Raica sara na lewena

Na Website ni iVakadinadina i Jiova

Digia na Vosa vakaViti

E VEISAUTAKA NA BULA NA IVOLATABU

“Au Nanuma Niu sa Marautaka tu na Bula”

“Au Nanuma Niu sa Marautaka tu na Bula”
  • SUCU: 1962

  • VANUA: Kenada

  • KA E KILAI KINA: iVakarau ni bula vakasisila

NOQU BULA E LIU

Au sucu e Montreal, na ikarua ni korolevu ena yasana o Quebec, e Kenada. Keitou le va na veitacini, e toka neitou vale ena itikotiko totoka o Rosemont rau qai veisusu vinaka na neitou itubutubu. E vakilai na vakacegu kei na marau ena neitou vuvale.

Au dau taleitaka na iVolatabu niu se gone. Gauna au yabaki 12 kina, au wilika ena Veiyalayalati Vou na itukutuku kei Jisu, dua na ka noqu taleitaka. Au via vakatotomuri koya ni tarai au sara ga na nona loloma kei na veinanumi. Ia au mani sega ni cakava qori nira vakamuai au cala noqu ilala.

E daunivakatagi o tamaqu, qai solia vei au na nona iyaya ni vakatagi (saxophone). Qori e vu ni noqu galeleta na ivakatagi, au qai vakayagataka kina e dua na iwase levu ni noqu bula. Au vuli qiri qita tale ga ena levu ni noqu taleitaka na ivakatagi. Ni toso na gauna, au tekivuna e dua na mataqiriqiri kei na vica na noqu itokani cauravou, qai levu na vanua keitou qiriqiri kina. Era taleitaka noqu ivakatagi eso na kabani rogo ra qai kaya nira rawa ni maketetaka. Au mani sainitaka na konitaraki kei na dua na kabani levu ni katokatoni. E taleitaki vakalevu noqu ivakatagi, qai rogoci wasoma ena retio e Quebec.

Au nanuma ga niu sa kunea na marau, ni se tu donu noqu bula, au kilai levu, dua tale ga na ilavo vinaka au rawata ena noqu ivakatagi. Ena siga, au vakaukauayago ena kena vale, vakatarogi ena tabana ni itukutuku, sainitaka na yacaqu ena so na ka mera maroroya na lewenivanua, qai vakaraitaki ena tivi. Ena bogi, au qiriqiri au lako ina pati. Au tekivu gunu niu se gone meu rawa ni doudou na lagasere vei ira na ilala levu. Ia ni toso na gauna au sa vakayagataka na wainimategaga. Au cakava tale ga na ka lialia qai vakasisila.

Era vuvutaki au eso ni vaka meu marautaka tu na bula. Ia au sega ni tukuna rawa na levu ni noqu galili, vakabibi keu tiko taudua. Au lomabibi qai lomaocaoca. Ni toso vinaka sara tu ga noqu mataqiriqiri, rau mate ena AIDS e rua na tagane rau veivuke vakalevu ena noqu rawaka. Au kidroa sara ga! Au taleitaka na ivakatagi, e vakasisila ga na kena ivakarau ni bula.

VEISAUTAKI AU NA IVOLATABU

Au rawaka vinaka, ia au siqema rawa ni dua na leqa levu e yaco tu e vuravura. Au dau vaqaqa se cava sa rui levu kina na veika tawadodonu, kei na vuna e se sega kina ni cakava na Kalou e dua na ka. Au masu vakalevu vua na Kalou niu vinakata me saumi noqu vakatataro. Dua na gauna ni cegu tu vakalailai noqu qiriqiri, au tekivuna tale noqu wili iVolatabu. E sega ni matata vei au e levu na ka au wilika, ia au kila ni sa rairai voleka na icavacava kei vuravura.

