Raica sara na lewena

Na Website ni iVakadinadina i Jiova

Digia na Vosa vakaViti

Era Dau Veivuke na iVakadinadina i Jiova ena Leqa Tubukoso?

Era Dau Veivuke na iVakadinadina i Jiova ena Leqa Tubukoso?

Io, keimami dau veivuke ena leqa tubukoso. Keimami vukei ira keimami vakabauta vata kei ira na sega ni iVakadinadina i Jiova, e salavata qo kei na ka e tukuni ena Kalatia 6:10: “Meda caka vinaka vei ira na tamata kece, vakauasivi vei ira eda vakabauta vata.” Keimami saga tale ga me keimami vakacegui ira ena gauna dredre qori.—2 Korinica 1:3, 4.

Kena Tuvanaki

Ni yaco e dua na leqa tubukoso, era na saga na qase ni ivavakoso ena vanua qori mera veitaratara kei ira na lewe ni ivavakoso, mera kila na kedra ituvaki kei na veivuke era vinakata. Oti era na ripotetaka sara ina valenivolavola ni tabana na itukutuku kece era sa soqona rawa.

Ke levu tale na ka era vinakata na lewe ni ivavakoso qai sega ni rawa ni vakarautaka na ivavakoso, ena tuvanaka na iLawalawa Dauvakatulewa ni iVakadinadina i Jiova na veivuke qori. Na iwalewale qo e tautauvata kei na ka era cakava na lotu vaKarisito ena gauna vakaivolatabu ni yaco na dausiga. (1 Korinica 16:1-4) Na valenivolavola ni tabana ena vanua qori, ena lesia e dua na Komiti ni Vakacoko me qarava na kena vakarautaki na veivuke. Era na gole tale ga mai eso tale na iVakadinadina i Jiova mera mai veivuke.—Vosa Vakaibalebale 17:17.

Kena Vakailavotaki

Dua na sala e vakayagataki kina na cau e vakau ina valenivolavola ni iVakadinadina i Jiova, oya na nodra vukei na vakaleqai ena leqa tubukoso. (Cakacaka 11:27-30; 2 Korinica 8:13-15) Era sega ni saumi na iVakadinadina i Jiova era veivuke kina, na ilavo kece e gole vakatabakidua sara ga ena cakacaka ni vakacoko, e sega ni gole tale vei ira na liutaka na cakacaka. Keimami qarauna me vakayagataki vinaka na ilavo kece e cautaki.—2 Korinica 8:20.