Raica sara na lewena

Na Website ni iVakadinadina i Jiova

Digia na Vosa vakaViti

iTaba mai Peritania iWasewase 5 (Seviteba 2017 ina Feperueri 2018)

iTaba mai Peritania iWasewase 5 (Seviteba 2017 ina Feperueri 2018)

E laurai ena itaba qo na veika e yaco ena tara vou ni valenivolavola ni tabana ni iVakadinadina i Jiova e Peritania donuya na Seviteba 2017 ina Feperueri 2018.

Na valenivolavola ni tabana e Peritania, ena vanua o Chelmsford.

Seviteba 6, 2017​—iTikotiko C

Vakayagataki tiko qo na iyaya ni cakacaka me botani kina na vanua era cicila tu ena buloko. Oti qori era na qai vakabiri na buloko ena sui ni lalaga me kena ivakadei.

Seviteba 20, 2017​—iTikotiko D

E ilova tiko na daudroini qo na vanua me biu donu kina na lalaga ni vale e tuba ni vakayagataka na misini ni sovea kei na iyaya e dau vakayagataki me vakatautauvatataki kina na vanua e raica tiko. E toka e muri na iTikotiko F, sa vakayacori tale tiko ga e loma na tarataravaki.

Seviteba 27, 2017​—iTikotiko F

Vakayagataka tiko na tacida qo na tavaya wai me suya kina na lalaga simede sa palasita oti, ena saga tale ga me dravia vinaka sara na lalaga qori. Me kua tale ga na vakalusi wai, na tabana e dau raica na cakacaka e sa caka oti (Finishes Department) ena vakayagataka na wai e kumuni ga mai na cagi suasua me waki vata kei na palasita me boroi ena fuloa simede qai vakadavori e delana na kena iukuuku se tiles.

Okotova 3, 2017​—Valenivolavola ni Tabana

Caka tiko na cakacaka ena tautuba ni iTikotiko E, ratou vakayagataka tiko na le va qo na misini levu me caka kina gaunisala. Na gaunisala qo e idewadewa tale ga ina so tale na vanua.

Okotova 10, 2017​—iTikotiko F

E tuvai ira tiko na buloko e dua na turaga yabaki 71 ena lalaga e tuba ni iTikotiko F. Na gauna e tekivu kina na tarataravaki qo, sivia na 100 na iVakadinadina era yabaki 70 vakacaca era vakayagataka na nodra taledi kei na kila mera veivuke kina.

Noveba 16, 2017​—iTikotiko

Qo na itaba mai cake ena yasana imawi. Na itikotiko kece e tiko na kena delavuvu e rawa ni caka kina na tei senikau. Na gauna ga e biu kina na delavuvu, ena sagai me taqomaki mai na suasua, vakarautaki tale ga na kena isalisali ni wai. Oti qori sa na tei sara na senikau era dau bula vakalevu ena vanua qori. E yaga ena veikabula ni tara va qori na kena delavuvu, e vakabula ilavo, lewai vinaka tale ga kina na drodro ni wai ni uca. E toka voleka ga qori e liu na yavu ni iTikotiko A, vaka kina na yavu ni valenivolavola.

Noveba 21, 2017​—iTikotiko F

Era vakacobara tiko na dautaravale na sui ni katuba kaukamea e sa caka oti tu, ena dua na icurucuru ni rumu ena itikotiko qo. Na gauna e kau yani kina, e sega tale ni vinakati me boro, vakaidi se loka, qori e vakarawarawataka tale ga na kena coba.

Noveba 28, 2017​—Valenivolavola

Ra cakacaka tiko qo na dau taravale ni sa karobo na vanua. Era vakadavora tiko na yavu ni vale me na tara kina na valenivolavola. E laurai toka qori ena lomadonu ni itaba na kena coba tiko na kaukamea me rauta ni 20 na mita na kena titobu, qai sova yani kina na simede. E tiko mai dakuna na iTikotiko B.

Tiseba 5, 2017​—iTikotiko E

E vakaliliga tiko e dua na daucakacaka qo na ivakadei ni paipo, ena vukea vakalevu na curu ni katakata ena dokanivale ena vanua era dau kele kina na motoka. Dua tale ga na mataqali papa e biu e dokanivale, mera kua kina ni vakila na batabata o ira na vakaitikotiko ena rumu e cake.