Au wilika ena iVolatabu ni a lolo o Jisu me 40 na siga, ena nona tiko voli ena vanualiwa. (Maciu 4:1, 2) Au vakasamataka keu cakava tale ga ya, ena rairai vakaraitaki koya vei au na Kalou. Au mani lokuca na siga meu tekivu lolo kina. Ni se vo toka e rua na macawa, rau gole yani e rua na tagane iVakadinadina i Jiova. E vaka ga meu sa namaki rau toka, au mani sureti rau i vale. Dua vei rau na iVakadinadina qori o Jacques, au raici koya matua qai taroga: “Eda kila vakacava nida sa bula tu ena iotioti ni veisiga?” E sauma vei au ni wilika na iVolatabu ena 2 Timoci 3:1-5. Au veitaravitaka vei rau na taro, dua na ka noqu qoroqoro ena matata kei na veivakacegui ni kena isau. E yavutaki tu ga ena iVolatabu nodrau ivakamacala. Oti e vica tale nodrau veisiko, au raica ni sa sega ni yaga meu lolo.

E wasoma noqu vuli iVolatabu kei ira na iVakadinadina. Au kotiva na uluqu balavu ni toso na gauna, au tiko tale ga ena soqoni kece. Na veikauaitaki e vakaraitaki vei au ena soqoni qori, e vakadeitaka tale ga vei au niu sa kunea na ka dina.

Na noqu bulataka na veika au vulica ena iVolatabu, e okati kina noqu cakava eso na veiveisau lelevu ena noqu bula. Kena ivakaraitaki, meu biuta na wainimategaga kei na noqu ivakarau ni bula vakasisila. E dodonu meu kauta laivi na yalo ni nanumi au ga, meu kauaitaki ira vakalevu eso tale. Niu itubutubu le dua, e bibi meu kauaitaka na lomadrau na luvequ, meu kauaitaka tale ga nodrau bula vakayalo. Sa mani biu na ivakatagi, qai sosomitaki ena dua na cakacaka isau lailai ga ena vanua ni buli iyaya.

E sega ni rawarawa meu vakayacora na veiveisau kece e gadrevi. E yacovi au eso na leqa niu saga tiko meu biuta na wainimategaga. Eso na gauna au sikalutu tale ena noqu malumalumu makawa. (Roma 7:19, 21-24) Na ka e dredre vakalevu meu biuta na noqu ivakarau ni bula vakasisila. E veivakaocai noqu cakacaka vou, veivakayalolailaitaki tale ga na lailai ni kequ isau. Au cakacaka me tolu na vula au qai rawata na levu ni ilavo au taura ena rua ga na aua niu se dua tu na daunivakatagi.

E vukei au na masu meu vosovoso niu vakayacora tiko na veiveisau e gadrevi. Au vakila tale ga na yaga ni wili iVolatabu wasoma. Eso na tikinivolatabu e vakayaloqaqataki au vakalevu. Kena ivakaraitaki na 2 Korinica 7:1, era uqeti kina na lotu vaKarisito mera “vakasavasavataki [ira] mai na dukadukali kece vakayago kei na dukadukali vakayalo.” Dua tale na tikinivolatabu e vakadeitaka niu rawa ni biuta noqu ivakarau ca na Filipai 4:13. E tukuni kina: “Au rawata na ka kece ena vuku i koya e vakaukauataki au.” E sauma noqu masu na Kalou o Jiova, e vukei au meu kila qai bulataka na ka dina ena iVolatabu. Qori e uqeti au meu yalataka vua na noqu bula. (1 Pita 4:1, 2) Au papitaiso meu iVakadinadina i Jiova ena 1997.

KENA YAGA

Au vakabauta keu sega ni biuta noqu ivakarau ni bula e liu, au sa mate makawa. Ia qo au sa qai marautaka dina na bula! Dua na veivakalougatataki levu na noqu vakawatitaki Elvie, e marama yalovinaka. Sa neirau cakacaka vakatabakidua tiko ena gauna qo na veivakavulici ena iVolatabu. Au sega ni tukuna rawa na levu ni noqu marau kei na lomavakacegu. Au vakavinavinaka vei Jiova ni vakayarayarataki au mai meu qaravi koya.​—Joni 6:​44.