Raica sara na lewena

Na Website ni iVakadinadina i Jiova

Digia na Vosa vakaViti

E VEISAUTAKA NA BULA NA IVOLATABU

“Au Kelia Tiko ga Noqu iBulubulu”

“Au Kelia Tiko ga Noqu iBulubulu”
  • Sucu: 1978

  • Vanua: El Salvador

  • Ka e Kilai Kina: Lewe ni iLawalawa iTovo Voravora

NOQU BULA ELIU

“Ke o via kila na veika me baleta na Kalou, mo vuli tiko ga kei ira na iVakadinadina i Jiova.” Dua na ka noqu kurabui niu rogoca qori. Ena gauna ya, sa dede toka noqu vuli kei ira na iVakadinadina i Jiova. Cava au qai cakava? Meu vakamacalataka mada.

Au a sucu e Quezaltepeque na tauni e El Salvador. Keitou le 15 kece, au ika6 vei keitou na veitacini. Rau vakavulici au noqu itubutubu meu daudina qai doka na lawa. Ratou dau vakavulici keitou tale ga ena iVolatabu o Leonardo, kei na rua na yalewa iVakadinadina i Jiova. Ia au sega ni kauaitaka na ka au vakavulici kina qai cala vakalevu noqu vakatulewa. Niu se qai yabaki 14, au sa tekivu gunu qai vakayagataka na wainimategaga kei ira noqu itokani e koronivuli. Era biubiu yadudua e koronivuli o ira noqu ilala mera lai lewe ni dua na ilawalawa, au muria tale ga na nodra ivakaraitaki ca. Keimami bula tu ga e gaunisala, kere ilavo, qai butako tale ga me voli kina na ka kece qori.

Noqu vuvale sara tu ga o ira noqu ilawalawa. Au vakabauta ni dodonu meu yalodina vei ira. Kena ivakaraitaki, dua noqu ilala e vakayagataka vakasivia na wainimategaga qai mokulaka e dua na tagane keitou tiko veitikivi. A mani toboki noqu itokani na tagane qori qai qirita na ovisa. Na levu ni noqu cudru au vorolaka nona motoka me rawa ni sereki noqu itokani. E kerei au na tagane qori meu kua ni cakava. Ia au sega ni via rogoci koya au vakacacana kece nona motoka.

Niu yabaki 18, keitou vala kei ira na ovisa. Au via kolotaka na gasaukuro e caka ga e vale, ia e qai kacabote e ligaqu. Au sega sara ga ni kila a yaco vakacava ya. Au raica ga ni sa kasere na ligaqu, au qai rebo. Niu yadra mai e valenibula, au qai kila ni sa yali na ligaqu imatau, sega ni rogo na daligaqu imatau, qai voleka tale ga ni boko na mataqu imatau.

Na veika qori e sega ni tarova noqu lesuvi ira noqu ilawalawa ena gauna au suka mai kina e valenibula. Oti ga vakalailai era vesuki au na ovisa au bala e valeniveivesu. Sa qai kaukaua ga noqu vakailala kei ira noqu ilawalawa. Keimami dau cakava vata na ka e veisiga, katalau, kana mariwana me yacova ni keimami lai moce.

VEISAUTAKI AU NA IVOLATABU

A sikovi au yani e valeniveivesu o Leonardo. Ni keirau veitalanoa tiko e dusia sara na tatu e toka e ligaqu imatau. E taroga sara: “O kila na ibalebale ni tolu na tatu qori?” Au mani kaya: “Io, veiyacovi, wainimategaga, kei na ivakatagi.” Ia e kaya: “Qori e vakaibalebaletaka na valenibula, valeniveivesu, kei na mate. O sa vakasa oti e valenibula, qo o tiko e valeniveivesu. Cava sa na qai yaco tarava?”

Au kurabuitaka sara ga na ka e tukuna o Leonardo. E dina na ka e kaya, au kelia tiko ga noqu ibulubulu ena ivakarau ni noqu bula. Au ciqoma nona veisureti me keirau vulica vata na iVolatabu. E veisautaka noqu ivakarau ni bula na ka au vulica ena iVolatabu. Kena ivakaraitaki, e kaya na iVolatabu na “ilala ca e vakacacana na itovo vinaka.” (1 Korinica 15:33) Na imatai sara ga ni ka meu cakava meu qara na itokani vou. Au sa sega ni dau tiko ena nodra bose noqu ilawalawa, ia au gole ga ena nodra soqoni na iVakadinadina i Jiova e caka e valeniveivesu. Ena dua na nodra soqoni au sotavi Andrés, a papitaiso me iVakadinadina i Jiova e valeniveivesu. A sureti au sara me keirau katalau. Ena veimataka au sa sega tale ni qai kana mariwana, keirau dau veitalanoataka ga kei Andrés na iVolatabu.

