalewa o Tara. E kaya: “So na gauna au dau rogoca na sere ena retio, niu rogoca na qaqana qai liaca ni sega ni dodonu meu rogoca, au dau veisautaka na siteseni. E vaka ga e dua e dreta laivi vei au e dua na tiki ni keke kamica, niu se qai tovolea oti ga! Ia keu cata na sere e lagati kina na veika me baleta na veiyacovi, au na cata dina na veiyacovi ni se bera na vakamau. Au sega ni via taura vakamamada na sere au dau rogoca.”