RA TAROGA NA ITABAGONE
Au na Digia Vakacava e Dua e iVakaraitaki Vinaka?
“Niu sotava na ituvaki dredre e koronivuli, e dau vukei au noqu vakasamataka nona ivakaraitaki vinaka e dua e tautauvata na ka keirau sotava. Au dau saga sara meu muria nona ivakaraitaki. E rawarawa kina meu vosota na ituvaki dredre.”—Haley.
O koya e ivakaraitaki vinaka ena vukei iko mo kua ni sotava na leqa qai rawata nomu isausau. E bibi mo digia e dua e ivakaraitaki vinaka.
Vuna mo digidigi vinaka
E rawa ni moica na ka o cakava o ira o digia mo vakatotomuria.
E kaya na iVolatabu vei ira na lotu vaKarisito mera vakasamataki ira era ivakaraitaki vinaka: “Ni vakadikeva na vinaka ni nodra ivalavala, ni qai vakatotomuria na nodra vakabauta.”—Iperiu 13:7.
Vakatutu: O ira o digia mo vakatotomuria, era na rawa ni uqeti iko ena ka vinaka se ka ca. Mo digi ira gona e talei na nodra itovo, sega ni o ira era rogo se oni yabaki vata.
“Au dau vuli vakalevu vua e dua na tacida o Adam. Au taleitaka nona itovo kei na nona ivakarau. Au se nanuma vinaka tu eso na ka e tukuna se cakava. E sega ni kila ni dau uqeti au na nona ivakaraitaki.”—Colin.
E rawa ni tara na lomamu kei na nomu vakasama o ira o digia mo vakatotomuria.
E kaya na iVolatabu: “Ni kua ni vakaisini kemuni. Na ilala ca e vakacacana na itovo vinaka.”—1 Korinica 15:33.
Vakatutu: Digia e dua e vinaka nona itovo, sega ni kena irairai. Na vuna? O na sega ni rarawa kina.
“E rawa ni veivakayalolailaitaki ke o vakatauvatani iko kei ira era rairai vinaka. O na rawa ni kauaitaka vakasivia kina na kemu irairai.”—Tamara.
Mo vakasamataka: Na leqa cava e rawa ni yaco ke o digia mo vakatotomuri ira na tamata rogo kei ira na dauqito?
Ena vakatau nomu rawata na nomu isausau, o ira o digia mo vakatotomuria.
E kaya na iVolatabu: “O koya e vakailala kei ira na vuku ena vuku.”—Vosa Vakaibalebale 13:20.
Vakatutu: Saga mo vakatotomuri ira e vinaka na nodra itovo. Ni o vakadikevi ira, o na rawa ni kila na ka mo cakava mo sauva kina nomu isausau.
“Ni o biuta nomu isausau, kua ni kaya ‘Au vinakata meu nuitaki,’ Mo kaya ga, ‘Au via nuitaki me vakai Jane. E sega ni dau bera qai raica vakabibi nona itavi.’”—Miriam.
Bibi me nanumi: Me rawa ni vinaka na nomu itovo, e bibi mo digia e dua e ivakaraitaki vinaka.
Ena rawarawa mo sauva nomu isausau ni o muria nodra ivakaraitaki vinaka eso!
Sala mo digidigi kina
Qo e rua na ka o rawa ni cakava.
Vakasamataka e dua na itovo mo vakavinakataka, qai vaqara e dua e dau vakaraitaka na itovo qori.
Digia e dua o dau taleitaka qai raica na itovo o via vakatotomuria vua.
Rawa ni vukei iko mo cakava qori na ka me vakaleweni (worksheet) e tiko ena ulutaga qo.
O ira o via vakatotomuria e rawa ni okati kina:
iCaba. “Au via vakatotomuria e dua noqu itokani dredre. E dau yalorawarawa qai tu vakarau me vukei ira eso tale. E gone vei au, ia au raica vua eso na itovo totoka au lekata. Au vinakata meu muria nona ivakaraitaki.”—Miriam.
Qase. Qo rawa ni o rau nomu itubutubu se o ira oni vakabauta vata. “Rau ivakaraitaki vinaka vei au na noqu itubutubu. Rau vakaraitaka e levu na itovo vinaka. Dina e tu nodrau malumalumu, ia au raica ni rau yalodina vua na Kalou. Au vinakata meu va tale ga ya niu sa qase.”—Annette.
Ira era volai ena iVolatabu. “Au taleitaka nodra ivakaraitaki eso era cavuti ena iVolatabu, me vakataki Timoci, Ruci, Jope, Pita kei na goneyalewa ni Isireli. E duidui na ka au vulica vei ira.Na levu ga ni noqu vulica na ka me baleti ira, e vakaibalebale kina noqu wili iVolatabu. Au dau taleitaka meu vulica na ivola Vakadamurimuria Nodra Vakabauta, kei na ‘Role Model Index’ e tiko ena rua na itabataba ni ivola Questions Young People Ask—Answers That Work.”—Melinda.
Vakatutu: Tovolea mo digia e levu era ivakaraitaki vinaka, me kua ni dua ga. E cavuta o Paula vei ira na lotu vaKarisito: “Ni raici ira matua na muria na ka vata ga keitou a vakaraitaka vei kemuni.”—Filipai 3:17.
O bau kila? Na nomu ivakaraitaki e rawa ni uqeti ira eso tale! E kaya na iVolatabu: “Mo ivakaraitaki vei ira na yalodina ena vosa, ena itovo, ena loloma, ena vakabauta, ena ivalavala savasava.”—1 Timoci 4:12.
“De dua o via vakavinakataka eso nomu itovo, o rawa tale ga ni vukei ira eso tale mera cakava qori. Era na rairai vakaraica na nomu itovo, ena rawa sara ga ni veisautaka na nodra bula na ka o tukuna.”—Kiana.
Rawa ni o Wilika Tale ga
DROINI YAVALA
O Cei na iTokani Dina?
Rawarawa na kunei ira na itokani ca, ia o na kunea vakacava na itokani dina?
RA TAROGA NA ITABAGONE
Na Cava Meu Qarauna Kina na Veivakamuai ni Tabana ni iTukutuku?—Wase 2: Baleti Ira na Gonetagane
O na sega ni taleitaki ke o dau veimurimuri, o sega ni vakatulewa ga vakataki iko.
KA ERA KAYA NOMU ICABA
Na Bula Vinaka Duadua
O via marautaka na nomu bula? Rogoca ni vakamacalataka o Cameron na nona bula vakacegu ena vanua e sega ni tadra.
