Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Au sa Rawa ni Veibuku?

Au sa Rawa ni Veibuku?

 Na cava na veibuku?

  • O dau lako vata vakalevu kei na dua na tagane ke o yalewa, se yalewa ke o tagane. O sa veibuku tiko?

  • Drau sa veivinakati tiko kei na dua. Levu na gauna ena dua na siga, drau dau vakauitukutuku se veiqiriti. O sa veibuku tiko?

  • Ena gauna kece o dau sota kina kei ira na nomu itokani, drau dau veitalanoa tiko ga. O sa veibuku tiko?

Ena rawarawa toka mo sauma na imatai ni taro. Ia ena via dredre mo sauma na kena ikarua kei na kena ikatolu. Na cava sara mada na veibuku?

Io, na veibuku e dua na ivakarau ni veimaliwai o vakaraitaka kina nomu taleitaka e dua, se taleitaki iko o koya.

Na isau gona ni taro tolutolu qori na io. Se mani drau veidomoni se veivosaki wasoma ena talevoni se veiraimata, e matanalevu se caka lo, qori gona na veibuku.

 Na cava na inaki ni veibuku?

E dodonu me rokovi na inaki ni veibuku, me rau vakadeitaka kina na gonetagane kei na goneyalewa me rau veiwatini, se sega.

Io, eso na nomu icaba era raica vakamamada na veibuku. Era rairai taleitaka mera vakaitokani kei na dua na tagane ke yalewa, se yalewa ke tagane ia drau sega ni nakita mo drau vakawati. Eso era sega ni mareqeta na itokani va qori, era vinakata ga mera laurai e matanalevu, mera dokai kina.

Levu na gauna e dau lekaleka ga na veitokani va qori. E kaya e dua na goneyalewa o Heather, “Levu na itabagone era tinia na nodra veikilai ena veimacawa se rua na macawa. Era raica me lekaleka ga na veikilai, oya me vakarautaki ira ga ina veisere, sega ni vakawati.”

Ni o sa veibuku, mo kua ni vaqitoqito. Mo vakadeitaka gona ni donu na nomu inaki.—Luke 6:31.

Ke o veibuku qai sega ni nomu inaki mo vakawati, o vaka e dua na gone e qitora nona iyaya ni vakatatalo vou, oti ga e biuta tale

Vakasamataka: O na vinakata me dua e vaqitoqitotaki iko me vaka na iyaya ni vakatatalo, me tomiki ga oti qai biu tale? Kua ni cakava qori vua e dua tale! E kaya na iVolatabu, na loloma e “sega ni cakava na ka e sega ni rakorako.”—1 Korinica 13:4, 5.

E kaya e dua na goneyalewa o Chelsea: “Ena so na gauna au nanuma ni ka ni lasa na veibuku, ia ena sega dina ni lasa ke dua e taura vakabibi, e dua tale e sega.”

iVakasala: Wilika na 2 Pita 1:5-7 qai digia e dua na itovo mo cakacaka kina mo vakarautaki iko ena veibuku kei na vakawati. Oti e dua na vula, raica na ka o sa vulica kei na ka mo vakavinakataka ena itovo qori.

 Au sa yacova na yabaki ni veibuku?

  •  Na yabaki cava o nanuma me tekivu veibuku kina e dua na itabagone?

  •  Taroga qori vua na nomu itubutubu.

E rawa ni duidui na nomu isaunitaro kei na nodrau na nomu itubutubu. Se sega sara ga! Levu na itabagone era se sega ni via veibuku mera yacova mada na yabaki era na kilai ira vinaka kina, o rawa sara ga ni dua vei ira.

Qori na ka e vakatulewataka na goneyalewa o Danielle, sa yabaki 17. E kaya: “Niu nanuma lesu na rua na yabaki sa oti, e duidui sara na ka au dau raica vei koya au nanuma me watiqu ni vakatauvatani kei na ka au raica ena gauna qo. Ena gauna mada ga qo, au se sega ni vakadeitaka na vakatulewa qori. Au na qai vakasamataka ga na veibuku niu kila ni sa na vinaka na noqu itovo me vica tale na yabaki.”

E tiko tale e dua na vuna vinaka mo wawa kina. E tukuni ena iVolatabu na matavosa na “bula vakaitabagone” me vakamacalataka na kena kaukaua ena gauna qori na gagadre ni veiyacovi kei na veidomoni. (1 Korinica 7:36) Ni o veivolekati tiko ga kei na dua na tagane ke o yalewa, se yalewa ke o tagane ni o se donuya tiko na gauna qori, ena vakabulabulataka na gagadre ni veiyacovi, ena tini sara ena ivalavala tawakilikili.

Io, de ra raica vakamamada qori na nomu icaba. Levu era rairai vinakata sara ga mera veiyacovi. Ia o iko, mo vakaraitaka ni o yalomatua! (Roma 12:2) Kena ilutua, e uqeti iko na iVolatabu mo “dro tani mai na veiyacovi tawadodonu.” (1 Korinica 6:18) Ni o wawa me oti mada na gauna vakaitabagone, o na “biuta tani [kina] na ka ca.”—Dauvunau 11:10.

 Na cava mo kua ni kusa kina na veibuku?

Ni o veimurimuri mo veibuku ni se sega ni kena gauna, e vaka ni o vakaukauataki mo veitarogi ena dua na lesoni o sega sara ga ni vulica. E sega ni dodonu me va qori! E vinakati na gauna mo vulica kina na lesoni mo kila na ka mo veitarogitaka.

E vaka kina na veibuku.

Me kua ni tauri vakamamada na veibuku. Ni bera ni o kila vinaka e dua, e vinakati na gauna mo vulica kina e dua na lesoni bibi, oya na veitokani.

Ena dua na gauna e muri, ni o sota kei na dua e ganiti iko, o sa na tu vakarau mo bucina e dua na veiwekani tudei. Koya gona, na vakawati vinaka e yavutaki ena nodrau veitokani vinaka e rua.

Ni o wawa ena sega ni yalani kina na nomu galala. Ia ena levu sara nomu gauna galala mo ‘marau [kina] ni o se cauravou.’ (Dauvunau 11:9) Ena tiko tale ga na gauna mo vakarautaki iko kina mo bucina eso na itovo, e bibi sara na nomu veika vakayalo.—Lele i Jeremaia 3:27.

Ena gauna qo, o rawa ni marautaka nomu veimaliwai kei koya o sa nanuma tiko. O na cakava vakacava qori? Drau veimaliwai kei na so tale. E kaya o Tammy: “Au kila ni Iasa sara ni va ya. E vinaka me levu na noda itokani.” E duavata kina o Monica, e kaya, “E vakasama vinaka meda veimaliwai vakailawalawa, nida veimaliwai kina kei ira e duidui na nodra itovo.”

Ia ke sa rui totolo mo vakasamataka e dua ena gauna qo, ena vakamosia ga na yalomu. Mo kua gona ni vakusakusa. Vakayagataka na gauna qo mo vulica na sala mo bucina kina na veitokani e dei. Ena dua na gauna, ke o vinakata mo veibuku o sa na kilai iko vinaka kei na ka o vinakata vua na kemu isa drau na bula vata ena gauna kece.