Raica sara na lewena

Na Website ni iVakadinadina i Jiova

Digia na Vosa vakaViti

Na Cava Era Sega ni Tauri Dra Kina na iVakadinadina i Jiova?

Na Cava Era Sega ni Tauri Dra Kina na iVakadinadina i Jiova?

Eso na nanuma cala

Ka era tukuna e levu: Era sega ni vakabauta na iVakadinadina i Jiova na veiqaravi vakavuniwai.

Kena dina: Keimami qara na veiqaravi vinaka duadua vakavuniwai. Ni keimami tauvimate, keimami qarai ira na vuniwai era matai ena veisele, ia e sega ni vakayagataki kina na dra. Keimami marautaka ni sa toso sara na iwalewale ni veiqaravi ena tabana ni veiqaravi vakavuniwai. E laurai ni sa yaga raraba na veiqaravi vakavuniwai e sega ni vakayagataki kina na dra. Ena levu na vanua, sa rawa vei ira na tauvimate mera digia na veiqaravi e taqomaki ira mai na leqa e vu mai na tauri ni dra, me vaka na matedewa, vakaleqa na cakacaka ni sotia ni yagoda, kei na cala e dau yaco ena gauna ni veisele.

Ka era tukuna e levu: Era vakabauta na iVakadinadina i Jiova ni na vakabula na tauvimate na vakabauta.

Kena dina: Keimami sega ni dau veivakabulai vakacakamana.

Ka era tukuna e levu: E sau levu na veiqaravi vakavuniwai e sega ni vakayagataki kina na dra.

Kena dina: E yaga qai sega ni sau levu na veiqaravi vakavuniwai e sega ni vakayagataki kina na dra. *

Ka era tukuna e levu: Era mate e veiyabaki e levu na iVakadinadina i Jiova, wili kina o ira na gone nira sega ni tauri dra.

Kena dina: E sega ni dina na itukutuku qori qai sega na kena ivakadinadina. Era sa cakava oti na vuniwai e levu na mataqali veisele e sega ni vakayagataki kina na dra, me vaka na veisele ena uto, sui, kei na gacagaca. * Era dau bulabula vinaka o ira na sega ni tauri dra ni oti na veisele, wili kina o ira na gone, ni vakatauvatani kei ira na tauri dra. * Ia se mani cava na ituvaki, eda sega ni vakadeitaka ni na mate e dua na tauvimate ena vuku ni nona tauri dra se sega ena gauna ni veisele.

Na cava era sega ni tauri dra kina na iVakadinadina i Jiova?

Neimami vakatulewa qo e yavutaki ena ka keimami vakabauta, sega ni ka vakavuniwai. E veivakaroti na Veiyalayalati Makawa kei na Veiyalayalati Vou meda vakatabui keda mai na dra. (Vakatekivu 9:4; Vunau ni Soro 17:10; Vakarua 12:23; Cakacaka 15:28, 29) Kena ikuri, ena mata ni Kalou na dra e vakatakarakarataka na bula. (Vunau ni Soro 17:14) Koya gona, keimami sega ni tauri dra ni keimami talairawarawa vua na Kalou kei na neimami doka ni o koya e solia na bula.

Veisau na rai

E rawa ni vakayacori vinaka na veisele lelevu ni sega ni vakayagataki na dra

Era dau nanuma tu na vuniwai ni rivarivabitaki na veisele e sega ni vakayagataki kina na dra, ia sa veisau na rai ena vica na yabaki sa oti. Kena ivakaraitaki, e tabaki ena dua na ivola vakavuniwai ena 2004 ni “sa na muri ena vica na yabaki mai qo na iwalewale ni veisele e dau vakayacori ga vei ira na iVakadinadina i Jiova.” * E tabaki tale ga ena 2010 ena ivola vakavuniwai na Heart, Lung and Circulation “me kua ni yalani ga vei ira na iVakadinadina i Jiova na ‘veisele e sega ni vakayagataki kina na dra.’”

Nikua, era sa sega ni qai vakayagataka e udolu vakacaca na vuniwai na dra ena so na veisele lelevu, era sa sosomitaka qori ena veiqaravi e vakalevutaki kina nona dra o koya e tauvimate ni bera ni lai sele. Na iwalewale ni veiqaravi qori sa vakayacori tale ga ena veivanua se qai vakatorocaketaki tiko, ra ciqoma tale ga na veiqaravi qori o ira na sega ni iVakadinadina i Jiova.

^ para. 8 Raica na ivola Transfusion and Apheresis Science, Volume 33, No. 3, t. 349.

^ para. 10 Raica The Journal of Thoracic and Cardiovascular Surgery, Volume 134, No. 2, t. 287-288; Texas Heart Institute Journal, Volume 38, No. 5, t. 563; Basics of Blood Management, t. 2; and Continuing Education in Anaesthesia, Critical Care & Pain, Volume 4, No. 2, t. 39.

^ para. 10 Raica The Journal of Thoracic and Cardiovascular Surgery, Volume 89, No. 6, t. 918; kei na Heart, Lung and Circulation, Volume 19, t. 658.

^ para. 14 Continuing Education in Anaesthesia, Critical Care & Pain, Volume 4, No. 2, tabana e 39.