Raica sara na lewena

Na Website ni iVakadinadina i Jiova

Digia na Vosa vakaViti

Veivuke na iVakadinadina i Jiova ena Sasamaki

Veivuke na iVakadinadina i Jiova ena Sasamaki

Ena ika6 ni Me, 2017, era veivuke e rauta ni 130 na iVakadinadina i Jiova ena samaki ni veikauloa na Bryukhovychi, volekati Lviv, Ukraine. O ira na lai veivuke qori e tiko nodra yabaki ni bula mai na 22 ina 80. Era vakaitikotiko qai veiqaravi ena valenivolavola ni tabana ni iVakadinadina i Jiova e Ukraine, e toka volekata na veikauloa. E rauta ni 120 na eka na vanua era samaka, qai rauta ni 600 na kilo na benu era kauta laivi ena loma ni tolu ga na aua.

E kaya o Mykhailo Splavinskyi, dua na idinia ena Lviv Forest Breeding and Drilling Center: “Era veitokoni duadua e liu ena samaki ni veikauloa e veiyabaki na iVakadinadina i Jiova, era se tekivu cakava mai qori ena 2014.”

Vuna e Samaki Kina na Veikauloa

E kaya o Mr. Splavinskyi ni “rua na sala e dau benuci kina na veikauloa. Kena imatai, o ira na gole ina veikauloa era dau biuta tu ga e kea nodra benu. Kena ikarua, na benu mai na vanua ni taravale kei na so tale na benu e dau usa yani ena lori, qai lai biu ena veikauloa.”

E vakaleqa vakalevu na veikauloa na benu. E kaya o Mr. Splavinskyi: “E taura e dua na gauna balavu me qai vuca na benu. E vakaduka na wai e lomaniqele, e vakaleqa tale ga na iyaubula.” E maliwai ira na benu e biu ena veikauloa na iloilo. E rawa ni vakavuleqa na iloilo qori ke warumisa na katakata ni siga, e rawa sara ga ni vakavuna me kama na veikauloa. E rerevaki tale ga, vakabibi vei ira na gone, na iloilo kavoro kei na icula (syringe). E kaya o Mr. Splavinskyi: “Ena sega ni yaco na leqa ke kau laivi na benu.”

E sega ni rawarawa me samaki e 8,100 na eka na veikauloa. E kaya tale o Mr. Splavinskyi: “Keitou le lima ga na yadra ena veikauloa, sega ni rawa gona ni keitou samaka ga vakataki keitou na vanua levu ya. Keitou dau kerei ira kina na lewenivanua vakadua ga e veiyabaki mera veivuke ena samaki ni veikauloa.”

Veika e Vauci ena Sasamaki

E soli vei ira na iVakadinadina na qaniliga, palasitika, kei na reki, era sa qai tomika na tavaya, taya, iloilo, kaukamea, pepa, palasitika, kei na icula. E kaya o Ihor Fedak e dau qarava na veikauloa, “ni savasava na vanua era dau samaka na iVakadinadina i Jiova.”

E se sega ni vakalawataki na kena vakasavasavataki eso na benu me rawa ni vakayagataki tale (recycle). Ia ena sasamaki qo, o ira na mai veivuke era biuta vakamataqali vata na benu e rawa ni vakasavasavataki, qai vakayagataki tale me vaka na iloilo, pepa, kei na palasitika. Sa qai kau na benu qori ina dua na kabani me ratou lai vakasavasavataka ni bera ni vakayagataki tale. Me tekivu mai na 2016, era lomasoli na iVakadinadina mera sauma na kena vagalalataki na benu era samaka. E kaya o Mr. Fedak: “Au vakavinavinakataki ira na iVakadinadina i Jiova ena nodra veivuke. Dua na veivuke levu era cakava.”

“Sega ni iTavi Lolovira na Sasamaki”

Era marautaka na iVakadinadina nodra dau veivuke ena samaki ni veikauloa e veiyabaki. Era kauaitaka na savasava ni itikotiko kei na veikauloa. Dua vei ira na iVakadinadina e veivuke o Volker, ra qai duavata kei na nona rai na vo ni iVakadinadina ni kaya: “Sega ni itavi lolovira na sasamaki. E ka dokai meda vukei ira eso tale, au vakila tale ga kina na lomavakacegu.”

E kaya o Anzhelika: “E sega ni bibi meu vaqaqa o cei e benu ca, e bibi ga me kau laivi na benu.” A veivuke tale ga ena sasamaki o Lois, e yabaki 78, qai kaya: “Kua ni cudru ke o taubale tiko o qai raica na benu, e vinaka cake mo tomika qai kauta laivi.”

E kaya e dua na tagane o Wieslaw: “Era kilai keimami tu ga na lewenivanua ni keimami dau vakaisulu vinaka qai vakaneketai, keimami lai wasea na ka keimami vakabauta. Ia keimami rawa ni veitokoni ena so tale na cakacaka yaga me vaka na samaki ni veikauloa, se so tale na ka e yaga raraba vei ira na lewenivanua.”