Raica sara na lewena

Na Website ni iVakadinadina i Jiova

Digia na Vosa vakaViti

Era Dau Vakaleqa na Vuvale na iVakadinadina i Jiova se ra Vaqaqacotaka?

Era Dau Vakaleqa na Vuvale na iVakadinadina i Jiova se ra Vaqaqacotaka?

Keimami dau vaqaqacotaka na vuvale na iVakadinadina i Jiova. Keimami doka na Kalou ni o koya na Dauveibuli e tauyavutaka na vuvale. (Vakatekivu 2:21-24; Efeso 3:14, 15) Sa ra vakila tiko e levu na vuvale na yaga ni ivakavuvuli vakaivolatabu e vakarautaka na Kalou ena nona Vosa, e qaqaco vinaka qai marautaki kina nodra bula vakawati.

Era Uqeta Vakacava na Duavata ena Vuvale

Keimami saga vagumatua me keimami muria na ivakasala ena iVolatabu, ni qori ena vukea e dua me tagane vakawati vinaka, yalewa vakawati vinaka, itubutubu vinaka tale ga. (Vosa Vakaibalebale 31:10-​31; Efeso 5:⁠22–​6:4; 1 Timoci 5:8) Na ivakavuvuli vuku ena iVolatabu e sa yaga tiko vei ira mada ga na vuvale duidui lotu. (1 Pita 3:​1, 2) Dikeva mada na ka era tukuna eso era sega ni iVakadinadina, ia e qai mai iVakadinadina i Jiova na watidra:

  • “E tikoyavavala neirau vuvale ena imatai ni ono na yabaki. Ni mai dua na iVakadinadina i Jiova o Ivete na watiqu, sa qai dau yalololoma qai vosovoso vakalevu. Na veisau e cakava e vakavinakataka neirau bula vakawati.”​—Clauir, mai Brazil.

  • “Au sega ni taleitaka nona tekivu vulica na iVolatabu o Chansa na watiqu kei ira na iVakadinadina i Jiova, niu nanuma nira dau vakaleqa na vuvale. Ia qo au raica ni vukea dina neirau bula vakawati na iVolatabu.”​—Agness, mai Zambia.

Nida cakacaka vakaitalatala, eda vakaraitaka vei ira na wekada ni vakavuvuli ena iVolatabu e rawa ni vukei ira me

Ke dua e tavuki me iVakadinadina i Jiova, ena rawa ni vakaleqa na vakawati?

Ena so na gauna e rawa. Kena ivakaraitaki, e laurai ena dua na vakadidike a caka ena 1998 ni 1 mai na 20 na vakawati, e dua ga vei rau na veiwatini e iVakadinadina, ia e vakila o koya na dredre ena gauna a tavuki kina.

E tukuna taumada o Jisu nira na vakila na dredre ena lomanivuvale o ira na muria na nona ivakavuvuli. (Maciu 10:32-​36) E vola na daunitukutuku makawa o Will Durant, “era totogitaki na lotu vaKarisito nira vakaleqa na vuvale” * ena veivanua e qali e Roma, e va tale ga qori nodra totogitaki eso na iVakadinadina i Jiova nikua. Kena ibalebale qo nira vakavuna na iVakadinadina na leqa qori?

European Court of Human Rights

Ni vakatulewataki nodra beitaki na iVakadinadina i Jiova nira dau vakaleqa na vuvale, e tukuna na mataveilewai me baleta na nodra dodonu na lewenivanua e Urope (European Court of Human Rights), ni o ira na lewe ni vuvale sega ni iVakadinadina era dau vakaleqa na duavata nira sega ni via “ciqoma se doka na nodra galala ni sokalou na wekadra.” E tomana na Mataveilewai: “Na ituvaki qo e dau laurai vakalevu vei ira na veiwatini e duidui nodra vakabauta, wili kina o ira na iVakadinadina i Jiova.” * Nira vakacacani mada ga ena vuku ni nodra lotu, era na saga na iVakadinadina i Jiova mera muria na ivakasala ena iVolatabu: “Kua ni sauma na ca e caka vei kemuni. . . . Ke rawa, saga moni veiyaloni kei ira na tamata kece ga.”​—Roma 12:17, 18.

Era vakabauta na iVakadinadina i Jiova mera vakawati ga ena loma ni nodra lotu

Keimami muria na ivakaro ena iVolatabu me vakawati “ga ena Turaga,” oya me keimami vakawatitaka ga e dua keimami vakabauta vata. (1 Korinica 7:39) E vakaivolatabu qai yaga na ivakaro qo. Kena ivakaraitaki, ena dua na ulutaga ni ivola Journal of Marriage and Family ena 2010 e tukuni kina ni “veiwatini e tautauvata na nodrau lotu, kei na nodrau vakabauta” e dau vinaka cake sara na nodrau veimaliwai. *

Ia, keimami sega ni dauveiuqeti mera veibiu na veiwatini ke dua vei rau e sega ni iVakadinadina. E kaya na iVolatabu: “Ke dua na tacida tagane e sega ni vakabauta o watina, qai vakadonuya o yalewa me rau tiko vata ga, me kua ni biuti koya o tagane. Na yalewa tale ga e duatani na vakabauta i watina, qai vakadonuya o tagane me rau tiko vata ga, me kua ni biuti koya o yalewa.” (1 Korinica 7:​12, 13) Keimami muria na ivakaro qori na iVakadinadina i Jiova.

^ para. 17 Raica Caesar and Christ, tabana e 647.

^ para. 18 Raica na vakatulewa e caka ena kisi ni veilewai me baleti ira na iVakadinadina i Jiova e Moscow kei na so tale. Rusia, tabana e 26-​27, parakaravu 111.

^ para. 20 Raica na Journal of Marriage and Family, Volume 72, Number 4, (Okosita 2010), tabana e 963.