Raica sara na lewena

Na Website ni iVakadinadina i Jiova

Digia na Vosa vakaViti

Watchtower Farms​—50 na Yabaki ni Tatamusuki

Watchtower Farms​—50 na Yabaki ni Tatamusuki

Rauta ni 145 na kilomita (90 na maile) ena vualiku kei Niu Yoka, volekati Wallkill, e tiko kina eso na iteitei kei na vanua ni susu manumanu e yaga sara vakalevu ena nodra cakacaka ni veivakavulici ena iVolatabu e vuravura raraba na iVakadinadina i Jiova. E vica vata na iteitei kei na vanua ni susu manumanu qori e vakatokai na Watchtower Farm ena gauna qo, a voli ena 50 na yabaki sa oti, ena Janueri 2, 1963.

E kaya o David Walker, e dua na iVakadinadina i Jiova a veiqaravi tu e Wallkill ena gauna e se qai tauyavu kina: “E tubu tiko ga na kedra iwiliwili na veiqaravi ena itikotiko liu ni iVakadinadina i Jiova e Brooklyn, Niu Yoka, qai vinakati me veiraurau kei na cau na kakana e voli. Eso tale na vanua ni iteitei e rauta ni ono ina walu na aua na kena yawa mai Brooklyn. O Wallkill ga e taura e rua na aua.” Toso na gauna era volia na iVakadinadina i Jiova na qele ni teitei e Wallkill qai tei kina na kakana draudrau, vuata, e susu tale ga kina na manumanu me vaka na vuaka, toa, kei na bulumakau, era bulia ga na kedra jisi, bata, yogurt, kei na medra sucu. Toso na gauna e vakalevutaki na iteitei.

Ena loma ga ni tini na yabaki e tubu na iwiliwili ni iVakadinadina i Jiova, e vinakati kina me vakalevutaki o Wallkill. Toso na gauna e caka tale e kea na tabaivola, e yaga ena tatamusuki vakayalo e tukuna o Jisu. (Maciu 9:37; Luke 10:2; Joni 4:​35, 36) Dikeva mada eso na cakacaka e Wallkill.

Tabaivola: Ena loma ni ika 20 ni senitiuri, e tabaki na ivola e yavutaki vakaivolatabu e Brooklyn. Ia ni toso cake na iwiliwili ni ivola e vinakati, sa lailai kina na vanua ni tabaivola. Ena 1973, e tara e dua na vale ni tabaivola vou e Wallkill. Toso na gauna e vakalevutaki tiko ga me yacova sara na yabaki 2004.

Tabana ni Kompiuta: Ena 1979, e dua na timi ni iVakadinadina i Jiova e Wallkill e bulia e dua na porokaramu ni kompiuta, e vakatokai na Multilanguage Electronic Publishing System (MEPS). Qo e vakatotolotaka na vakarautaki ni ivola ena sivia na 600 na vosa.

Vuli: Ena 1988 e tokitaki na koronivuli o Kiliati mai Brooklyn i Wallkill, tekivu na kalasi ena 17 ni Okotova. E caka tiko na vuli e kea me yacova na gauna e toso kina ina Watchtower Educational Center e Patterson, Niu Yoka, ena Epereli 1995.

Me vakataki ira na so tale na dauteitei, ena loma ni 50 na yabaki sa oti e veisautaka tale ga na Watchtower Farm, na iwalewale ni teitei kei na misini e vakayagataka. Ia e saga tiko ga me vakarautaka na kakana vinaka me baleti ira na iVakadinadina i Jiova era veiqaravi tiko ena Peceli e Niu Yoka, Merika.

Ena gauna qo e vakalevutaki tiko na Watchtower Farm ni tara na ofisi vovou, rumu, kei na ikelekele ni motoka. E vakavinakataki eso tale na ka. Na cakacaka kece ena veivuke vakalevu ena kena vakarautaki vinaka na kakana vakayalo vei ira na ka vovou era tabili tiko mai mera kilai Jiova.

E kaya o David Walker: “Ena 50 na yabaki sa sivi, dua na ka na noqu marau niu raica na veisau levu e Wallkill ena gauna e tauyavu kina me yacova mai qo, e yaga vakalevu ena noda cakacaka ni veivakavulici ena iVolatabu!”