Raica sara na lewena

Era le Vica na iVakadinadina i Jiova e Veiyasa i Vuravura?

Era le Vica na iVakadinadina i Jiova e Veiyasa i Vuravura?

Ripote ni Yabaki ni Cakacaka * 2020

iWiliwili ni iVakadinadina i Jiova e veiyasa i vuravura

8,695,808

iVavakoso

120,387

Levu ni vanua era vunau kina na iVakadinadina i Jiova

240

O cei e wili mera lewenilotu?

Era vakatokai ga mera iVakadinadina i Jiova o ira era gumatua ni vunautaka e veivula na itukutuku vinaka ni Matanitu ni Kalou. (Maciu 24:14) Qori era wili kina o ira na sa papitaiso mera iVakadinadina kei ira era se bera ni papitaiso, ia era sa rawata na ivakatagedegede mera vakaitavi ena cakacaka vakavunau.

E gadrevi me cau vakailavo e dua ke via lewenilotu?

Sega. E sega ni gadrevi me cau e dua me vakatokai kina me iVakadinadina i Jiova, se me soli kina vua e dua na itavi se ilesilesi ena neimami isoqosoqo. (Cakacaka 8:​18-​20) E levu mada ga na cau e sega ni kilai se o cei e solia. Na gauna, igu, kei na iyau e vakayagataka e dua na iVakadinadina i Jiova me tokoni kina neimami cakacaka e vuravura raraba, e vakatau sara ga vua kei na kena ituvaki.​—2 Korinica 9:7.

Oni kila vakacava e vica era vakaitavi tiko ena cakacaka vakavunau?

Era ripotetaka ena veivavakoso era lewena na iVakadinadina i Jiova na nodra cakacaka vakavunau e veivula. Era sega ni vakasaurarataki mera cakava qori.

E dau cakacakataki na isoqoni kece ni ripote e soli, qai vakau ina valenivolavola ni tabana ni iVakadinadina i Jiova. Na valenivolavola ni tabana ena qai vakauta ina itikotiko liu na isoqoni kece ni ka e rawati ena nodra dui vanua.

Ni oti e dua na yabaki ni cakacaka, * sa na qai kilai na iwiliwili ni iVakadinadina i Jiova ena yabaki ya ena duidui vanua. Era soqoni kece na iwiliwili qori me kilai kina na iwiliwili ni iVakadinadina i Jiova e veiyasa i vuravura. E dau tabaki ena iVolaniyabaki ni iVakadinadina i Jiova na ripote ni veika e rawati ena duidui vanua, kei na irogo ni cakacaka vakavunau. E vakayaloqaqataki keimami na ripote qori, me vaka ga na nodra vakayaloqaqataki na lotu vaKarisito taumada ena itukutuku ni veika era rawata.​—Cakacaka 2:​41; 4:4; 15:3.

Era wili tale ga o ira na se bera ni vunau, ia era sa veimaliwai tiko kei kemuni?

O ira qori era sega ni okati ena kedra iwiliwili na iVakadinadina i Jiova, ia e marautaki na nodra mai veimaliwai kei keimami. Levu era dau tiko ena iVakananumi ni mate i Karisito e veiyabaki. E rawa ni kilai vakacaca na kedra iwiliwili o ira qori ni veidutaitaki na kedra iwiliwili na iVakadinadina i Jiova kei na iwiliwili taucoko ni tamata era tiko ena iVakananumi. Era tiko ena iVakananumi ena 2020 e le 17,844,773.

E levu era se sega ni gole mai neimami soqoni, ia era vulica wale tiko na iVolatabu. Keimami vuli iVolatabu kei na le 7,705,765 e veivula ena 2020, rawa mada ga nira vuli vata e le vica ena dua ga na gauna.

Cava e levu cake kina na iwiliwili ni iVakadinadina i Jiova e ripotetaka na tabana ni wili lewenivanua ni matanitu?

Na tabana ni wili lewenivanua e cakacakataka na iwiliwili e vinakata ni tarogi ira na lewenivanua se ra lotu cava. Kena ivakaraitaki, e kaya na tabana ni wili lewenivanua e Merika ni dau saga me kila ke bau lewena tu e dua na matalotu o koya e vakatarogi. E kaya tale ga ni fika e kumuna rawa ena veivakatarogi e lakovata ga kei na ka e kaya se nanuma e dua, sega ni vakadeitaki na kena dina. Ia keimami wiliki ira ga mera iVakadinadina i Jiova o ira era vunau ra qai ripotetaka nodra cakacaka, sega ni o ira era kaya wale ga nira iVakadinadina.

^ para. 2 Dua na yabaki ni cakacaka e tekivu mai na 1 Seviteba ina 31 Okosita ena yabaki tarava. Kena ivakaraitaki, na yabaki ni cakacaka ni 2015 e tekivu mai na 1 Seviteba, 2014, ina 31 Okosita, 2015.

^ para. 16 Dua na yabaki ni cakacaka e tekivu mai na 1 Seviteba ina 31 Okosita ena yabaki tarava. Kena ivakaraitaki, na yabaki ni cakacaka ni 2015 e tekivu mai na 1 Seviteba, 2014, ina 31 Okosita, 2015.