Raica sara na lewena

Cava Meu Cakava Meu Dua Kina na iVakadinadina i Jiova?

Cava Meu Cakava Meu Dua Kina na iVakadinadina i Jiova?

E vakamacalataka o Jisu ena Maciu 28:19, 20 na kalawa me cakava e dua, me dua kina na iVakadinadina i Jiova, me nona tisaipeli tale ga. Ena vinakati vua me tukuna se vunautaka na veika baleti Jiova.

Kena iMatai: Vulica na ka e tukuna na iVolatabu. E vakaroti ira nona imuri o Jisu mera “vakavulici ira . . . , mera tisaipeli.” (Maciu 28:19, 20) Na vosa “tisaipeli” e kena ibalebale “o koya e vakavulici.” Na iVolatabu e tukuna kina na veika e vakavulica o Jisu, era tu kina na itukutuku me baleta na sala ena marautaki qai vakainaki kina na bula. (2 Timoci 3:​16, 17) Keimami na marautaka me keimami vakavulici kemuni wale ena iVolatabu.​—Maciu 10:​7, 8; 1 Cesalonaika 2:​13.

Kena iKarua: Bulataka na ka o vulica. E kaya o Jisu ni dodonu vei ira na na vulica na iVolatabu mera ‘muria na ka kece e vakarota.’ (Maciu 28:20) Kena ibalebale ni nomu vulica na iVolatabu e sega ni ka me vakasamataki wale tu ga​—ena vinakati kina mo veisautaka na vakarau ni nomu vakasama kei na nomu itovo. (Cakacaka 10:42; Efeso 4:​22-​29; Iperiu 10:24, 25) O ira era muria vinaka na ivakaro i Jisu era na vakatulewataka mera muri koya ena nodra yalataka nodra bula vua na Kalou o Jiova.​—Maciu 16:24.

Kena iKatolu: Mo Papitaiso. (Maciu 28:19) Na iVolatabu e vakatauvatana na papitaiso ina nona bulu e dua. (Vakatauvatana Roma 6:​2-4.) Nona bulu e dua e vakatakarakarataka nona vakamatea na ivakarau ni bula makawa qai tekivu e dua na bula vou. Na nomu papitaiso o vakaraitaka kina e matanalevu ni o sa vakayacora na rua na ikalawa e vakamacalataka o Jisu qai kerea vua na Kalou me solia vei iko na lewaeloma savasava.​—Iperiu 9:​14; 1 Pita 3:​21.

Au na kila vakacava niu sa rawa ni papitaiso?

Veitalanoa kei ratou na qase ni ivavakoso. Eratou na via vakadeitaka ni o kila na veika e okati kina, ni o sa muria tiko na veika o vulica qai yalataki iko vua na Kalou mai vu ni lomamu.​—Cakacaka 20:28; 1 Pita 5:​1-3.

E caka tale ga qo vei ira na gone erau iVakadinadina i Jiova na itubutubu?

Io. Era tuberi na luvei keimami “ena ivakavuvuli kei na ivakasala i Jiova” me vaka ga e vakarota na iVolatabu. (Efeso 6:4) Ia ena vinakati vei ira mera vakatulewataka nodra vulica kei na nodra ciqoma na ivakavuvuli vakaivolatabu ra qai bulataka sara, me rawa nira qai rawata na ivakatagedegede ni papitaiso. (Roma 12:2) O koya gona, na tamata yadua ena vakatulewataka ga na veika me baleta nona sokalou.​—Roma 14:12; Kalatia 6:5.