Raica sara na lewena

Na Website ni iVakadinadina i Jiova

Digia na Vosa vakaViti

Era Bolecakacaka me Veisautaki o Tuxedo

Era Bolecakacaka me Veisautaki o Tuxedo

Ni voleka na vitu ena mataka e Tuxedo, Niu Yoka, e karakarawa na lomalagi qai cevata na drano e tiko e yasa ni dua na vale taba va, era gole tiko kina eso na yalewa kei na tagane era dara tu na isulu ni cakacaka kei na kena ivava. Eso era gole mai na otela kei na vale voleka ga, so tale era gole sara mai Patterson, Wallkill, kei Brooklyn, e rauta ni 80 na kilomita na kena yawa.

Ia e levu sara era gole mai vakayawa ena duidui yasana e Merika kei na veivanua tale eso. Era bole mera mai cakacaka e Tuxedo me dua na macawa, ono na macawa, se balavu sara. Era sauma vakataki ira na nodra ilakolako, ra sega tale ga ni saumi ena nodra cakacaka, ia era marau mera veiqaravi e keri.

Ena gauna qo e rauta nira le 120 qai sega ni vakabekataki ni na tubu na iwiliwili qori ena vula mai qo. Era dabe kece ena valenikana, le tini ena dua na teveli. E levu era dau gunu kofi qai kana lewe ni vuaka. Ena 7:00 na kaloko, era sarava na kena veivosakitaki e dua na tikinivolatabu. Ni oti e tinikalima na miniti, sa tekivu na katalau. Era kana lewe ni vuaka, madrai, yaloka, kei na poreti. E sega ni leqa na kakana.

Ni oti na katalau ena caka tale e dua na masu qai tekivu sara na cakacaka. O ira na lesi ena tarataravaki, era dara na nodra isala ni cakacaka, matailoilo, kote ra qai kauta yani nodra iyaya ni cakacaka.

E nodra inaki mera veisautaka na vale ni tabaivola e vakatokai na International Paper Company me vale e maroroi kina na iyaya ena tara kina na itikotiko liu ni iVakadinadina i Jiova. Na itikotiko liu qori ena tara volekata na tauni o Warwick. E veisautaki na vale ni tabaivola qori me rumu ni moce, ofisi, vanua ni cakacaka kei na maroroi ni iyaya. Ena siga Tusiti, ena ika12 ni Maji 2013, sa soli na veivakadonui me veisautaki na vale ni tabaivola e Tuxedo.

Na cava era raica na bolecakacaka nira yaco yani ena nodra icili? E kaya o William mai New Jersey, “Ena imatai ni siga, ena vakaraitaki vei iko na nomu rumu, na ivakavakayagataki ni ki, kei na vanua era tu kina na dui tabana. Sa dua na ka na veikauaitaki. Ni oti na katalau, o na lai raici koya e liutaka na cakacaka me lesia na ka mo cakava.”

E vakacava sara tu mada na cakacaka eke? E kaya o Yajaira mai Puerto Rico kei watina: “Keirau yadra ena veimama ni va, samaka na rumu, yadua na bilo kofi, lai vodo sara ena basi. Ni oti e dua na siga, keirau wawale ia keirau marau tu ga, vaka tale ga kina o ira na kena vo.”

Na vanua o Warwick e tu e lomaniveikau. Rau gole mai Minnesota o Zach kei na watina o Beth. E tukuna o Beth na vuna rau via veivuke kina: “Keirau vakabauta ni sala vinaka duadua mo marautaka kina nomu bula oya mo qaravi Jiova. Keirau via vakayagataka na neirau taledi me keirau qaravi koya kina.”