Raica sara na lewena

Na Website ni iVakadinadina i Jiova

Digia na Vosa vakaViti

Nodra Vakacegui kei na Nodra Vukei na Tauvimate

Nodra Vakacegui kei na Nodra Vukei na Tauvimate

E dau totolo ga nodra nuiqawaqawa o ira na tauvimate bibi, koya li mera qai gadreva na veiqaravi vakavuniwai, dau qai kuria ga nodra lomaleqa. E volai ena dua na nodra ivola na vuniwai, “e laurai ena dua na vakadidike ni ka era gadreva vakayago, vakayalo tale ga na tauvimate ena vakatau kina vakalevu na nodra bula.” *

Era vakarautaka kina na iVakadinadina i Jiova na veivakacegui vakayalo kei na levu tale na ivukevuke yaga vei ira era vakabauta vata era curu tu e valenibula. Era dau veisiko tale ga na qase ni ivavakoso vei ira na tauvimate era ivavakoso vata. Vakacava ke yawa na vanua e qaravi tiko kina vakavuniwai e dua na iVakadinadina? Era vakarautaka na iVakadinadina i Jiova e dua na ituvatuva mera sikovi kina, e vakatokai na Patient Visitation Groups (PVG) ena siti lelevu e veiyasa i vuravura. Era veisiko wasoma na qase ni vavakoso e valenibula vei ira na iVakadinadina era tauvimate kei na nodra dui matavuvale, era gole mai na veivanua, kei na veimatanitu tani mera mai qaravi vakavuniwai. Era le 28,000 na bolecakacaka ena 1,900 na tabana ni PVG, era qarava tiko e ono na iwasewase lelevu kei vuravura. *

Na veivakacegui vakayalo cava e vakarautaka na tabana ni PVG?

E kaya o William e dua e lewena na tabana qori: “Au dau vakacegui ira na iVakadinadina kei na nodra lewe ni vuvale era sega ni tiko ena dina niu dau veivosaki, au vakarogoci ira tale ga vakavinaka. Au vakadeitaka vei ira ni kila tiko o Jiova na kedra ituvaki qai kauaitaki ira. Era dau marautaka na tauvimate kei na nodra matavuvale nira dau masulaki.”

Levu era vakaraitaka nodra vakavinavinaka ena veivakayaloqaqataki era vakila ena veisiko va qori. E toka e ra eso na irogo mai Merika, ena nodra veisiko tiko vei ira na tauvimate e voleka ni 7,000 na lewe ni PVG.

  • E kaya o Priscilla: “Vinaka vakalevu nomuni sikovi Tamaqu e valenibula ni oti nona strouk. E marautaka vakalevu nomuni veisiko! E qoroya na ituvatuva e vakarautaki qo. Au vakabauta ni vakabulai koya sara ga nomuni veisiko.”

  • E kaya o Ophilia vua e dua na lewe ni PVG ni sa takali o tinana: “E marautaka vakalevu o Tinaqu na nomuni dau sikovi koya mai! E kila ni talai kemuni sara ga mai o Jiova. Vinaka vakalevu nomuni dau veikauaitaki vakayalololoma.”

  • E nuiqawaqawa qai lomabibi vakalevu e dua na tauvimate ni rogoca ni sa vo ga e vica na siga me mate. E solia nona gauna o James e dua na lewe ni PVG me vakacegui koya ena iVolatabu ni vakaraitaka vua na Filipai 4:​6, 7. E kaya o James: “Niu qai lako yani ena siga tarava, sa veisau vakalevu nona ivakarau ni rai. Sa kila tu na kena ituvaki ni na sega ni dede, ia e nuidei ni na tokoni koya o Jiova, e uqeti au sara ga qori!”

Na veivuke cava era vakarautaka na tabana ni PVG?

E vola o Pauline, e mate na watina ena dua na valenibula e yawa mai na vanua rau vakaitikotiko kina: “Vinaka vakalevu nomuni veivuke ena gauna dredre duadua vei keitou vakamatavuvale . E veivakacegui dina nomuni sasaga moni mai veisiko ena bogilevu tu tu, ia oni na cakacaka ena siga tarava. Vinaka vakalevu nomuni tuvanaka vakamatau na vanua me keitou vakaicili kina na le 11, oni qai kauai tiko ga mai ena gauna kece qori. Au vakavinavinakataki Jiova kei na nona isoqosoqo ni vakarautaka na veivuke me keitou vakacegui kina.”

Eratou coqa ena motoka o Nicki, Gayle, kei Robin, e 300 na kilomita na kena yawa mai na nodratou itikotiko. E vakatakilai sara vei Carlos, e lewe tiko ni PVG, me lai waraki ratou ena valenibula ni ratou yaco yani. E kaya o Carlos, “Au tu vakarau meu vakarautaka na veika ratou na gadreva, au mani lai vakaraica sara tiko na nona luve ni koli o Nicki, me rawa ni lai qaravi vakavuniwai.” Oti rau sa qai yaco yani o Curtis kei watina, e dua na veiwatini rau lewe tale ga ni PVG. Rau wawa tiko e valenibula me vica vata na aua me yacova ni ratou yaco yani na nodratou matavuvale na coqa qori. E kaya e dua na nodratou itokani vakavuvale: “Ratou vakacegui kece na le tolu ena veiqaravi e vakayacori vei ratou. E qoroya o Robin, na ganei Nicki, e sega ni iVakadinadina i Jiova, na veivuke kece ratou vakayacora na lewe ni PVG.”

^ para. 2 Na ivola “Addressing Patients’ Emotional and Spiritual Needs,” tabaki ena The Joint Commission Journal on Quality and Patient Safety, Tiseba 2003, Volume 29, Nb. 12, tabana 661.

^ para. 3 Era dau veivuke na qase ni ivavakoso era lewe ni PVG ena ivavakoso era voleka kina mera ivakatawa, qasenivuli, ra dauvunau tale ga. Era sega ni saumi kina, era qarava ga ena marau kei na yalo e vinakata.​—1 Pita 5:2.