Raica sara na lewena

RA TAROGA NA ITABAGONE

Na Cava Meu Cakava Keu Beca e Dua na Lawa e Vale?

Na Cava Meu Cakava Keu Beca e Dua na Lawa e Vale?

Qo na ka mo cakava me vinaka tale kina na ituvaki.

Mo tukuna na ka dina. Ke o lasu, rau na sega ni nuitaki iko tale na nomu itubutubu. E bibi gona mo tukuna na ka e yaco dina.​—Vosa Vakaibalebale 28:13.

  • Kua ni vunitaka se talanoataka ga vakatikina na ka e yaco.

  • Kua ni guilecava, na ‘vosa vakayalovinaka e ivakamalumu ni cudru.”​—Vosa Vakaibalebale 15:1.

Kere veivosoti. Vakaraitaka ni o rarawataka dina na ka e yaco, qori ena rawa ni vakalailaitaka na kemu itotogi.

Ciqoma na ka e yaco. E ivakaraitaki ni yalomatua nomu ciqoma na ka e yaco. Na ka ga mo cakava oya mo saga me rau nuitaki iko tale na nomu itubutubu.—Vosa Vakaibalebale 20:11.

Mo nanuma, ni nodrau itavi na nomu itubutubu me rau lewa na kemu itotogi. Ni tukuni ena iVolatabu ‘na ivakaro i tamamu’ kei na ‘ivunau i tinamu.’​—Vosa Vakaibalebale 6:20.

Ke o vinakata me rau solia vei iko na galala nomu itubutubu

  • Vakaraitaka ni o via muria na nodrau ivakaro.

  • Mo kilai ni o dau talairawarawa, oya ni dusimaki iko nomu lewaeloma ena veika o vakabauta ni donu, se kilai tani kina.