Raica sara na lewena

Na Website ni iVakadinadina i Jiova

Digia na Vosa vakaViti

“Vinaka Cake Mai na iYaloyalo”

“Vinaka Cake Mai na iYaloyalo”

E vakaraitaki e veiyabaki na vidio ena nodra soqo na iVakadinadina i Jiova. E levu na vidio qori era dau vakavalagi ga. E rawa vakacava mera kila na vica vata na drau e duidui na nodra vosa na veika era sarava? E vakadewataki na vidio qori ena so tale na vosa. E yaga vakacava na kena vakadewataki na vidio qori vei ira na tiko ena soqo?

Ka Era Tukuna na Tiko ena Soqo

Dikeva mada na ka era kaya eso era sega ni iVakadinadina i Jiova era tiko ena soqo a caka mai Mexico kei so tale na vanua e Merika e Loma:

  • “E matata sara ga vei au na vidio e vaka sara ga au tu ena vanua e caka tiko kina na vidio. E tara sara ga na lomaqu.”​—Dua na tagane a tiko ena soqo ena vosa vakaPopoluca mai Veracruz, Mexico.

  • “E vaka ga au tu mai na koro, qai veitalanoa tiko kei na dua na noqu itokani voleka. E vinaka cake mai na iyaloyalo era dau vakaraitaki tu niu kila vinaka na ka kece e tukuni.”​—Dua na tagane a tiko ena soqo ena vosa vakaNahuatl mai Nuevo León, Mexico.

  • “Niu raica na vidio ena noqu vosa, e vaka era vosa sara tiko ga vei au o ira na vakaraitaki tiko ena vidio.”​—Dua na yalewa a tiko ena soqo ena vosa vakaChol mai Tabasco, Mexico.

  • “Na isoqosoqo qo e raica na nodra vukei na lewenivanua ena nodra vosa sara ga. E sega ni dua tale na isoqosoqo e cakava qori!”​—Dua na tagane a tiko ena soqo ena vosa vakaCakchiquel mai Sololá, Guatemala.

Era sega ni sauma na iVakadinadina i Jiova e dua e kenadau ena katokatoni, wili tale ga kina o ira na katoni. Na vanua mada ga e se bera ni vakatoroicaketaki se vanua tu yawa, e caka tale ga kina na katokatoni. Ia e totoka vakaoti na katokatoni. E rawati vakacava qori?

“Cakacaka Veivakacegui Duadua”

A caka wale tiko ga qo ena valenivolavola ni tabana ni iVakadinadina i Jiova e Merika e Loma na kena vakadewataki na vidio kece ni soqo ena vosa vakaSipeni kei na 38 tale na vosa ena vanua qori. Era bolecakacaka kina e rauta ni 2,500. E caka na katokatoni qori ena valenivolavola ni tabana, valenivolavola ni vakadewa tu yawa, kei na so tale na vanua ni katokatoni ena nodra veivuke na kenadau ena katokatoni kei ira na daunivakadewa. E sivia e 20 taucoko na vanua era cakacaka kina na timi qori e Belize, Guatemala, Honduras, Mexico, kei Panama.

Caka tiko na katokatoni ena valenivolavola ni tabana e Merika e Loma

E vinakati kina na cakacaka vagumatua kei na qaseqase me rawa ni caka e dua na vanua ni katokatoni rawarawa ga. Na kena sagai me kua ni levu na rorogo ena gauna ni katokatoni, e vakayagataki kina na veika era tu vakarawarawa me vaka na itutuvi kei na meteresi.

O ira mada ga na vakayagataki mera katoni ena nodra vosa ga, era sega ni rawati ira, e ka ni sasaga tale ga vei ira mera dau gole yani mera lai katoni. Eso mada ga e rauta ni 14 na aua na balavu ni vanua mera lakova mera qai yaco ina vanua ni katokatoni! E dua mada ga na veitamani rau taubale me walu na aua me yaco ena vanua ni katokatoni.

Ni tubu cake tiko o Naomi e dau veivuke ena kena tara na vanua ni katokatoni. E nanuma lesu: “Au dau rai vakanamata ina macawa ni katokatoni. Ena dau gumatua o Ta me vakarautaka na ka me caka. Ena so na gauna, e rawa ni vakasaqara na kakana o Na me vakani kina e le 30 na bolecakacaka.” Sa veivuke tiko o Naomi ena gauna qo ena valenivolavola ni vakadewa e Mexico. E kaya: “E sega ni tukuni rawa na levu ni noqu marau niu solia noqu gauna ena nodra vukei na lewenivanua ena nodra vosa mera mai kila na iVolatabu. Qo e cakacaka veivakacegui duadua au bau vakaitavi kina.”

E dau caka e veiyabaki na nodra soqo na iVakadinadina i Jiova e veiyasa i vuravura, e dola raraba tale ga vei ira na lewenivanua. Me ikuri ni ivakamacala rai ena iwasewase na SOQO.