Tiseba 8, 2017​—iTikotiko F

Dua vei ira na dautaravale mai na timi e dau raica na cakacaka e sa caka oti, e sanivevataka vinaka tale na lalaga sa palasitataki oti ni bera ni biu yani cake na kena iubi. Na misini ni saniveva qo e qaraqara tiko na batina, e vakarawarawataka na kena domici tani mai na kuvu.

Tiseba 21, 2017​—Valenivolavola ni Tabana

E vakarautaki tiko qo na gaunisala e yaco sara ina vale e dodo kece tiko mai kina na wa vakalivaliva kei na so tale. Ena vakamai ena kasi, qai sagai me kau tani na tikitiki ni simede era kakabi tu kina, ena tubu mai kina na karasi. Na vanua tale ga qo e tarova na kena dau veidrodroyaki na wai.

Tiseba 26, 2017​—iTikotiko F

E vakayagataki na mataqali paipo qo me vanataka na iboro me boroi kina na lalaga, e boroi tiko qori e dua na valenikuro.

Tiseba 28, 2017​—iTikotiko F

Sa luva tani tiko qori e dua na iwase ni vata vakaduru me rawa ni tekivu tara na varada ni rumu. Na paipo damudamu e toka e lomadonu e pamutaka na cagi katakata ina lomanivale, donuya na vulaililiwa me mamaca kina na fuloa simede, lalaga sa palasitataki oti tu kei na vanua era boro.

Janueri 16, 2018​—iTikotiko F

E masiraka tiko qo e dua na lewe ni timi ena tabana e dau raica na cakacaka sa caka oti, na iubi ni lalaga me dravia vinaka me kua tale ga ni dua na vanua e cicila tiko kina me curuma na cagi. E rawarawa na kena dau vakasavasavataki na lalaga va qori qai yaga dina ena vanua osooso se lakovi vakalevu. Era laurai tiko qori e muri e dua na timi ni boroboro, era boroya tiko na lalaga ra qai ubia tale ga.

Janueri 27, 2018​—iTikotiko E

Ra bose tiko qori o ira na mai cakacaka ni bera ni tekivu nodra itavi ena dua na siga. O koya e liutaka tiko na cakacaka e vakabibitaka mera dau qaqarauni, mera kila tale ga na vanua e rawa ni yaco kina na leqa. Era bolecakacaka eso mai na veitabana mera cakacaka tale ena gauna ni suka, ena kena samaki na iTikotiko F, kei na vanua wavokita ni bera ni tawani.

Feperueri 1, 2018​—iTikotiko F

E vakayagataki na misini qo me vakaoti kina na kena tara na varada ni iTikotiko F. Na kena roka e vakarawarawataka na kena kilai na itikotiko qori, me laurai vinaka tale ga kina na totoka ni draunikau donuya na vulaibotabota. Toka e muri na iTikotiko E, sa luva na iubi e taqomaka tiko na tabavale qori mai na draki ca, ni bera ni luva tale ga na vata vakaduru.

Feperueri 3, 2018​—iTikotiko

Ni sa oti na cakacaka, rau tokitaka tiko e dua na veiwatini na nodrau iyaya ina iTikotiko F, ni oti e dua na siga na kena tara. Nira mai vakaicilitaki vakalekaleka o ira na mai tiko ena tarataravaki, ena rumu era se qai tara vou ga, e lailai kina na ilavo e vakayagataki ena rede kei na sala ni veitosoyaki, levu tale ga kina na ka era rawa ni cakava o ira na mai cakacaka.

Feperueri 12, 2018​—iTikotiko A

Saumi e dua na kabani me pamutaka na simede ena i kelekele ni motoka ena yakavi bogi. Toka e muri na iTikotiko B.

Feperueri 15, 2018​—iTikotiko E

Rau varota tiko na veiwatini qo e dua na mataqali vatu e dau vakayagataki me teveli ni vakasaqa ni vakayagataki kina e dua na mataqali ivaro e rawa tale ga ni dau domica na kuvu. Ni voleka toka ga na vanua e varo tiko kina ena sega so ni leqataki na kena vakacacani ena gauna me tokitaki kina me lai coba.