E totolo ga nodratou kidava noqu veisau o ratou noqu ilawalawa. A vinakata sara ga e dua vei ratou na iliuliu ni ilawalawa me vosa vei au. Dua na ka noqu rere. Sega ni macala na ka ena cakava vei au ke kila na ka au vinakata, ni dredre toka ke dua e via biuta na ilawalawa. E kaya: “Keimami raica ni o sega ni dau tiko ena noda bose, ia o sa tiko ena nodra soqoni na iVakadinadina i Jiova. Cava o vinakata mo cakava?” Au kaya sara vua niu via tomana noqu vuli iVolatabu, meu veisautaka tale ga noqu ivakarau ni bula. Au kurabui ni tukuna nira na dokai au na ilawalawa keu vakadeitaka sara ga vei ira niu vinakata meu iVakadinadina i Jiova. E kaya: “Ke o via kila na veika me baleta na Kalou, mo vuli tiko ga kei ira na iVakadinadina i Jiova. Keimami namaka mo tinia na veika ca o dau cakava tiko. Vinaka vakalevu, o sa muria tiko na sala donu. Era na vukei iko na iVakadinadina i Jiova. Au a vuli tale ga kei ira mai Merika, eso tale ga na wekaqu era iVakadinadina i Jiova. Kua ni rere, toso tiko ga.” Au se rere tiko ga, lakovata na noqu marau. Dua na ka noqu vakavinavinakataki Jiova mai vu ni lomaqu. Au vaka ga e dua na manumanuvuka e sere mai na kena bai. Sa qai matata vei au na ka e kaya o Jisu: “Oni na kila na ka dina, na ka dina ena qai sereki kemuni.”​—Joni 8:​32.

Eso noqu itokani makawa era dau vakatovolei au ena wainimategaga, so na gauna au dau sikalutu kina. Ia na noqu dau masu wasoma, toso na gauna au valuta rawa noqu ivakarau ca.​—Same 51:10, 11.

Niu sere mai valeniveivesu e levu era nanuma niu na lesuva tale noqu ivakarau ni bula makawa. Ia e sega, au dau lesu wasoma ga e valeniveivesu meu wasea vei ira na kaivesu na ka au vulica ena iVolatabu. Era vakadeitaka noqu itokani makawa niu sa veisau. Ia era sega ni vakabauta qori o ira keimami dau veimecaki tu eliu.

Dua na siga ni keirau lai vunau kei noqu itokani, era sa wavokiti keirau e dua na ilala daubasulawa keimami dau veimecaki tu eliu. Era vinakata mera vakamatei au. E yalodei o noqu itokani, qai kaya vei ira ena veidokai niu sa sega ni lewena na ilawalawa ya. Au tauri au tu ga vakamalua. Era mokuti au ra qai vakarota meu kua ni lesu tale ina vanua ya, era sega ni dodoka vei keirau nodra iyaragi, keirau mani gole. E veisautaka dina noqu bula na iVolatabu. E liu au na saga sara ga meu sauma lesu vei ira na ka era cakava. Ia qo au sa muria na ivakasala ena 1 Cesalonaika 5:​15: “Raica me kua ni dua e veisausaumitaka na ca, sasagataka tiko ga na ka e vinaka vei kemuni kece, vei ira tale ga na kena vo.”

Na gauna au iVakadinadina i Jiova kina au saga sara ga meu daudina. E dredre toka qori. Ia nona veivuke na Kalou o Jiova, na ivakasala ena iVolatabu, kei na nodra veitokoni noqu itokani vou, au rawata kina. Au sega ni via lesuva noqu ivakarau ni bula makawa.​—2 Pita 2:​22.

KENA YAGA

E dau voravora noqu itovo eliu, au cudrucudru tale ga. Au vakabauta de dua au sa tu qo ena ibulubulu keu tomana tiko na itovo voravora qori. E veisautaki au sara ga na ka au vulica ena iVolatabu. Au sa biuta na ka ca au dau cakava tu. Au vulica meu veiyaloni kei ira au dau veimecaki tu eliu. (Luke 6:​27) Au marautaka tale ga ena gauna qo noqu veitokani kei ira na vukei au me vinaka noqu itovo. (Vosa Vakaibalebale 13:20) Au marautaka ni sa vakainaki noqu bula, au qarava tale ga na Kalou e tu vakarau me vosota na ka ca kece au cakava.​—Aisea 1:​18.

Ena 2006, au tiko ena koronivuli ni lotu vaKarisito daukaulotu era dawai. Ni oti e vica na yabaki, au vakamautaki noqu daulomani, sa dua tiko na luvei keirau yalewa. Ena gauna qo au sa vakayagataka vakalevu noqu gauna meu vakavulici ira eso tale ena ivakavuvuli vakaivolatabu a vukei au. Au sa qase ni ivavakoso tiko, au dau vukei ira tale ga na itabagone mera kua ni cakava na cala au vakayacora niu se vakataki ira. Au sa sega ni qai kelia noqu ibulubulu, ia au sa saga tiko na bula tawamudu e yalataka tu na Kalou ena iVolatabu.