RA TAROGA NA ITABAGONE
Na Cava Rau Sega ni Vinakata Kina Noqu iTubutubu Meu Marau?
Era sureti iko na nomu itokani ena dua na pati ena mua ni macawa. O kerei rau nomu itubutubu mo lako, ia e rau kaya, “Sega.” O sega ni kurabuitaki, baleta rau dau kaya tu ga qori ena veigauna.
E vakamacalataki ena ulutaga qo
Na cava na vuna e sega ni soli kina vei au na galala?
Ni rau sega ni vakadonuya nomu kerekere ena levu na gauna, o lai nanuma kina ni rau sega ni vinakata mo marau.
Qori na ka e vakila e dua na itabagone o Marie ena gauna e dua kina nona talevoni. E kaya: “E biuta o Ta e levu na lawa me baleta na app au rawa ni download taka, o cei au rawa ni qirita kei na balavu ni gauna me keimami veitalanoa kina. Ia e duatani qori mai vei ira noqu itokani, nira cakava ga na ka era vinakata!”
Mo vakasamataka: Vakacava e nona inaki o Tamai Marie me tarovi koya mai nona vakila na marau? Na cava tale e lomaleqataka?
Na lawa ni gaunisala e taqomaki ira na draiva mai na vakacalaka, e va tale ga qori na lawa era biuta na itubutubu mo muria
Tovolea qo: Kaya mada ke o dua na itubutubu, qai dua na talevoni nei luvemu. Na cava o na lomaleqataka? Ni o via taqomaki luvemu, na cava eso na ka o na vakatabuya vua? Na cava o na kaya ke tukuna vei iko o luvemu ni o sega ni vinakata me marau?
“E dau kaya o Ta, ‘Vakasamataka mada ke o dua na itubutubu.’ Qori e vukei au sara ga meu raica vakabibi na lawa kei na vuna e vakatabui au kina. Keu vakaluveni, au na cakava tale ga vei luvequ na ka e cakava vei au o Ta.”—Tanya.
Na cava meu cakava me soli vei au na galala?
“E sega ni dua na ka vinaka e kauta mai na veisa vosa, ena rawa ga ni vakaleqa nomudou veimaliwai vakavuvale. Ke o veiba, rau na sega ni solia na galala na nomu itubutubu ni o sega ni yalomatua.”—Richard.
“E tiko na vuna vinaka rau biuta kina noqu itubutubu na lawa. Rau sega ni tarovi au mai na noqu vakila na marau, ia rau vinakata ga meu digia na ka ni veivakamarautaki ena sega ni kauta mai na leqa.”—Ivy.
iVakavuvuli vakaivolatabu: “Na tamata yalowai e talaucaka kece na lomana,ia o koya e vuku e galu qai lewa vinaka.”—Vosa Vakaibalebale 29:11.
“Au sega ni muria na lawa e biuta o Ta me baleta na vakayagataki ni talevoni, ya niu vakau itukutuku vei ira noqu itokani ena bogilevu, qai download taka na app e vakatabui vei au. Ia na gauna e kila kina qori o Ta, e dau biuta eso tale na lawa baleta ni sega ni nuitaki au. Nida cakava lo e dua na ka vakatabui, ena sega ni tini vinaka.”—Marie.
“Mo vosovoso. Ena taura na gauna me rau veisautaka nomu itubutubu na ka e rau vakatulewataka, ia e rawa ni rau solia tale vei iko na galala ke rau raica ni o muria tiko.”—Melinda.
iVakavuvuli vakaivolatabu: “Ni talairawarawa vei ira na nomuni itubutubu ena ka kece.”—Kolosa 3:20.
“Nomu saga tiko ga me yaco na lomamu, o na sega ni rawata kina na ka o vinakata.”—Natalie.
“Rau vinakata noqu itubutubu meu vakatulewa vinaka. Ni keitou veitalanoa au na vakasamataka vinaka na ka meu tukuna, sega ni ka ga au nanuma. Niu cakava qori, rau na solia vei au na galala.”—Joseph.
iVakavuvuli vakaivolatabu: “Mo rokovi tamamu kei tinamu.”—Efeso 6:2.
Rawa ni o Wilika Tale ga
RA TAROGA NA ITABAGONE
Au na Veivosakitaka Vakacava kei Rau na Noqu iTubutubu na Nodrau Lawa?
Vulica na sala mo vosa kina ena veidokai, o na kurabuitaka tale ga na ka ena rawati kina.
DROINI YAVALA
Rawa ni Soli Vakalevu Vei Au na Galala?
O rairai nanuma ni o sa uabula, ia cava rau nanuma nomu itubutubu? Na cava mo cakava me rau nuitaki iko kina?
KA ERA KAYA NOMU ICABA
Noqu Bula Vakaitabagone—Meu Vosa Vakacava Vei Rau Na Kei Ta?
O na vakila na yaga ni nomu cakava qori.
RA TAROGA NA ITABAGONE
Rawa ni Rau Nuitaki au na Noqu iTubutubu?
Tolu na sala ena rawa ni soli tale kina vei iko na galala.
