RA TAROGA NA ITABAGONE
Au sa Rawa ni Vakawati?
E bibi mo kilai iko vinaka mada mo qai sauma na taro qori. Me kena ivakaraitaki, vakasamataka mada na vica na tikina qo:
Veimaliwai
E dau vakacava nomu veimaliwai kei rau na nomu itubutubu, kei ratou na tacimu? Ni o vakaraitaka nomu nanuma, vakacava o dau yalototolo ni o tauca na vosa kaukaua se vakalewai ratou? Na cava eratou na tukuna me baleti iko? Na ivakarau ni nomu veimaliwai kei ratou na nomu vuvale ena laurai tale ga ena nomu veimaliwai kei watimu.—Efeso 4:31.
Rai
Vakacava, o dau raica ga na veika vinaka se o dau raica tu ga na veika ca? O dau yalorawarawa, se o vinakata ga me rogoci nomu nanuma? O dau tauri iko vakamalua ena gauna dredre? O dau vosovoso? Ni o bulataka rawa ena gauna qo na vua ni yalo tabu, ena vakarautaki iko mo dua na tagane se yalewa vakawati vinaka.—Kalatia 5:22, 23.
iLavo
Vakacava o dau maroroi ilavo? O dau dinau vakalevu? E dau dei na nomu cakacaka? Ke sega, cava na vuna? Vakacava, e sega ni vinaka na cakacaka? Na itaukei ni cakacaka? Se tiko eso na itovo mo vakavinakataka? Ke o sega mada ga ni maroroya rawa na nomu ilavo, ena qai rawa vakacava ni o sa vakavuvale?—1 Timoci 5:8.
Bula vakayalo
Ke o iVakadinadina i Jiova, na cava o sa cakava tiko me dei kina nomu veiwekani kei na Kalou? O dau sasagataka mo wilika na Vosa ni Kalou, mo lako ena cakacaka vakavunau, mo vakaitavi tale ga ena soqoni vaKarisito? O koya me watimu ena vinakata e dua e kaukaua vakayalo.—Dauvunau 4:9, 10.
Na levu ga ni nomu kilai iko vinaka, ena rawarawa tale ga nomu raica e dua ena mai vakataucokotaka na itovo vinaka sa tiko rawa.
Rawa ni o Wilika Tale ga
RA TAROGA NA ITABAGONE
Au na Kila Vakacava ni Ganiti Koya me Watiqu?
O na kilai nomu itau vinaka vakacava, o qai sega ni raica ga na irairai e sau?
VIDIO
Na Cava na Dodomo Dina?
Na dodomo e yavutaki ena ivola ni italanoa e tarava ga mai na rarawa, ia na dodomo dina e yavutaki ena ivakavuvuli dei vakaivolatabu.
