Raica sara na lewena

Era Dara na Tikinisulu Lokaloka

Era Dara na Tikinisulu Lokaloka

E vakaitikotiko o Maud e Varanise, qai cakacaka tiko ena dua na koronivuli me vukei ira na gone lokiloki ni vakacagau tiko na kalasi. Wale tiko ga qo era vulica na gone na Veivakararawataki nei Itala, kei na keba ni veivakararawataki na Nazi. Era na dara na kaivesu nodra unifomu e cula tu kina e dua na tikinisulu. Na roka ni sulu qori kei na kena ibulibuli e vakaibalebaletaka na vu ni nodra tiko e e valeniveivesu.

Me baleta na tikinisulu lokaloka era dara eso na kaivesu, e kaya e dua na qasenivuli: “Vaka vei au e vakaraitaka tiko ya nira veimoceri vakatagane se vakayalewa.” Oti na kalasi, e kaya sara o Maud vei qasenivuli nira vakayagataka na Nazi na tikinisulu lokaloka me kedra ivakatakilakila na iVakadinadina i Jiova. * E kaya tale ga ni na vakarautaka eso na itukutuku me baleta na ulutaga qori. E vakadonuya sara o qasenivuli, qai kerei Maud me wasea na itukutuku qori vei ira na gonevuli.

Ena dua tale na kalasi, a veivosakitaka e dua na qasenivuli na ulutaga qori ni vakayagataka na itaba ni ivakatakilakila era dara na kaivesu. E laurai vinaka tu kina na tikinisulu lokaloka e vakaibalebaletaki vei ira na iVakadinadina i Jiova. Oti na kalasi, e solia sara o Maud eso na itukutuku me baleta na ulutaga qori. E taura o qasenivuli qai kerei koya me vosa vei ira na gonevuli.

Taura toka o Maud na ivola vakaivolatabu e vakayagataka

E vosa sara o Maud me 15 na miniti ena imatai ni kalasi. Ni voleka ni oti nona vosa, e kaya na qasenivuli vua: “Vakamacala tale me dua na aua.” E vakaraitaka sara o Maud na vidio ni nodra vakararawataki na iVakadinadina i Jiova vei ira na Nazi. Ni tukuni ena vidio nira kauta na Nazi e 800 na gone mai vei ira nodra itubutubu, e cegu o Maud qai wilika na ka ratou sotava e tolu na gone. Oti na saravi ni vidio, sa qai wilika o Maud nona ivola ni vakamoce o Gerhard Steinacher e yabaki 19, vei rau nona itubutubu ni bera ni vakamatei vei ira na Nazi. *

E vakaraitaka tale qori o Maud ena ikarua ni kalasi. Eda qoroya dina nona yaloqaqa o Maud, rau sa vakadeitaka tale ga na qasenivuli me rau na vakamacalataka vei ira na gonevuli nodra vakararawataki eso ena keba ni veivakararawataki ni Nazi.

^ para. 3 Ena iKarua ni Valu Levu, era bala e valeniveivesu na iVakadinadina i Jiova e Jamani, nira sega ni via tokoni ira na Nazi, era kilai tale ga na Bibelforscher (Gonevuli ni iVolatabu).

^ para. 5 A totogi mate o Gerhard Steinacher ni sega ni via curu ena mataivalu e Jamani. E vola: “Au se gone. Ena kaukaua ga ni Turaga, au na tudei kina, qori sara ga na ka au kerea.” E vakamatei o Gerhard ena mataka tarava. E volai ena ulu ni nona ibulubulu: “E mate ni vakarokorokotaka na Kalou.”