Raica sara na lewena

Na Website ni iVakadinadina i Jiova

Digia na Vosa vakaViti

Cakacaka e Veivakabulai

Cakacaka e Veivakabulai

Ena 2017, era tuvanaka na iVakadinadina i Jiova e dua na cakacaka lavotaki e rauta ni rua na vula na kena dede. E vakayacori qori ena yasayasa o Tabasco, e Mexico, ni laurai na tubu ni iwiliwili ni lewenivanua era vakamatei ira ga. Era veisoliyaka kina na tacida na ilavelave ni Yadra! e kena ulutaga “Kua ni Soro!​—Tolu na Vuna mo Kua Kina ni Soro.” Era vakavinavinakataka e levu na cakacaka qori.

Veivuke ena Gauna Donu

E iVakadinadina i Jiova o Faustino, a vunau vua e dua na marama e leqataki luvena cauravou e yabaki 22. E lomabibi voli o luvena qai vinakata me vakamatei koya. E sega ni kila o tinana na sala me vukei koya kina. Gauna e solia kina o Faustino na mekesini, e kaya sara, “Qo sara ga na ka e ganiti luvequ.” Ena siga ga e tarava, e sikovi cauravou sara o Faustino rau veitalanoataka sara na ivakasala vakaivolatabu ena mekesini qori. Oti e vica nona veisiko, e veisau sara ga nona itovo o cauravou. E kaya o Faustino, “E laurai vua na lomavakacegu, e mamarau tale ga.” Kuria ya, sa wasea tale ga na veika e vulica vei tacina e dau lomabibi.

E vakaitikotiko o Karla, ena siti o Huimanguillo, e vukei ira nona lewenikalasi ni solia vei ira na mekesini. E kaya, “Au siqema ni matararawa tiko e dua na goneyalewa keirau kalasi vata. Au vosa sara vua, mani talaucaka mai na kena ituvaki e vale. Ni keirau veitalanoa tiko, au raica ni mamavoavoa tu na ligana imawi.” E nona ivakarau me tava na ligana kei na yavana. E kaya ni sega ni taleitaka na kena irairai, sega tale ga ni vakainaki nona bula. Vakaraitaka sara vua o Karla na Yadra! Ni wilika oti ga, e kaya ni vaka ga e volai na mekesini qori me baleti koya. E matadredredre qai kaya ni sa vakainaki na bula.

Dua na ka nona vinakata na veivuke e dua na tagane ena siti o Villahermosa. E vakacegui ena nona cakacaka, biuti koya tale ga o watina kei ratou na luvena. E masu vua na Kalou, ia e nanuma tiko ga ni tawayaga. Na gauna sara ga e voleka ni vakamatei koya kina rau tukituki e nona katuba o Martín kei Miguel rau iVakadinadina i Jiova. E dolava sara na katuba, rau solia sara vua na Yadra! Nona raica na ulutaga, e kaya ni sauma sara ga na Kalou nona masu. Erau mani vakacegui koya ena iVolatabu o Martín and Miguel, rau lesuvi koya tale ni oti e vica na siga. Sa qai malumu na kena ituvaki, e sega ni tale ga ni lomabibi. Gauna qo sa vuli tiko vakarua ena dua na macawa.

Rogoca na ka Dina na Kaivesu

E tiki tale ga ni cakacaka lavotaki qori nodra sikova na iVakadinadina i Jiova e vica na valeniveivesu ena yasayasa o Tabasco me wasei kina vei ira na kaivesu na ivakasala vakaivolatabu me rawa ni vakainaki nodra bula. Era vakaraitaka na iVakadinadina i Jiova e dua na vidio, dua na ivunau vakaivolatabu, kei na nodra veivosakitaka na vuna mera kua kina ni soro me vaka e vakamacalataki ena mekesini. Dua na ka nodra taleitaka na kaivesu kei ira na vakailesilesi na veisiko qori. Kena ivakaraitaki, e kaya e dua na kaivesu: “Vakatolu noqu saga meu vakamatei au. Eso era kaya ni kauaitaki au na Kalou, ia era sega ni vakaraitaka vakaivolatabu na dina ni ka era tukuna. Io, e uqeti au dina na veika oni tukuna tiko qo.”

E kilai raraba na cakacaka lavotaki qori. E vakavinavinakataka mada ga na vunivola ni tabana ni bula ena yasayasa o Tabasco na nodra sasaga na iVakadinadina i Jiova mera vukei ira na tiko ena yalava. E tabaki tale ga ena niusiveva na cakacaka lavotaki qori, kena ulutaga “Nodra Sasaga me Valuti na Lomabibi” (“They Go Out to Fight Suicide”).