Raica sara na lewena

Cakacaka Vakavunau ena Uciwai na Maroni

Cakacaka Vakavunau ena Uciwai na Maroni

Era tiko ena loma ni veikauloa na Amazon, e Sauca Amerika, na duidui yavusa, duidui vosa, kei ira mai na veivanua tale eso. Ena Julai 2017, era lai cakacaka vakavunau e le 13 na tacida ena uciwai na Maroni kei na veiyasana ena isi kei French Guiana. Nodra inaki oya mera lai tukuna na itukutuku nuitaki ena iVolatabu vei ira na toka ena batiniuciwai.

Vakavakarau

E 12 na siga nodra ilakolako, ia ni bera qori era bose vata kece na vakaitavi kina. E nanuma lesu o Winsley: “Keimami veivosakitaka na yalava, kedra itukutuku makawa, vaka kina na ka me keimami vakarautaka ena igolegole qo.” Era yadua kece na konteina me tawa kina nodra imocemoce lili kei na taunamu. Era na vodo waqavuka vakarua, oti ra qai vodo bavelo me vica vata na aua.

Claude kei Lisette

Cava nodra rai o ira na tacida era sureti kina? Totolo ga nodrau vakadonuya o Claude kei Lisette, rau sa yabaki 60 vakacaca. E kaya o Claude: “Dua na ka noqu marau, au lomaleqa tale ga. Au dau rogo italanoataka tu na vakarerevaki ni kui ni uciwai qori.” E dua tale na ka e lomaleqataka o Lisette, e kaya: “Au vakasamataka vakabibi au na rawa ni cavuta vinaka na vosa vakaAmerindi se sega.”

E va tale ga qori nona rai o Mickaël, e kaya: “Lailai sara na ka keimami kila me baleti ira na yavusa na Wayana. Au mani vakaraica eso na kedra itukutuku ena internet meu kila e vica nodra vosa, meu rawa ni vakabula tale ga ena nodra vosa.”

Rau vakavola e dua na veiwatini o Shirley kei Johann, na vosa era vakayagataka na tiko ena yalava qori. E kaya o Shirley: “E download na vidio ena jw.org ena levu na vosa, vaka kina ivolavosa lailai ni vosa vakaWayana.”

Yaco Yani e Amerindi

Ena Tusiti na ika4 ni Julai, era vodo waqavuka na tacida qori e Saint-Laurent du Maroni mera gole i Maripasoula, e dua na tauni lailai ena colo kei French Guiana.

Oti e va na siga era gole sara vei ira na lewenivanua era tiko ena koro ena muaicake kei Maroni. Era vodo ena dua na bavelo e kilai me pirogues. E kaya e dua na tacida o Roland: “Era taleitaka na lewe i Amerindin na veitalanoataka na ulutaga vakaivolatabu. E levu nodra taro, eso tale ga era via vulica na iVolatabu.”

Rau sotava o Johann kei Shirley ena dua na koro, e dua na veiwatini se qai vakamatei koya ga e dua na wekadrau. E kaya o Johann: “Keirau vakaraitaka vei rau na vidio A Native American Finds His Creator. Dua na ka nodrau taleitaka, rau mani solia vei keirau nodrau imeli ni rau vinakata me tomani na veivosaki.” E tiko na vidio qori ena JW Broadcasting.”

Na koro yawa duadua me sikovi o Antécume Pata, e tiko ena muaicake ni uciwai. E vakadonuya na kena turaganikoro mera vesuka na mataveitacini nodra imocemoce lili ena vanua ra dau vakayagataka na lewenikoro. Era sili tale ga ena uciwai me vakataki ira ga na tiko e kea.

Toso tale na na ilakolako ina koro o Twenké. Nira yaco yani na tacida, era lolositaka tiko na lewena nona takali e dua na wekadra. E kaya o Éric, e dua vei ira na veidusimaki tiko ena lakolako qori: “E vakadonuya nodra ‛Turaga Levu’ se turaga ni yavusa, me keimami vakacegui ira na lolosi tiko. E taleitaka tale ga nodra turaga kei ratou nona vuvale, na tikinivolatabu keimami wilika vei ratou ena iVolatabu vakaWayana. E vakaraitaki tale ga na vidio me baleta na yalayala ni veivakaturi ena iVolatabu.”

Toso Sara i Grand-Santi kei Apatou

Dua veimama na aua nodra toso sobu sara me yaco ina tauni lailai o Grand-Santi. Ena siga Tusiti kei na Vukelulu era wasea na tacida vei ira na tiko e kea na itukutuku vakaivolatabu. Ena siga Lotulevu, era toso sara ena dua tale na yasayasa. E lima veimama na aua nodra gole sobu ina Uciwai na Maroni, mera sikova na koro o Apatou.

Uciwai na Maroni kei na veikauloa na Amazon, ena tadrua ni vanua o Maripasoula kei Grand-Santi

Ena iotioti ni siga, era sikova sara na tacida nodra koro na kai Maroon e tiko ena veikauloa. Era nodra kawa na kai Aferika era vakacakacakataki vakabobula e Sauca Merika ena gauna vakoloni ni matanitu voleka o Suriname. Era veisureti sara na tacida mera soqoni ena veikauloa. E tara e dua na kena valelaca levu me baleta na veisiko qo. E kaya o Claude: “Keimami se qai veisureti ga ena mataka ni siga ya, ia dua na ka neimami marau nira yaco yani vakalewe levu!” Se qai imatai ni gauna me gole ena dua na lomanivanua va qori o Karsten, e lesi sara me vunau ena vosa vakaAukan, e kena ulutaga “Qo ga na iNaki ni Bula?” Era tiko kina e le 91 mai na vica vata na koro.

“Keimami tu Vakarau me Keimami Gole Tale”

Era mani lesu kece na tacida i Saint-Laurent du Maroni. E uqeti ira kece nodra tataleitaki na lewenikoro, ra taura e levu na ivola, ra sarava tale ga e levu na vidio e vakarautaka na iVakadinadina i Jiova.

E kaya o Lisette: “Sega niu tukuna rawa na levu ni noqu marau niu veitomani ena ilakolako qo.” E duavata kina o Cindy: “Ke tukuni meu lako tale, au na cike sara ga meu lako. E vinakati mo vakaitavi kina mo rawa ni vakila na marau qo!”

Na ilakolako qo e veiuqeti sara ga vei ira eso mera na gole tale. E kaya o Mickaël: “Keimami tu vakarau me keimami na gole tale!” Sa toki o Winsley, i Saint-Laurent du Maroni. Rau sa nanuma tale tiko ga o Claude kei Lisette rau yabaki 60 vakacaca, me rau toki i Apatou.