Raica sara na lewena

Na Website ni iVakadinadina i Jiova

Digia na Vosa vakaViti

Vuavuaivinaka na Cakacaka Lavotaki e Lapland

Vuavuaivinaka na Cakacaka Lavotaki e Lapland

Ena vanua levu e kovuti e Finiladi, Norway kei Suwiteni era vakaitikotiko kina na Saami. Qo o ira na itaukei e tiko ga nodra itovo, ivakarau ni bula kei na vosa. E rua na ka era cakava na iVakadinadina i Jiova mera wasea kina vei ira na itukutuku ena iVolatabu.

Kena imatai, na vulaibotabota ena 2015 era vakarautaka na ivola vakaivolatabu kei na vidio ena vosa vakasaami. * Kena ikarua, na cakacaka lavotaki ena 2016 kei na 2017 era gole na iVakadinadina i Jiova e Lapland mera lai wasea na itukutuku vinaka vei ira Saami. Qo na vanua galala era dau yavoki tu kina na manumanu kei na qele ni dia.

“Cakacaka yaga ina itikotiko”

Na cakacaka lavotaki ena Me 2017, e sivia na 200 na iVakadinadina i Jiova e Finiladi, Norway, kei Suwiteni era bole mera gole ena veikoro lalai era veituyaki e Lapland. E rauta ni udolu na kilomita vakarivirivi na kena yawa. Eso era vulica rawa na ivosavosa vakasaami qai dua na ka nodra taleitaka na vakaitikotiko e kea. E kaya o Denis, “era kauaitaki keimami nira taleitaka na neimami sasaga me keimami vosataka nodra vosa. Era raica tale ga ni keimami kauaitaki ira dina.”

Era dau vakamareqeta na Saami na veika bula kei na manumanu, era marautaka vakalevu kina na yalayala ena iVolatabu me baleta na parataisi e vuravura. (Same 37:11) Kena ivakaraitaki, e vulica e dua na marama na iVolatabu ni vakayagataki na brochure, iTukutuku Vinaka Mai Vua na Kalou! Ni sa kila na ka ena cakava na Kalou vei keda e vaqaqa sara ga se cava na vuna e sega ni kaya kina vei ira o nodra italatala.

E levu era vakavinavinakataka nodra gole yani na iVakadinadina i Jiova. Kena ivakaraitaki, dua na taukeinisitoa e raici rau na iVakadinadina i Jiova qai vakacaucautaki rau. E kaya ni rau cakava tiko na “cakacaka bibi e yaga ina itikotiko” e sureti rau sara ina nona sitoa, qai kaya me rau taura ga na kakana rau vinakata. Rau na sega ni sauma kina e dua na ka.

Na nodra veisiko qori era sarava rawa kina o ira na Saami e rauta ni 180 na vidio, era taura tale ga e sivia na 500 na ivola. Era na kerea ga na ivola e tiko kina nodra vosa. Kena ikuri era tekivutaka rawa kina na iVakadinadina i Jiova e 14 na vuli iVolatabu.

“Nodra cakacaka na kenadau”

E levu era wilika na ivola era vakavinavinakataka na ivakatagedegede ni nodra vakadewa na iVakadinadina i Jiova. Dua na qasenivuli o Nilla Tapiola e vakailesilesi tale ga ni Palimedi e Saami, e kaya: “E totoka vakaoti na nomuni vakadewa, e rawarawa ni wiliki qai vakayagataki tale ga na vosa donu.” E dua na turaga ni Saami e vakaitikotiko e Finiladi, e kaya: “Era cakava ga na kenadau na cakacaka qo.”

Donuya na iyala ni vanua e Finiladi kei Norway e toka kina o Karigasniemi, rau vakamacalataka na iVakadinadina i Jiova vei qasenivuli na imatai ni lesoni ena brochure, iTukutuku Vinaka Mai Vua na Kalou! Ni raica na ivakatagedegede ni vakadewa e kerea sara ga me vakayagataka e koronivuli me vakavulica kina na vosa vakaSaami.

E levu na vidio, tikidua, kei na brochure sa vakadewataki ena vosa vakasaami. Tekivu ena ika29 ni Feperueri 2016 sa tiko tale ga ena website na jw.org na vosa vakasaami. E veivula e sivia e 400 na gauna nodra rai tiko ena website o ira era vosa vakasaami, era download kina e rauta ni 350 na katokatoni rogoci, kei na vidio sa vakadewataki tu ena nodra vosa.

Dua na ka nodra vakayaloqaqataki na Saami kei ira na bole ena cakacaka lavotaki qo. E kaya o Henrick kei Hilja-Maria rau gole i Utsjoki: “E levu na sala era raica o ira na vosa vakasaami ni yaga dina vei ira na iVolatabu.” Rau kaya tale ga o Lauri kei Inga: “Na cakacaka qo keirau vakasamataka kina ni sega ni dau veivakaduiduitaki na Kalou. Keirau marau ni vakaraitaka nona loloma vei ira na tu ena vanua yawa qo.”

^ para. 3 E vica toka na vosa vakasaami (kilai tale ga me Sami). E kaya na Encyclopædia Britannica nira “vakayagataka vakalevu na Noca Sami, qai rauta ni rua na ikatolu era vosataka na vosa qori.” Era vakadewataka gona na iVakadinadina i Jiova na ivola ena vosa vaka Noca Saami. Me vakarawarawataki e tukuni ga na “Saami” me vakaibalebaletaka na vosa era vakayagataka e levu.