Raica sara na lewena

Na Website ni iVakadinadina i Jiova

Digia na Vosa vakaViti

“Era Yaga Vakalevu na Yalewa ena Tarataravaki”

“Era Yaga Vakalevu na Yalewa ena Tarataravaki”

E vakavinavinakataki ira na iVakadinadina i Jiova e dua na isoqosoqo ni tarataravaki e Peritania, ena nodra vakavulici na yalewa ena vakayagataki se draivataki ni misini lelevu. Qori ena gauna e tara tiko kina na valenivolavola vou ni tabana volekati Chelmsford, Essex. E kaya na isoqosoqo ya e vakatokai na Considerate Constructors Scheme * (CCS), ni ratou taleitaka vakalevu nodra vakavulici ira na yalewa na iVakadinadina ena tarataravaki, qai “dua na veisau vou ya.” Na cava e taleitaki vakalevu kina na ka era cakava na iVakadinadina?

E sega mada ga ni 13 na pasede na yalewa e Peritania era cakacaka ena tarataravaki. E laurai ena dua na vakadidike ni dua na kabani e Peritania, ni sega ni levu na yalewa era cakava na cakacaka qori. Ia e rauta ni 40 na pasede ni timi ni tarataravaki e Chelmsford era yalewa. E tubu qori ina 60 na pasede nira sa wili kina o ira era vakayagataka se draivataka na misini lelevu ni tarataravaki.

Cakacaka vata na yalewa kei na tagane e Chelmsford

Era qarava rawa vakacava na yalewa iVakadinadina nodra itavi ena tarataravaki? Era vakila vakalevu na yaga ni vuli kei na veitokoni. Qori e rua na ka e vauci ena ivakarau ni cakacaka e vinakata na CCS me muri. E okati tale ga ena ivakarau ni cakacaka qori na veidokai, veiuqeti, kei na veitokoni e vanua ni cakacaka, kua na veivakaduiduitaki, qai “caka na veivakavulici.”

Vakavulici na Yalewa ena Misini Lelevu

E kaya o Jade e dua na yalewa a vakavulici ena vakayagataki ni misini lelevu, kei na draivataki ni lori lelevu: “Wananavu dina! Au sega ni tadra niu na rawa ni cakava qo. E dredre ena so na gauna na cakacaka, ia au vakavulici tu ga, qai vulica e levu na ka vovou.” Me vakataki Jade, e dau vakayagataka tale ga o Lucy na misini lelevu. E nanuma lesu: “Niu yaco yani ena vanua ni tarataravaki, e sega sara ga vei au na kila vakacakacaka ena yaga ena tarataravaki. Ia ena imatai ni siga au gole kina meu lai cakacaka, au sa vakavulici sara ga. Me yacova mai qo, au sa lewena oti e lima na timi, au sa vakavulici vinaka kina ena cakacaka qo!”

Caka tiko na veivakavulici ena misini lelevu

Era sega ni yaga ga na yalewa ena vakayagataki ni misini lelevu ni tarataravaki. E kaya me baleta nodra itavi na yalewa o Eric e liutaka e dua na timi: “O ira na yalewa era dau maroroya vinaka na misini ni cakacaka ni vakatauvatani kei ira na tagane. Era kila vinaka tale ga ke sega ni cakacaka vinaka na nodra misini, era na ripotetaka sara.”

Nodra Tokoni na Yalewa ena Tarataravaki

O Carl e ovasia ni dua na ilawalawa e dau vakayagataka na misini lelevu ni tarataravaki. E kaya: “Au qoroya dina na maqosa ni nodra draivataka na misini lelevu na yalewa. Eso na gauna, au na digi ira ga na yalewa mera draivataka na misini, dina nira kenadau kina na tagane!”

Vakayagataki tiko e dua na misini e dau sema paipo

Era dau nuidei na tamata cakacaka nira veitokoni na ovasia. E vakadinadinataka qori o Therese e dua e kenadau ena vakayagataki ni misini lelevu. E kila ni vinakati na qaqarauni kei na vakatulewa vinaka ena vanua e vakayagataki kina na misini lelevu me kua ni yaco kina na vakacalaka. E kaya o Therese: “Nona veitokoni o noqu ovasia e vakanuideitaki au, au cakava kina e levu tale na ka, sega ni ka ga e namaki vei au. E sega ni dua na ka na kaukaua ni cakacaka niu kila era taleitaka eso tale, era vakavinavinakataka tale ga!”

Dua tale e dau vakayagataka na misini lelevu ni kelikeli kei na lori lelevu o Abigail. E vakavinavinakataka na veitokoni kei na veivuke e caka vua, e kaya: “O ira na tagane keimami cakacaka vata era sega ni raici au meu ka malumalumu. Era tu vakarau mera veivuke, ia au cakava ga vakataki au noqu cakacaka. Era sega ni saga mera cakava na noqu cakacaka.”

Era Raica Vakabibi, Gumatuataka Nodra Cakacaka

Era sega wale ga ni vakavulici na yalewa mera vakayagataka na misini lelevu ni tarataravaki. Era vakavulici tale ga e Chelmsford mera soveataka na vanua, vakayagataka vinaka na qele kei na iyaubula, ripeataka na misini, qai vakaduria na vata vakaduru (scaffold). E kaya o Robert e cakacaka vata kei ira na yalewa ena levu na tabana, ni dua na ka nodra “raica vakabibi nodra cakacaka, era sega ni dau wele, ra qai saga mera kila vinaka nodra cakacaka.” E kaya o Tom e dau soveataka na vanua: “O ira na yalewa keimami timi vata era muria vinaka sara ga na ka e vauca nodra cakacaka, ra qai gumatuataka. Era vinakata me caka vinaka sara ga.”

Sa rauta me kaya o Fergus e liutaka e dua na timi: “Era yaga vakalevu na yalewa ena tarataravaki!”

^ para. 2 Na Considerate Constructors Scheme e dua na isoqosoqo e kauaitaka vakalevu na ivakarau ni tarataravaki e Peritania.