Raica sara na lewena

E VEISAUTAKA NA BULA NA IVOLATABU

Keirau sa Qai Duavata kei Ta

Keirau sa Qai Duavata kei Ta
  • SUCU: 1954

  • VANUA: Yatu Filipaini

  • KA E KILAI KINA: Galuvi tamaqu tu vakadede ni dau voravora

NOQU BULA E LIU

E levu na saravanua era dau lai sarava yani na savu kilai levu e volekata na tauni o Pagsanjan ena Yatu Filipaini. Qori sara ga na vanua a susu dravudravua kina o tamaqu na yacana o Nardo Leron. Ni raica tiko na veidabui ni matanitu, ira na ovisa, kei ira e valenicakacaka, e vakavuna nona dau veivala qai cudrucudru.

Erau dau cakacaka vagumatua na noqu itubutubu me keitou qaravi kina na walu na gone. Rau sega gona ni tiko wasoma e vale ni rau sa dau tu ga ena iteitei e veiulunivanua. O yau gona kei na tuakaqu o Rodelio keirau sa dau qaravi keirau tu ga vagone, keirau dau walokai vakalevu. Keitou sega ni dau qito me vakataki ira na vo ni gone. Na gauna ga sa yabaki vitu kina e dua vei keitou, ena lai vakacakacakataki ena iteitei, me cola taga niu, qai vakamuri sala ena veiulunivanua vatuvatu. Ke sega ni colata rawa e dua na taga qori, ena vakaukauataki me yarataka.

Keitou dau vosota nona kuitalaki keitou o Ta, ia e mosimosi sara neitou dau raica nona mokuti Na. Keitou saga me keitou tarovi koya, e dreve ga. Keirau mani bosea lo kei Rodelio me keirau na vakamatei Ta ni keirau sa qase. Au dau diva me dua na tamaqu dauloloma!

Ni votivoti qai vakacudrui au na nona itovo voravora o tamaqu, au biubiu kina e vale niu se qai yabaki 14. Au bula tu kina vakalailai ena salatu, tekivu vakayagataka tale ga na mariwana. Oti au lai cakacaka sara e waqa, meu dau vakasarasarataki ira na dausaravanua ena savu.

Au tekivu vuli ena univesiti e Manila ni oti e vica na yabaki. Ia niu dau lai cakacaka tale tiko i Pagsanjan ena muanimacawa, e lailai kina noqu gauna ni vuli. E dredre noqu bula qai sega ni vakainaki, sega tale ga ni vakaotia noqu lomaocaoca na mariwana. Au tekivu vakayagataka kina eso tale na wainimategaga era kaukaua sara me vaka na methamphetamines, cocaine, kei na heroin. Na vakayagataki ni wainimategaga e tini ga ena veiyacovi tawadodonu. Au vakadinadinataka tale ga na bula dravudravua, lewa ca, kei na rarawa. Au cata matua na matanitu niu beitaka ni vakavuna na veika kece qori. Au taroga kina na Kalou, “Cava e va tu kina qo na bula?” Ia au sega ni kunea e dua na kena isau ena levu na lotu au lako kina. Au sa qai vakayagataka ga vakalevu na wainimategaga meu vunia kina na noqu yalolailai.

Era tuvanaka na gonevuli mai na Yatu Filipaini ena 1972 e dua na vakaduiduile mera saqata kina na matanitu. Au bau vakaitavi tu ena dua na vakaduiduile qori, ni tini sara ga ena basulawa. E levu era vesu, oti tale e vica na vula sa veiliutaki na mataivalu ena vanua qori.

Au se baci lai bula tu ena salatu, ia qo au sa rerevaki ira na vakailesilesi ni matanitu niu a vakaitavi tale ga ena vakaduiduile. Au dau butako meu voli wainimategaga kina, au vakarautaka tale ga eso na veiqaravi tawadodonu vei ira na vutuniyau kei na vulagi. Au sega sara ga ni via kauaitaka noqu bula.

Rau sa tekivu vuli iVolatabu tale ga kei ira na iVakadinadina i Jiova o tinaqu kei na dua na taciqu. E sega sara ga ni taleitaka o tamaqu, qai vakama na ivola vakaivolatabu. Ia rau vosota tiko ga rau qai papitaiso me rau iVakadinadina i Jiova.

Dua na siga e vakamacalataka vei tamaqu e dua na tacida na yalayala ni iVolatabu me baleta na kena sa na roboti vuravura na lewadodonu ena dua na gauna se bera mai. (Same 72:12-​14) E taleitaka na yalayala qori o tamaqu, e via vakadikeva sara ga vakataki koya. E vakadinadinataka ena iVolatabu na yalayala ni Kalou me baleta e dua na matanitu e lewa vakadodonu, e vulica tale ga na ka e vinakata na Kalou mera cakava na tagane vakawati kei ira na tama. (Efeso 5:​28; 6:4) Sega ni dede sa iVakadinadina i Jiova tale ga o tamaqu kei ratou na vo ni taciqu. Au sega vakadua ni kila tu na veika qori niu yawa mai vale.

