Raica sara na lewena

Na Website ni iVakadinadina i Jiova

Digia na Vosa vakaViti

Na Cava Nodra Rai na iVakadinadina i Jiova me Baleta na Veika Vakasaenisi?

Na Cava Nodra Rai na iVakadinadina i Jiova me Baleta na Veika Vakasaenisi?

Keimami doka na rawaka vakasaenisi, keimami vakabauta tale ga na vakadidike vakasaenisi e tiko na kena ivakadinadina.

“E vulici ena saenisi na veika bula, nodra ivakarau, kei na so tale na itukutuku eda via kila me baleti ira.” (Collins Cobuild Advanced Learner’s English Dictionary) E sega ni ivola vakasaenisi na iVolatabu, ia e veiuqeti meda dikeva na veika bula kei na nodra vakadidike vakasaenisi eso tale. Raica mada eso na kena ivakaraitaki:

  • Maliwalala: “Moni tacake i lomalagi moni raica. O cei e buli ira qori? O koya e kauti ira mai vakamataivalu ena kedra iwiliwili, e kacivi ira kece ena yacadra.”​—Aisea 40:26.

  • Veika bula: O Solomoni e dau “vakamacalataka na kau, mai na sitari ni Lepanoni ina isopi era salava na bai, e dau vakamacalataka na manumanu, na manumanuvuka, na manumanu qasi kei na ika.”​—1 Tui 4:​33.

  • Wainimate: “E sega ni yaga na vuniwai vei ira na bula vinaka, e yaga ga vei ira na tauvimate.”​—Luke 5:​31.

  • Draki: “O sa bau curu ina veivaleniyau e maroroi tu kina na ucacevata, se o sa raica na veivaleniyau e maroroi tu kina na uca qereqere. . . ? E liwa mai vei na tokalau e dela i vuravura?”​—Jope 38:22-​24.

Keimami doka na veika vakasaenisi, qai laurai qori ena ulutaga e tabaki ena neimami ivola me baleta na veika bula kei na rawaka vakasaenisi. Era veiuqeti na itubutubu era iVakadinadina i Jiova mera vuli na luvedra mera kila vinaka kina na veika e tu wavokiti ira. Eso mada ga na iVakadinadina era dau caka vakadidike vakasaenisi me vaka na dikevi ni sela kei na veika mate, eso era daunifika tale ga.

Vakaiyalayala na rawaka vakasaenisi

Keimami sega ni vakabauta ni rawa ni sauma kece na noda vakatataro na veika vakasaenisi. * Kena ivakaraitaki, era via kila o ira na dau vakadidike ena vatu se buli vakacava na vuravura. O ira na dau dikeva na yago ni tamata era via kila se yavala rawa vakacava yago. Ia e rawa sara mada vakacava na bula e vuravura? E rawa tale ga vakacava nira cakacaka vata na veitikiniyago?

Keimami vakadeitaka ni rawa ga ni sauma vakadodonu na taro qori na iVolatabu. (Same 139:13-​16; Aisea 45:18) Keimami vakabauta gona ni veiganiti me vulici tale ga na iVolatabu, sega ni veika ga vakasaenisi.

E dau veisaqasaqa ena so na gauna na ivakamacala vakasaenisi kei na ka e tukuna iVolatabu. E rawa ni vakavuna qori na kena tauri cala na ka e kaya na iVolatabu. Kena ivakaraitaki, e sega ni tukuna na iVolatabu ni a buli na vuravura ena ono ga na siga, me 24 na aua ena dua na siga.​—Vakatekivu 1:1; 2:4.

Eso tale na ivakamacala e kilai raraba ni yavutaki vakasaenisi. Ia e sega na kena ivakadinadina ra qai sega ni duavata kina eso na saenitisi rogo. Kena ivakaraitaki, e laurai ena veika bula e vuravura nira buli vakamaqosa. Keimami duavata kina kei na levu na saenitisi nira sega ni basika mai vakacalaka na veika bula se ra vu mai na bula vakaidewadewa.

^ para. 10 E kaya e dua na saenitisi mai Austria a taura na icovi na Nobel o Erwin Schrödinger, ni ka vakasaenisi “e sega ni vakamacalataka rawa na veika . . . e tara na lomada se bibi vei keda.” E kaya tale ga o Albert Einstein: “Eda vulica ena veika rarawa eda sotava ni sega ni rawa ni wali na leqa ni veisiga ena vuku vakatamata.”