VEISAUTAKI AU NA IVOLATABU

Au toki i Ositerelia ena 1978. E vanua vinaka qai levu kina na ilavo, ia au sega tiko ga ni lomavakacegu. E dredre dina meu biuta na gunu kei na vakayagataki ni wainimategaga. Ena loma tiko ga ni yabaki qori era sikovi au yani na iVakadinadina i Jiova. Au taleitaka na vuravura rau vakaraitaka vei au ena iVolatabu ni na vakilai kina na bula vakacegu, ia au qaqarauni sara na veimaliwai kei ira.

Sega ni dede au lesu ina Yatu Filipaini me vica na macawa. Ratou tukuna vei au na taciqu ni sa saga o Ta me dua na turaga vinaka, ia au se cudruvi koya tiko ga, au sega ni vinakata me keirau sota.

E vakamacalataka vei au o ganequ mai na iVolatabu na vuna sa rui levu kina na rarawa kei na lewa ca. Au kurabui ni dua na goneyalewa lailai va qori e kila na isau ni taro au dau vaqaqa voli. Ni bera niu lesu e solia vei au o tamaqu na ivola E Rawa Mo Bula Tawamudu ena Parataisi e Vuravura. * E kaya: “Sa rauta mada nomu vaqaqara tiko. Ena sauma na ivola qo na ka o vaqaqa voli.” E uqeti au sara ga qori meu vaqarai ira na iVakadinadina i Jiova e Ositerelia.

Au muria na ivakasala i tamaqu, au lako sara ena dua na Vale ni Soqoni ni iVakadinadina i Jiova volekata ga noqu vale e Brisbane. Au mani vakadonuya meu vuli iVolatabu. Au vulica ena so na parofisai vakaivolatabu me vaka na Taniela wase 7 kei na Aisea wase 9, na veika me baleta na Matanitu ni Kalou e sega kina na veidabui. Na matanitu sara ga qo ena liutaki keda na tiko e vuravura ena dua na gauna se bera mai. Au vulica tale ga nida na marautaka na bula ena dua na Parataisi e vuravura. Au vinakata me vakadonui au na Kalou, ia au kila ni dodonu meu lewa matau mada na ivakarau ni lomaqu, meu biuta na wainimategaga kei na gunu, meu tinia tale ga noqu bula vakasisila. Au mani biuta na yalewa keirau sa mai tiko vata, vaka kina na veika au bobula tu kina. Na levu ga ni noqu nuitaki Jiova, au kerea tiko ga vua me vukei au niu veisautaka tiko eso tale na ka ena noqu bula.

Au sa qai kila ni veika au vulica tiko e rawa ni veisautaka nona bula e dua. E kaya na iVolatabu ke da saga eda na rawa ni sulumaka na “itovo vou.” (Kolosa 3:​9, 10) Niu saga meu cakava qori, au raica ni rawa ni dina na ka e tukuni tiko me baleta nona sa veisau o tamaqu. Au vinakata me keirau veiyaloni kei Ta, meu kua ni cudruvi koya se cati koya tiko ga. Au vosoti tamaqu, oti tale ga na cudru au katona voli niu se gone sara.

KENA YAGA VEI AU

Niu se cauravou, au dau vakamuria nodra itovo ca se veivakaleqai eso tale. Au vakadinadinataka sara ga na ivakaro ni iVolatabu ena noqu bula, na ilala ca e vakacacana na itovo vinaka. (1 Korinica 15:33) Ia sa tiko na noqu itokani nuitaki era iVakadinadina i Jiova, ra vukei au tale ga meu tamata vinaka. Na noqu veimaliwai kei ira, au sotava gona na marama totoka e qai watiqu o Loretta. Keirau sa vukea tiko eso tale mera vulica na iVolatabu.

Kana tiko kei watiqu, so tale ga na itokani

Au vakavinavinaka ena veivuke ni iVolatabu, au raica vei tamaqu na ka au sega ni nanuma ni na rawati, oya me dua na tagane vakawati daulomani tinaqu, e yalomalumalumu, e lotu vaKarisito qai taleitaka na bula veiyaloni. E mokoti au ena imatai ni gauna ni keirau sota niu sa papitaiso oti meu iVakadinadina i Jiova ena 1987!

E sivia na 35 na yabaki nodrau cakacaka vata voli o Ta kei Na, me rau tukuna vei ira eso tale na inuinui ena iVolatabu. E turaga mamakutu qai dau veikauaitaki, kilai tale ga nona dau veivukei. Ena gauna qori au vulica meu dokai koya, lomani koya tale ga. E ka dokai dina vei au me kilai niu luvena! E takali o Ta ena 2016, ia au dau nanumi koya vakalevu, niu kila ni keirau a vakayacora e levu na veiveisau ena neirau bula me keirau muria na ivakavuvuli vakaivolatabu. Sega tale niu qai cati koya tiko. Au vakavinavinaka tale ga niu qarava na Tamada vakalomalagi o Jiova, e yalataka ni na vakaotia na ka kece e vakavuna tiko na rarawa ena vuvale e veivanua kece.

^ para. 20 Tabaka na iVakadinadina i Jiova, ia sa sega ni tabaki nikua.